සහේලි ගැන එමාෂා හිතන විදිහ

ජනප්‍රියත්වය හැමදාම රඳවා තියාගන්න අපහසු දෙයක්. එහෙත් කිසිම අඩුවක් නැතිව අදටත් එකම චරිතයකින් ජනප්‍රියත්වය රැකගෙන සිටින දෙවැනි ඉනිමේ සහේලිට ඔබ තවමත් ආදරය කරන නිසාවෙන් අපි ඒ හුරුබුහුටි සිත් ගත් සොඳුරු හිතැත්තිය සමඟ කතාබහට එකතු වුණා.
සහේලි චරිතය හරහා ජනප්‍රිය වුණ එමාෂාගේ ජීවිතයේ සැඟවුණ ආදර කතාවකුත් ඇති නේද?
මගේ ජීවිතයේ එහෙම සැඟවුණ ආදර කතා නැහැ. මම මගේ අම්මාව ආශ්‍රය කරන්නේ මගේ හොඳ මිතුරියක් විදියට වෙලාවකට. මගේ අම්මාට මම නොකියන දෙයක් නැහැ. අනික මම ආශ්‍රය කරන හැමෝටම මගේ ජීවිතයට ළංවෙන්න බැහැ. දුර ප්‍රමාණයක් තියාගෙන තමයි මම ආශ්‍රය කරන්නේ.
ජනප්‍රියම ටෙලිනාට්‍යයක චරිත මවන ඔබට තවත් ටෙලි නාට්‍යවලට වෙන් කිරීමට කාලයක් නැතුව ඇති?
ටෙලිනාට්‍ය, චිත්‍රපටවලින් මට ආරාධනා එනවා. නමුත් සහේලි චරිතයට හානියක් නොවන විදියට තමයි මම චරිත භාරගන්නේ. මගේ පළමු නිර්මාණයට මම මුලින්ම මුල්තැන දිය යුතුයි. නිර්මාණයට හානියක් නොවන විදියට ඉදිරියේදී චරිත තෝරාගැනීමේදී විශේෂත්වයක් දක්වන්න සිදුවෙනවා.
මේ දවස්වල එමාෂා වැඩ ගොඩකට හිරවෙලා කියලා ආරංචියි?
ඇත්තටම ඔව්. මගේ අධ්‍යාපන කටයුතු නිසා මම එක පැත්තකින් හිරවෙලා. තවත් පැත්තකින් මම ආයතන තුනක රැකියාවක් කරනවා සන්නාම තානාපතිවරියක් විදියට. එයට අමතරව ‘දෙවෙනි ඉනිම’ ටෙලි නාට්‍යයේ රූපගත කිරීම්වලට සම්බන්ධ වෙලා කටයුතු කරනවා. වැඩ කරන්න අපහසු වුණත් මම මේ වැඩ ටික ගොඩාක් ආශාවෙන් කරන්නේ. පවුලේ අයගෙනුත් ලොකු සහායක් මට ලැබෙනවා. සැලැසුම්සහගතව ක්‍රමානුකූලව කළාම කිසි ප්‍රශ්නයක් නැතුව වැඩ කරගෙන යන්න පුළුවන්.
සහේලි චරිතය හා සමානද එමාෂාගේ චරිතයත්. ඔබට මේ චරිත දෙක ගැන යම් පැහැදීමක් කළ හැකිද?
සහේලි කියන්නේ ඈත පිටිසර ගමක හැදී වැඩුණු චරිතයක්. සහේලි උසස් අධ්‍යාපනයට තමයි නාගරික පරිසරයකට පිවිසෙන්නේ. හැබැයි එමාෂා එයට වඩා හාත්පසින්ම වෙනස්. මගේ ගම් පළාත බදුල්ල. නමුත් මම ඉන්නේ කොළඹ. මට සහේලි කරපු දේවල් කරන්න බැරිවුණා. මම ගේ ඇතුළේ මව්පියන්ගේ ආදරයත් එක්ක හැදී වැඩුණු කෙනෙක්. මට සමාජය එක්කවත් ගැටෙන්න කාලයක් නැතිවුණා. මම සහේලිගේ ජීවන රටාවට පෞද්ගලිකවම බෙහෙවින් ආදරය කරනවා.
කොහොමද ඔබ රංගනයට ආවේ?
ටෙලිනාට්‍ය ක්ෂේත්‍රයට පිවිසීමට කිසිම ආශාවක්, බලාපොරොත්තුවක් තිබුණේ නැහැ. එහෙත් නොහිතපු වෙලාවක නොහිතපු අවස්ථාවක මටත් සහේලි චරිතය හරහා නිළි වරම් ලැබුණා. ප්‍රභාත් චතුරංග අයියා තමයි මගේ පින්තූර ටෙලිනාට්‍ය අධ්‍යක්ෂ සාරංග මෙන්ඩිස්ට පෙන්වලා තිබුණේ. ඒ හරහා තමයි මම දෙවැනි ඉනිමට සම්බන්ධ වුණේ. එදා මගේ පින්තූර චතුරංග අයියා නොපෙන්නුවා නම් අද මම දෙවැනි ඉනිමේ නැති වෙන්න පුළුවන්.
මේ ක්ෂේත්‍රයට පිවිසිලා ඉන්න ගොඩදෙනෙක් ගැන අසන්න ලැබෙන්නේ විවිධ කටකතා. මෙවැනි කටකතාවලට ඔබටත් මුහුණපාන්න සිදුවී තිබෙනවද?
එහෙම ප්‍රශ්නයකට නම් මට මුහුණපාන්න සිදුවෙලා නැහැ. හැබැයි කවුරු මොනවා කිව්වත් අපට ඒ කටවල් වහන්න බැහැ. එහෙම කටකතා හදන කෙනාගේ බුද්ධි මට්ටම කොයි වගේද කියලා අපිට ඒ කාල වකවානුව තුළ හිතාගන්න පුළුවන්. ලංකාවේ මේ ක්ෂේත්‍රය ලස්සන විදියකට දකිනකොට තවත් පිරිසක් වෙන කෝණයකින් බලනවා. ඒ හැම දේම තේරුම්ගෙන ක්ෂේත්‍රයේ ඉදිරියට යෑම තමා වැදගත්.
වසන්ත විතාරණගේ