චීනයේ තියෙන විශාලතම න්යෂ්ටික බලාගාරයෙන් විකිරණ කාන්දුවීමක් සිදුවන්නට පටන්ගෙන ඇතැයි පැවසෙන සිදුවීමක් හේතුවෙන් ඇමෙරිකාව ඒ පිළිබඳ පරීක්ෂණයක් කිරීමට පියවර ගෙන ඇත. ඒ අනුව මෙලෙස බාහිර පරිසරයට නිකුත් වන විකිරණශීලීතාව දැඩි තක්සේරු කිරීමකට ඇමෙරිකානු බලධාරීන් කටයුතු කරමින් සිටී. චීනයේ ග්වැන්ග්ඩොන්ග් ප්රාන්තයේ පිහිටා තිබෙන මෙම ටායිෂාන් න්යෂ්ටික බලාගාරයෙන් මෙසේ විකිරණ කාන්දුවක් සිදුවීමට පටන්ගෙන ඇතැයි පසුගියදා ප්රකාශ විය. බාහිර පරිසරයට මෙසේ න්යෂ්ටික විකිරණශීලීතාවක් පිටවන්නේ නම් එය යම් තීව්ර අයුරකින් දරුණු හානිකර තත්ත්වයක් විය හැකි යැයි වගකිව යුතු පාර්ශ්ව පෙන්වාදී තිබිණි.
එහෙත් මෙවැනි තත්ත්වයක් ප්රකාශ වීමත් සමග චීන බලධාරීන් මෙම සිදුවීම ගැන පුළුල් පරීක්ෂණයක් ආරම්භ කළ අතර, ඔවුන් එහිදී නිගමනය කර ඇත්තේ මේ තාක් කිසිදු විකිරණ කාන්දුවක් සිදුනොවී ඇති බවය. එහෙත් මෙම න්යෂ්ටික බලාගාරයේ තිබෙන ප්රධාන ප්රතික්රියාකාරක දෙකෙන් එකක් ක්රියා විරහිත තත්ත්වයට පත්ව ඇති බව චීන පර්යේෂකයන් සොයාගෙන ඇත. ඒ හේතුවෙන් බලාගාරයේ ක්රියාවලියේ යම් අකර්මණ්යතාවක් තිබෙන බවද චීන පර්යේෂකයන් ප්රකාශ කර ඇත. එහෙත් මෙතෙක් කිසිදු විටක න්යෂ්ටික විකිරණ කාන්දු වීමක් සිදුවන්නේ නැතැයි ඔවුන් ස්ථාවරව ප්රකාශයක් කර ඇත. කෙසේ හෝ ඉදිරියේදී යම් අයුරකින් එසේ විකිරණ කාන්දුවක් සිදුවන්නේ නම් න්යෂ්ටික බලාගාරය වසාදමන බැව්ද චීන බලධාරීන් අවධාරණය කර ඇත.
ටායිෂාන් න්යෂ්ටික බලාගාරය අයිති වන්නේ චීනයට සහ ප්රංශයට වන අතර, මෙය ගොඩනැගීම සඳහා ඇමෙරිකානු ඩොලර් බිලියන 7.5ක අති විශාල ධනස්කන්ධයක් වැයවී ඇත. මෙය චීනයේ යුආන්වලින් නම්, යුආන් බිලියන 50.2ක් වෙයි. චීනයේ මේ වන විට න්යෂ්ටික බලාගාර කිහිපයක්ම ඇතත්, මෙය විශාලතම බලාගාරය වශයෙන් සැලකෙයි. චීනය තමන්ගේ පරමාණුක න්යෂ්ටික ක්ෂේත්රය දියුණු කිරීම උදෙසා ඩොලර් බිලියන ගණනින් මුදල් වැයකර ඇත. ටායිෂාන් න්යෂ්ටික බලාගාරයේ ඇතිවූ යටකී සිදුවීම, ඇමෙරිකාවේ බලශක්ති දෙපාර්තමේන්තුවට දන්වා ඇත්තේ ප්රංශ සමාගම විසිනි. ඉන් පසුව එම රහසිගත වාර්තාව ලොව ප්රකට සී.එන්.එන්. මාධ්ය ආයතනය වෙත ලැබී ලොවට හෙළිකර සිටියේය.
