පිට පිටම 17 වැනි වසරටත් ‘වඩාත්ම ගෞරවනීය බැංකුව’ බවට කොමර්ෂල් බැංකුව පත්වෙයි

සුප්‍රකට LMD සඟරාව විසින් මෙරට වඩාත් ගෞරවනීය ආයතන තෝරාගැනීම සඳහා වාර්ෂිකව සිදුකරන සමීක්ෂණයට අනුව පිට පිටම 17 වැනි වරටත් ශ්‍රී ලංකාවේ වඩාත්ම ගෞරවනීය බැංකුව ලෙස 2021 වසරේදී කොමර්ෂල් බැංකුව තෝරගෙන තිබේ. ශ්‍රී ලංකාවේ විශාලතම පුද්ගලික වාණිජ බැංකුව වන කොමර්ෂල් බැංකුව 2005 වසරේ මෙම වර්ගීකරණය ආරම්භ කළදා පටන් මේ දක්වා සෑම වසරකම ශ්‍රී ලංකාවේ වඩාත්ම ගෞරවනීය ආයතන පහ අතරට පැමිණීමට සමත්ව ඇත.

2021 වසරේ ශ්‍රී ලංකාවේ වඩාත්ම ගෞරවනීය ව්‍යාපාර ලැයිස්තුවට විවිධාංගීකරණය වූ සමාගම්, ඇඟලුම් මෙන්ම විදුලි සංදේශ ක්ෂේත්‍රයේ ප්‍රමුඛතම සමාගම් සහ ජාත්‍යන්තරව වඩාත් ප්‍රසිද්ධියට පත්වූ බහුජාතික සමාගම් ඇතුළත් විය.

LMD සඟරාව විසින් ‘ශ්‍රී ලංකාවේ වඩාත්ම ගෞරවනීය ආයතන’ තෝරාගැනීමේදී කරුණු 10ක් කෙරෙහි අවධානය යොමුකරන අතර මූල්‍ය කාර්යසාධනය, අවංකත්වය, ගුණාත්මකභාවය, කළමනාකරණය, ධෛර්යවන්තභාවය, ආයතනික සංස්කෘතිය, දැක්ම, නවෝත්පාදනය, ආයතනික සමාජ වගකීම සහ ජාතික හැඟීම එම කරුණු අතරට අයත් වේ. මෙම කරුණු 10ට අමතරව මෙවර අලුතෙන්ම ‘මානව සම්පත් සහ පිරිස් කළමනාකරණය’ සහ ‘අර්බුද කළමනාකරණය’ යන කරුණු දෙකද ඇතුළත් කර ඇත. මෙම කරුණු 12 අතුරින් හතකට අනුව කොමර්ෂල් බැංකුව මෙරට ආයතනික අංශයේ ප්‍රමුඛතම සමාගම් 10 අතරට 2021 වසරේදී පත්ව තිබේ.