LOLC ශ්‍රී ලංකාවේ Covid-19 සහන මෙහෙයුමේ පෙරමුණේ

කොවිඞ්-19 ගෝලීය වසංගතයෙන් ලෝකය මෙතෙක් නොවූ විරූ බලපෑමකට මුහුණදී සිටියදී, මෙරට එහි සහන මෙහෙයුමේ පෙරමුණ ගැනීමට LOLC ඉදිරිපත්ව සිටී. එහිදී ආගමික ස්ථාන, වැඩිහිටි හා ළමා නිවාස මෙන්ම රජයේ රෝහල් වලට සහාය වීමට පියවර ගෙන තිබේ. ජාත්‍යන්තර ව්‍යාප්තියක් සහිත ශ්‍රී ලංකාවේ විශාලතම විවිධාංගීකෘත සමාගම් සමූහයක් ලෙස ප්‍රකට LOLC, ශ්‍රී ලංකාවේ ප්‍රමුඛතම මාධ්‍ය ජාලයන් දෙකක් වන හිරු සහන යාත්‍රා සහ මනුසත් දෙරණ සමඟ එක්වී සිය සහන මෙහෙයුම් ක්‍රියාත්මක කරයි.

මෙම සහන මෙහෙයුමට අයි.ඩී.එච්.රෝහල, හෝමාගම මූලික රෝහල, මහරගම අපේක්ෂා රෝහල, කොළඹ, මහනුවර, කරාපිටිය, අනුරාධපුර, මීගමුව, යාපනය සහ කුරුණෑගල ජාතික රෝහල්, ඉරණවිල ගුවන් හමුදා රෝහල, ආරක්ෂක අමාත්‍යාංශය සහ නිරෝධායන මධ්‍යස්ථාන වෙත අත්‍යවශ්‍ය වී ඇති ආරක්ෂණ උපකරණ සහ සැපයුම් ලබාදීම මූලික වේ. මෙම ආරක්ෂණ උපකරණ සහ සැපයුම්වලට ආරක්ෂණ ඇඟළුම් කට්ටල, ශල්‍ය මුහුණු ආවරණ, දෑත් විෂබීජනාශක, කොට්ට සහ මෙට්ට, ආරක්ෂිත හිස් වැසුම්, පා සේදීමේ ඒකක සහ සේදුම් කුඩුද ඇතුළත් වේ. අත්‍යවශ්‍ය වියළි ආහාර ඇසුරුම් පන්සල්, පල්ලි සහ වෙනත් ආගමික ස්ථානවලට මෙන්ම කොවිඞ්-19 බලපෑමට වැඩි වශයෙන් ලක්වූ ප්‍රදේශවල පිහිටි වැඩිහිටි සහ ළමා නිවාස වෙත බෙදා දෙන ලදී. එම බෙදා හැරීමේ මෙහෙයුම් සඳහා LOLC කාර්ය මණ්ඩලය සහ වාහන ආරක්ෂිත පිළිවෙත් අනුගමනය කරමින් එක්විය.