‘ජාතියේ මහා පහන්ටැඹ’ ආර්ථික පුනර්ජීවනයට පෙරමුණ ගනියි

මෙරට බැංකු ක්ෂේත්‍රයේ දැවැන්තයා වන ලංකා බැංකුව දැයේ ආර්ථික පුනර්ජීවනයට දායකත්වය සපයන අතරම සිය නොසැලෙන නායකත්ව ස්ථාවරත්වය තහවුරු කරමින් පසුගිය අභියෝගාත්මක මූල්‍ය වර්ෂය සාර්ථකව අවසන් කරන ලදී.

‘සෞභාග්‍යා’ කාරක ප්‍රාග්ධන ණය යෝජනා ක්‍රමය යටතේ වැඩිම ණය ප්‍රමාණයක් (ගනුදෙනුකරුවන් 18,589 දෙනකුට රුපියල් බිලියන 39.1ක් වටිනා ණය ප්‍රමාණයක්), රුපියල් බිලියන 589.4කට වැඩි ණය පහසුකම් සඳහා තාවකාලික ගෙවීම් අත්හිටුවීමේ සහන, 2020 වර්ෂය සඳහා මූල්‍ය ක්ෂේත්‍රය තුළ ඉහළම ලාභය ලෙස රුපියල් බිලියන 23.6ක් වාර්තා කිරීම, වත්කම්, ණය සහ තැන්පතු රුපියල් ටි්‍රලියන 2 ඉක්මවූ ශේෂ පත්‍රය, පෙර වසරට සාපේක්ෂව වත්කම් වර්ධනය 24%ක්, ණය වර්ධනය 28%ක් සහ තැන්පතු වර්ධනය 23%ක් ලෙස ආයතනික වර්ධනයක් සනිටුහන් කිරීම කැපී පෙනෙයි.

දේශීය ආර්ථිකය අඛණ්ඩව බලගන්වමින් ඉතා අසීරු වසරක් සාර්ථකව අවසන් කිරීම මඟින් ලංකා බැංකුව තම නොසැලෙන නායකත්වය යළිත් වරක් තහවුරු කිරීමට සමත්ව ඇත. ගෙවීගිය 2020 වසරේදී කොවිඩ් – 19 වසංගතය හේතුකොටගෙන සමස්ත ලෝකයටම අනපේක්ෂිත අභියෝග රැසකට මුහුණදීමට සිදුවූ අතර, එහි ප්‍රතිඵලය වූයේ ලොව රටකම පාහේ ආර්ථිකයන් සංකෝචනය වීමය.