Sampath Bank වඩා හොඳ අනාගතයක් නිර්මාණය කිරීමේ අරමුණින්, සියලු පාර්ශ්වයන් සමඟ එකට අත්වැල් බැඳගනී

Covid-19 වසංගතය පැතිරීයාමේ කේන්ද්‍රය, චීනය සහ නැගෙනහිර ආසියාවේ සිට ඇමරිකා එක්සත් ජනපදය හා යුරෝපයට මාරුවීමත් සමඟ ගෝලීය ආර්ථිකය දැඩි පසුබෑමට ලක්විය. බොහෝ රටවල් වසංගතය පාලනය කිරීමේ අරමුණින් දිගු කාලීනව බලපැවැත්වෙන පරිදි ඇඳීරි නීතිය පැනවීම සහ සංචරණ සීමාකිරීම සිදු කරන ලද අතර 2020 මාර්තු මස සිට එය ලොවපුරා ආර්ථික ක්‍රියාකාරකම්වලට දැඩි ලෙස බලපෑම් සිදු කරන ලදී.

මේ වන විටද අභියෝගයට ලක්ව ඇති දේශීය ආර්ථිකය, කොවිඞ්-19 වසංගතය පැතිරීයාමෙන් තවදුරටත් ආතතියට පත්විය. මෙම ආර්ථික අභියෝගයන්ට ප්‍රතිචාර දක්වමින් ශ්‍රී ලංකා මහ බැංකුව දෙවන කාර්තුවේදී දෙවරක් ප්‍රතිපත්ති අනුපාත අඩු කිරීමට පියවර ගත් අතර එහි ප්‍රතිඵලයක් ලෙස 2020 ජූනි 30 වන විට සම්මත තැන්පතු පහසුකම් අනුපාත (SDFR) සහ සම්මත ණය පහසුකම් අනුපාත (SLFR) පිළිවෙලින් 5.5% සහ 6.5%ක් දක්වා පහත වැටුණි. එසේම වෙළඳපළ ද්‍රවශීලතා මට්ටම ඉහළ නැංවීමේ අරමුණින් 2020 මුල් භාගය තුළදී ව්‍යවස්ථාපිත සංචිත අනුපාතය අදියර දෙකකින් 5% සිට 2% දක්වා පහත හෙළන ලදී.

Covid-19 වසංගතය හමුවේ ආර්ථිකය හා බැංකු ක්ෂේත්‍රය, සමස්තයක් ලෙස පෙර අත්නොදකින ලද අභියෝගයන්ට මුහුණදෙමින් සිටි මධ්‍යයේ වුවද, සම්පත් බැංකුවට සිය මුළු වත්කම්, ඉතිහාසයේ ප්‍රථම වරට රුපියල් ටි්‍රලියනය සීමාව පසුකර යාමට හැකි වූ බව සතුටින් දන්වයි. වසර 33ක් වැනි කෙටි කාලයක් තුළදී මෙවැනි සන්ධිස්ථානයකට ළඟා වූ ශ්‍රී ලංකාවේ ළාබාලතම ව්‍යාපාරික සංවිධානයද සම්පත් බැංකුව විය හැක.