Hi-Expo උසස් අධ්යාපන සහ වෘත්තීය මාර්ගෝපදේශන ප්රදර්ශනය සැප්තැම්බර් 8 සහ 9 යන දිනවල පෙ.ව. 8.30 සිට ප.ව. 5.00 දක්වා මාතලේ ශාන්ත තෝමස් විද්යාලයේදී පැවැත්වේ. අධ්යාපන අමාත්යාංශයේ අනුමැතිය සහිතව පවත්වනු ලබන මෙම ප්රදර්ශනය විද්යාලයේ ආදි ශිෂ්ය සංගමයේ කොළඹ ශාඛාවේ ප්රධානත්වයෙන් එහි ප්රධාන ශාඛාව, අනෙකුත් ශාඛා සහ විද්යාලයේ සහයෝගය ඇතිව සංවිධානය කර ඇත.
මෙම ප්රදර්ශනය හරහා විද්යාලයේ සිසුන්ට විවිධ අධ්යාපනික මාර්ග සහ වෘත්තීය අවස්ථා ගවේෂණය කිරීමට අවකාශය සලසන අතර දිවයිනේ ප්රමුඛ පෙළේ උසස් අධ්යාපන ආයතන සහ ඒවායේ අධ්යයන වැඩසටහන් පිළිබඳවද ඔවුන් දැනුවත් කරනු ඇත. මාතලේ දිස්ත්රික්කයේ නිපුණතා සංවර්ධන හා වෘත්තීය අධ්යාපන දෙපාර්තමේන්තුවේ අනුග්රහය ඇතිව පවත්වන විශේෂ වැඩසටහනක්ද මෙම ප්රදර්ශනයට සමගාමීව පැවැත්වේ.
විද්යාලයේ අ.පො.ස. උසස් පෙළ සිසුන්ගේ නවෝත්පාදන සහ ප්රායෝගික කුසලතා ප්රදර්ශනය කරන තාක්ෂණික ප්රදර්ශනයක් ද මෙයට ඇතුලත් වේ. විවිධ වෘත්තීය ක්ෂේත්රයන්ගේ ප්රවීණයන් විසින් මෙහෙයවන විශේෂ වෘත්තීය මාර්ගෝපදේශන වැඩසටහන් ද මෙම දිනයන්ගේ විද්යාලීය පරිශ්රයේදී පවත්වනු ලබන අතර එමඟින් දැනට අ.පො.ස. උසස් පෙළ හදාරන සිසුන්ට මෙන්ම උසස් පෙළ විභාගය අවසන් කර ප්රතිඵල අපේක්ෂාවෙන් සිටින සිසුන්ටද ඔවුන්ගේ අනාගතය පිළිබඳව දැනුවත් තීරණ ගැනීමට උපකාර වනු ඇත.
මාතලේ ශාන්ත තෝමස් විද්යාලයේ 150 වැනි සංවත්සර සැමරුම ඉකුත් අගෝස්තු මාසයේ යෙදී තිබූ අතර ඊට සමගාමීව ක්රියාකාරකම් රැසක් විද්යාලයේ මෙන්ම එහි ආදි ශිෂ්ය සංගමයන්ගේ ප්රධානත්වයෙන් සංවිධානය කර ඇත. එම සංවත්සර සැමරුම වෙනුවෙන් විද්යාලයේ ආදි ශිෂ්ය සංගමයේ කොළඹ ශාඛාවේ මුලිකත්වයෙන් මෙම Hi-Expo උසස් අධ්යාපන සහ වෘත්තීය මාර්ගෝපදේශන ප්රදර්ශනය පවත්වයි. ප්රදර්ශනය පිළිබඳ වැඩි විස්තර සඳහා මාතලේ ශාන්ත තෝමස් විද්යාලයේ විදුහල්පතිතුමන්වන ධම්මික හේවාවසම් මහතා අමතන්න (078 954 7978).
