අධ්යයන පොදුසහතික පත්ර සාමාන්ය පෙළ විභාගයට ඉදිරිපත් වන තම පාසලේ දරුවන්ට සුබපැතීමට ගිය විදුහල්පතිවරයකුට පෙරේදා (27දා) රාත්රි යකඩ පොලුවලින් සහ මුගුරුවලින් පහරදී ඇතැයි බගවන්තලාව පොලිසිය කියයි.
බගවන්තලාව ටින්සින් දෙමළ මහ විදුහලේ විදුහල්පතිවරයා මොරා වතුයායට යමින් සිටියදී මෙසේ පහරකෑමට ලක්ව ඇති බව පොලිසිය කළ පරීක්ෂණවලදී හෙළිවූ බව පොලිසිය කියයි.
මෙම පහර දීමෙන් තුවාල ලැබූ විදුහල්පතිවරයා බගවන්තලාව ප්රාදේශීය රෝහල වෙත ඇතුළත් කිරීමෙන් අනතුරුව වැඩිදුර ප්රතිකාර සඳහා දික්ඔය මූලික රෝහල වෙත මාරුකර යවා ඇතැයි බගවන්තලාව පොලිසිය කියයි.
පහර කෑමෙන් තුවාල ලැබූ රෝහල් ගතකර සිටින පී. ප්රභාකරන් මහතා කියා සිටියේ අද (1දා) පැවැත්වෙන අ.පො.ස. සාමාන්ය පෙළ විභාගය සඳහා තම පාසලින් විභාගයට පෙනී සිටින සිසු සිසුවියන්ට සුබපැතීම සඳහා මොරා වතුයායට යන අවස්ථාවේ කිසියම් පිරිසක් යකඩ පොලුවලින් සහ මුගුරුවලින් තමන්ට පහරදී තුවාල සිදුකළ බවයි.
තම පාසලේ 10 වසරේ අධ්යාපනය ලබන සිසුවකුට විනය කඩකිරීමක් හේතුවෙන් පාසල තුළදී දඬුවම් කිරීමට එරෙහිව මෙම පහර දීම සිදුකළේද යන්න සොයා බලන බව පොලිසිය කියයි.
විදුහල්පතිවරයා පහර දුන්නේ යැයි කියමින් මවක් විදුහල්පතිවරයාට එරෙහිව පෙරේදා බගවන්තලාව පොලිසියට පැමිණිල්ලක් කර ඇත.
දෙපාර්ශ්වයේම පැමිණිලි සම්බන්ධයෙන් විමර්ශනයක් ආරම්භ කර ඇති බව බගවන්තලාව පොලිසියේ ස්ථානාධිපති ප්රධාන පොලිස් පරීක්ෂක ශාන්ත බණ්ඩාර මහතා පැවැසීය.
