කලා ලෝකයේ තරුවක් වෙන්න හැම කෙනකුටම බැහැ. ඒ වාසනාව හිමිවෙන්නෙ සීමිත පිරිසකට විතරයි. එහෙම තරුවක් වෙලා කලා ලෝකයේ බැබලෙන බොහෝ දෙනෙක් ඒ තැනට එන්න කළ කැපකිරීම් අසීමිතයි. හැබැයි ඒ තරම් කැපකිරීම් කරලා ආපු ඇතැම් ශිල්පිනියන්ට නිර්මාණකරණයේ නිරත වෙද්දි විවිධාකාර අයුතු බලපෑම්වලට යටත් වන්නට සිදුවෙනවා යැයි කියන එකත් කනින් කොණින් ඇහෙන දෙයක්. ඇත්තටම එහෙම වෙනවද කියලා අපි කිහිප දෙනකුගෙන් අහලා බැලුවා.
සීමාව පැන්නොත් ගොදුරක් වෙනවා
අපි මුලින්ම කතා කළේ ශාලිකා එදිරිසිංහට. ඇය තවමත් පුංචි තිරයේ අහිංසකාවිය. ඒ තරමට ඇය ප්රේක්ෂකයන්ගේ හදවත්වලට ළංවුණු ජනප්රිය කලා ශිල්පිනියක්. ඉතින් ඇයගේ රංග කුසලතා මේ දවස්වල ‘සේපාලිකා’ගේ චරිතය හරහා ඔබට දැකගන්න ලැබෙන්නේ ‘ජීවිතය ඇතිතුරා’ ටෙලිනාට්යයෙන්.
කලාකරුවකු වෙනවා කියන්නේ උතුම් දෙයක්. එය හැමෝටම ලබන්න බැහැ. ජනප්රියතාවය කියන්නේ මිනිසුන්ගේ ආදරය මත ලැබුණු දෙයක්. නිකරුණේ යන්නම් වාලේ ගියොත් ඒ ජීවිතය විනාශ වෙනවා. ඉතින් තමන් හරියට හිටියොත් තමන්ගේ පවුල් පසුබිම ගැන හිතුවොත් තමාට තමා වටින බව හිතුවොත් කාවටත් බැහැ ජීවිතයට රිංගන්න. හැදෙන කෙනා කොහෙ හිටියත් හැදෙනවා. නැති කෙනා කොහෙ හිටියත් විනාශ වෙනවා. රඟපෑමයි, පෞද්ගලික ජීවිතයයි දෙක පටලගත්තොත් තමයි මෙවැනි ප්රශ්න මතුවෙන්නේ. ආදර්ශමත් චරිතයක් වෙලා තව කෙනෙක්ගේ සිතක් පිනවීම මොන තරම් පිනක්ද. ඒත් ඒ ජනප්රියතාවය සීමාව ඉක්මවා ගියාම තමයි ඔබ ඔය කියන ගොදුරට හසුවෙන්නේ. තමන් ආපු ගමන හරියට තේරුම්ගෙන හරි ගමනක් හරි විදියට ගියොත් කවදාවත් වරදින්නේ නැහැ. මේ ක්ෂේත්රය නෙමේ වෙන කුමන ක්ෂේත්රයක් වුණත් මෙයට පොදුයි.
මටත් විවිධ යෝජනා ආවා
ඉමායා ලියනගේ මේ ක්ෂේත්රයට ඇවිත් ලොකු කාලයක් නැහැ. ඇය 2014 වර්ෂයේ ‘මිස් ශ්රී ලංකා’ කිරුළත් එක්ක තමයි කලාවට යොමුවන්නේ.
මම නිරූපිකාවක් විදියට තමයි මේ ක්ෂේත්රයේ වැඩ කළේ. මම ලබපු ජයග්රහණයත් එක්ක මට නිර්මාණ කිහිපයකින් ආරාධනා ආවා. හොඳ නිර්මාණ තෝරා බේරාගෙන කිහිපයක වැඩ කළා. හැබැයි මගේ කිසිම කැමැත්තක් නැහැ නිතර දෙවේලේ මගේ රූපය රූපවාහිනියේ දකින්න. මේ ක්ෂේත්රයට පැමිණෙන ගොඩක් නවක පරිස ඕනෑම දෙයකට මුහුණදෙන්න සූදානම් ජනප්රිය කිරුළ වෙනුවෙන්. ඇයි තමන් නිකරුණේ ගිහින් විනාශ වෙන්නේ. මම මේ ක්ෂේත්රයේ හැම පැත්තකින්ම වැඩ කළා. ඒත් මගේ නමට කැළලක් ඇතිවෙන්න මම වැඩ කළේ නැහැ. මට වුණත් විවිධ යෝජනා ආවා. මම ඒවාට මුහුණදුන්නේ කාගේවත් හිත් නොරිදෙන විදිහට. තමන් මේ ක්ෂේත්රයේ හරියට හිටියොත් වට්ටන්න බැහැ කාටවත්. මට කාගෙවත් පෞද්ගලික දේවල් අදාළ නැහැ. හැබැයි මම හදාගත්තු දේවල් කිසිම බලපෑමක් මත විනාශ කරගන්නේ නැහැ. මොන බාධා ප්රශ්න ආවත් මම මේ ගමන ලස්සනට යනවා.
මටත් විවිධ ප්රශ්න ආවා
සිනමා ක්ෂේත්රයේ දිදුලන දඟකාර තාරකාවියක් තමයි අනූෂා දමයන්ති. ඉතින් ඇය 2011 වර්ෂයේ ඩාන්සින් ස්ටාර් කිරුළ දිනාගැනීමට වාසනාවන්ත වුණා. ඇය මේ ක්ෂේත්රයට ඇවිත් විසි වසරක කාලයක් ගතවුණත් ඇයගේ ජනප්රියතාවය වෙනුවෙන් අදටත් ළඟින් සිටින්නේ ඇයට ආදරය කරන රසික පිරිස බවත් තම ජනප්රියතාවය තවත් සමහරුන්ට වේදනාවක් වූ බවත් ඇය පැවැසුවා.
කැපිලි, කෙටිලි, විවිධ යෝජනා මේ ක්ෂේත්රයේ නැතුවා නෙමේ. මේ ක්ෂේත්රයේ පිරිසක් මගේ දක්ෂතාවය හංගන්න හදද්දි තවත් සහෝදර පිරිසක් මාව ඉදිරියට ගත්තා. මටත් විවිධ ප්රශ්න ගැටලු මතුවුණා. හැබැයි ඒ කිසිම දේකට මම වැටුණේ නැහැ. මාව වට්ටන්න බැරි වුණේ මගේ ආත්මශක්තිය නිසා. ඒ සියල්ලටම මම නොබියව මුහුණදුන්නා. මම එදා ඉඳලා හිතාගත්තු දෙයක් තමයි මේ ක්ෂේත්රයේ හැමෝම මගේ සහෝදර පිරිසක් ඉන්නේ. ඒ නිසා කා සමගවත් ආදර සම්බන්ධකම් ඇතිකර ගන්නෙ නැහැ කියලා. ඉතින් අදටත් මම නොබියව ශක්තිමත්ව ඉන්නේ මගේ ගමන මම තේරුම් ගත්ත නිසා. කවදාවත් දක්ෂතාවය වට්ටන්න බැහැ තමා ශක්තිමත් නම්.
මට නම් ඕවා නැහැ
‘දේදුණු ආකාසේ’ චිත්රපටය හරහා තාරකාවක් වුණ චුලක්ෂි රණතුංග අද තරු අතර සිටින දක්ෂ රංගන ශිල්පිනියක්. ඉතින් ඇයත් නිරූපිකාවක් විදියට මේ ක්ෂේත්රයේ නමක් දිනා සිටි කෙනෙක්. ඇය පැවැසුවේ මේ වෙනකම් කිසිම කෙනෙක් එහෙම බලපෑම් එල්ලකර නැති බවයි. එය පිළිබඳ අත්දැකීම් නැති බවත්, එය ගැන අදහස් දැක්වීමට අපහසු බවත්, තමන් හරියට හිටියොත් දෙවියොත් නමට වඳීවි කියලයි ඇය අපට වැඩිදුරටත් කියා සිටියේ.
වසන්ත විතාරණගේ
