ආදරේ ගින්දර කලින්ම කියන රේඛාව

අත්ලේ පිහිටි ප්‍රධාන රේඛා අතරින් හෘද රේඛාවට හිමිවන්නේ සුවිශේෂී ස්ථානයකි. ගුරු මණ්ඩලය ප්‍රදේශයෙන් ආරම්භ වන හෘද රේඛාව ශනි මණ්ඩලය, රවි මණ්ඩලය හා බුධ මණ්ඩලය පසුකරගෙන අත්ලේ කෙළවර තෙක් විහිදෙයි. ඒ බව මේ සමඟ පළවන රූප සටහනින් පැහැදිලි වෙනවා ඇති. ඇතැම් විට මෙම රේඛාව බුධ මණ්ඩලයෙන් ආරම්භ වී ගුරු මණ්ඩලය දෙසටද විහිද යා හැකිය. කෙසේ වුවද ගුරු, ශනි, රවි, බුධ මණ්ඩල හතරේ විද්‍යුත් ශක්තීන්ගෙන් පෝෂණය වන හෘද රේඛාව කෙනකුගේ මනස කෙරෙහිද එක එල්ලේම බලපෑම් කරයි. හෘද වස්තුව හා පෙණහලුවල ක්‍රියාකාරිත්වය සටහන් වන අත්ලේ ඇති ප්‍රධානම රේඛාව වන්නේත් මෙම රේඛාව බැවින් එයට හෘද රේඛාව නමින් භාවිත කරයි.

ඒ හැරෙන්නට මෙම රේඛාව මඟින්, ආලය, විවාහ ජීවිතය, ලිංගික ආශා, රුධිර ධාවනය ආදී යම් යම් දේවල් නිර්මාණය කිරීමේ ඇති සහජ බුද්ධිය, ක්‍රියාකාරී හැඟීම් ගතිගුණ පිළිබඳ විශේෂ ලක්‍ෂණද පෙන්නුම් කරයි.

ඇතැම් අයගේ හෘද රේඛාව නොපිහිටන අතර, ඔවුහු අනුකම්පා විරහිත, ආත්මාර්ථකාමී ගතිගුණ ප්‍රකට කරයි. අන් අය කෙරෙහි සෙනෙහසක්, අනුකම්පාවක් හෝ ඔවුන්ගේ සිත් තුළ නොමැත. සාමාන්‍ය ව්‍යවහාරයේද හිතක්, පපුවක් නැති පුද්ගලයෝ වශයෙන් සලකන්නේ මෙවන් පුද්ගලයෝය. ඔවුහු වඩා කෝපසහගත වෙයි. හොඳ හෘද රේඛාවක් ගුරු මණ්ඩලය මැදින් ආරම්භ වී කුජ මණ්ඩලය, බුධ මණ්ඩලය අතරින් අවසාන විය යුතුව ඇත. එසේම එය ශීර්ෂ රේඛාව ළඟින්ම හෝ ශීර්ෂ රේඛාවට බොහෝ ඈත්ව හෝ නොවිය යුතුය. හෘද රේඛාව පටන් ගැනීමේදී තියුණුව පෙනිය යුතුය. එසේම අවසානයේදීද එහි වෙනස් වීමක් නොතිබිය යුතුය (හැපීම, කැඩීම් වැනි). එසේම මෙම රේඛාවේ පළල, ගැඹුර, වර්ණය ගැනද සැලකිය යුතුය. හොඳ හෘද රේඛාවක් පවතින විට හොඳ පෞරුෂයක්, යහපත් සෞඛ්‍ය තත්ත්වයක්, හොඳ ආකල්පයක් යන හැමදේම පවතී. හෘද රේඛාව ප්‍රමාණයට වඩා මණ්ඩලවලට ළංව පිහිටීමද සුබ නොවේ. එවිට මණ්ඩලවල ශක්තිය අඩු වීමෙන් පුද්ගලයා තුළ ඊර්ෂ්‍යාසහගත බවත්, දරුණු ස්වභාවයත් ඇති වීමටද හේතු වෙයි. ඔවුහු බොහෝ ප්‍රේම සම්බන්ධතා ඇතිකර ගනිති. හෘද රේඛාව ප්‍රමාණයට වඩා පහත්ව පිහිටීමද, ආත්මාර්ථකාමී බවක්, කලබලකාරී මානසික තත්ත්වයක් ඇතිවීමටත් හේතු වෙයි. හෘද රේඛාව තැනින් තැන කැඩී තිබීම, රුධිර ධාවනයේ විෂමතාවක් ඇති බව හෙළි කරයි. පැලීගිය ආකාරයේ හෘද රේඛාවෙන් පෙන්නුම් කරන්නේ හෘද වස්තුවේ යම් දුර්වලතාවක් ඇති බවයි. හෘද රේඛාව සමඟ තවත් එවැනිම රේඛාවක් කාගේ හෝ අතක පිහිටා ඇත්නම් ඔහු හෝ ඇය ධනවත් වන බව හස්ත රේඛා ශාස්ත්‍රයේ කියැවෙයි. හෘද රේඛාව ආරම්භයේදීම ශීර්ෂ රේඛාව හා සම්බන්ධව පැවතීම අසුබය. අසනීපයෙන් තැවෙන අයෙක් එමඟින් හඳුන්වා දෙයි. හෘද රේඛාවත්, ශීර්ෂ රේඛාවත් එකට සම්බන්ධ වී එකම රේඛාවක් ලෙස විහිද යෑමත්, ඒ වගේම අසුබයි. තදබල මානසික පීඩාවලට ලක්වී සදහටම දුක උරුම වූ අයකු එම ලකුණෙන් හඳුනාගත හැකිය.

හෘද රේඛාව ගුරු මණ්ඩලය තුළින් මතුවෙලා තිබීමත්, ඉතා හොඳ පිහිටීමක්. පෙම් රජ දහනේ කිරුළු පලඳින්නට වරම් ලබන එවැන්නන්ගේ යුග ජීවිතය ඉතාමත් සාර්ථකය. හෘද රේඛාව කවාකාර හැඩයෙන් පිහිටීම සුබ නොවේ. ඇදුම, හතිය වැනි සෙම් රෝග වැලඳීමට එය හේතු වෙයි. රේඛාව පටන්ගැනීමේදී ශාඛා දෙක තුනකට බෙදී තිබීමද යුග ජීවිතයේ සාර්ථකත්වය පෙන්නුම් කිරීමකි. එමෙන්ම හෘද රේඛාව දෙකඩ වීමත්, එම රේඛාවෙන් මතුවන අවරෝහණ රේඛාවක් (පහළට විහිදෙන) ශීර්ෂ රේඛාව දෙස ඇදී යෑමත් ඒ වගේම අසුබ ඵල දෙන්නකි. පරාජිත පෙම්වතෙක් හෝ පෙම්වතියක් එමඟින් හඳුන්වා දෙයි.

හිඹුටානේ පියතිලකද අල්විස්