විශ්ව කොඩිකාර දැන් මගේ දරුවෙක් වගෙයි

ග්‍රහණය, හංස දඩයම මෙන්ම මෑත කාලයේ ජනප්‍රිය තලයට පත්වූ පබා, අමා, උතුම් පැතුම් ඇතුළු ටෙලිනාට්‍ය ගණනාවක රංගනයේ නියැළුණු ඇය ඔබ කවුරුත් දැන හඳුනන රුවන්ති මංගලා. මේ දිනවල ඇය කෝ කියන ප්‍රශ්නය ඔබේ සිත්වල රැඳී ඇත. ඔබ වෙනුවෙන් ඇය ගැන සොයා බලන්නට අපි අමතක කළේ නැහැ. මේ වන විටත් ඇය කාර්යබහුල රංගන චාරිකාවක නිරත වන අතරතුර ඔබ වෙනුවෙන් ඇය අප සමඟ කතා කළා.
පසුගිය දවස්වල රුවන්ති නිර්මාණවලට වඩා ලොකු වෙලාවක් වෙන්කළේ රට වෙනුවෙන් නේද?
අපිට නිදහසේ හුස්ම ගන්න රටක් තිබිය යුතුයි. රට විනාශ වුණොත් මොන දේ කළත් වැඩක් නැහැ. අපි චරිතයකින් හරි ජනතාව සතුටු කරනවා. හැබැයි ජනතාවට සතුටක් ලැබෙන්නේ රට දියුණු වුණොත්. නිදහස් රටකට බලාපොරොත්තුවක් දැන් ඇතිවෙලා තියෙනවා. කලාවට හොඳ කල දවසක් උදාවෙයි කියලා මම හිතනවා.
ඔබට ආදරය කළ ප්‍රේක්ෂකයන් ඔබ පුංචි තිරයට එනකම් බලාගෙන ඉන්නවා. ඒ අඩුව පුරවන්න හැකිද?
ළඟදීම මම ඉන්න ටෙලිනාට්‍යයක් ස්වාධීන රූපවාහිනියේ විකාශය වීමට නියමිතයි. මම ඒ ටෙලිනාට්‍යයට සම්බන්ධ වුණේ අවුරුදු තුනකින් විතර තමයි. අනිත් එක ටෙලිනාට්‍ය විකාශය නොවීමේ ප්‍රශ්න තමයි පසුගිය කාලේ නිර්මාණකරුවන්ට තිබුණේ.
මේ දවස්වල රුවන්තිගේ වැඩකටයුතු කොහොමද?
දැන් ඉතින් පූර්ණකාලීන ටෙලිනාට්‍යවල නිරත වෙලා ඉන්නවා. මේ දවස්වල විනෝජා නිලන්ති නිෂ්පාදනය කරන ටෙලිනාට්‍යයක රූපගත කිරීම්වලට සම්බන්ධ වෙලා ඉන්නේ.
හැබැයි අපි දකිනා විදියට ඔබ හැම නිර්මාණයකම අම්මාගේ චරිතයට කොටුවුණා නේද?
අම්මාගේ චරිතයට කොටුවුණාට මට ඒ ලැබුණ චරිතවල යමක් කරන්න තිබුණ බව මම විශ්වාස කරනවා. අම්මාගේ චරිත රඟපෑවාට ඒ චරිත සමාජයට දෙන පණිවුඩය වෙනස්.
ඔබ පුංචි තිරයේ වැඩිපුරම අම්මා වුණේ විශ්ව කොඩිකාරට නේද?
‘අමා’, ‘උතුම් පැතුම්’ ටෙලිනාට්‍යවලින් පස්සේ නිර්මාණකරුවන් මගේ පුතා විදියට තෝර ගත්තේ විශ්ව කොඩිකාර තමයි. මම හිතනවා අපි දෙන්නා ඒ චරිත දෙක හොඳට කරනවා ඇති කියලා. විශ්ව කොඩිකාර දැන් ඉතින් මගේ දරුවෙක් වගේ. ඔහු හරිම විනෝදයෙන් නිර්මාණයට උපරිම සාධාරණයක් කරනවා.
වර්ණ ටෙලිනාට්‍යයෙන් ඔබ වෙනස් මාවතකට ගෙන ගියාද?
වර්ණ ටෙලිනාට්‍ය අනෙකුත් නිර්මාණ වගේම මට විශේෂයි. ඒ වගේම වර්ණ ටෙලිනාට්‍යයේ මගේ චරිතය නිරූපණයේදී වෙනස් මාවතකට ගෙන ගියා. ටෙලිනාට්‍ය විකාශය වෙනකොට ඒ වෙනස් කොයි ආකාරයකට ගලාගෙන ගියාද කියලා දැකබලා ගන්න පුළුවන්. නිශාන්ත පෙරේරා තමයි වර්ණ ටෙලිනාට්‍ය අධ්‍යක්ෂණය කරන්නේ. ඔහුට මම විශේෂයෙන් ස්තුතිය පුදකරනවා වෙනස් මාවතකට මාව රැගෙන ගියාට. රොෂාන් පිලපිටිය තමයි මගේ සැමියාට රඟපාන්නේ. විශ්ව කොඩිකාර නැවැතත් මගේ පුතා වුණා.
ඔබ කලා ක්ෂේත්‍රයේ අප දුටු සුවිශේෂී නිර්මාණ සඳහා දායක වුණ ජනප්‍රිය රංගන ශිල්පිනියක්. එය ගැන කතා කළොත්?
මේ වන විට මම ටෙලිනාට්‍ය සියයකට වඩා ප්‍රමාණයකට රඟපාලා තිබෙනවා. චිත්‍රපටවලට නම් රංගනයෙන් දායක නොවුණු තරම්. ඉදිරියේදී සිනමාවට හොඳ කල දවසක් උදාවෙයි. ඒ හරහා අපට හොඳ නිර්මාණවලට දායක වීමට අවස්ථාව උදාවෙයි කියලා මම විශ්වාස කරනවා.
වසන්ත විතාරණගේ