තාරුකා වගේම මමත් අහිංසකයි…
මේ දිනවල විකාශය වන ‘සත්වරෂා’ ටෙලිනාට්යයේ තාරුකා ලෙසත්, ධරණි ටෙලිනාට්යයේ මියැසි ලෙසත් හුරතල් බසින් හඬ අවදි කරන ඒ සිඟිත්තිය ජාන්වි අප්සාරි අබේවර්ධන සමග කතාකිරීමට අප සිතුවා. මෙවර ‘මව්රට’ පුංචි තරු අතරට ඒ ළමා තාරකාව සමග අප කතාබහ කළේ මේ විදියටයි.
🔴 කොහොමද ජාන්වී දුව?
හොඳින් ඉන්නවා මාමේ, ටෙලිනාට්ය වැඩකටයුතු සමග අධ්යාපන කටයුතු කරගෙන.
🔴 දුවගේ ගම්පළාත කොහෙද?
මම මිනුවන්ගොඩ ප්රදේශයේ.
🔴 එතකොට දුව පාසල් යන්නේ?
මිනුවන්ගොඩ ධම්මාරාම ප්රාථමික විද්යාලයට. මම මෙවර ශිෂ්යත්ව විභාගයට සූදානම් වෙනවා.
🔴 දුව රඟපාන ටෙලිනාට්ය කිහිපයක් විකාශය වෙනවා නේද මේ දවස්වල?
ඔව්. රෑනගල වලව්ව, ධරණි, සත්වර්ෂා ටෙලිනාට්යවල මම ළමා චරිත නිරූපණය කරනවා.
🔴 දුව නිරූපණය කරන තාරුකා චරිතය ගැන යමක් පැවසුවොත්?
මම රඟපාපු අනෙකුත් නිර්මාණවල චරිතවලට වගේ තාරුකා චරිතයටත් ගොඩක් කැමැතියි. තාරුකා කියන්නේ ගොඩක් අහිංසක චරිතයක්. හරියටම කිව්වොත් තාරුකා වගේම මමත් අහිංසකයි.
🔴 දුවට කලා ක්ෂේත්රයට සම්බන්ධ වෙන්න අවස්ථාව ලැබුණෙ කොහොමද?
මම අම්මා එක්ක ගමනක් යනකොට මාව පාරෙදි චාමර ජයවික්රම මාමා දැකලා රඟපාන්න කැමැතිද කියලා ඇහුවා. ඒ හරහා තමයි මම නිර්මාණවලට සම්බන්ධ වුණේ.
🔴 කැමරාව පිටුපස සිටින පිරසත් එක්ක දුවට ඉතින් රඟපෑමට බයක් හිතුණේ නැද්ද?
අපෝ නැහැ. මම පාසලේදිත් විවිධ ප්රසංගවල නැටුම් නැටුවා. පාසලේ සමිතිවල සිංදු කිව්වා. ඒ නිසා මට බයක් දැනුණේ නැහැ.
🔴 මේ වන විට නිර්මාණ කීයක විතර රඟපාලා තියෙනවද?
ටෙලිනාට්ය දහතුනක විතර සහ චිත්රපට හතරක රඟපෑවා.
🔴 දුවව අපට ඉදිරියේදී දැකගන්න ලැබෙන චිත්රපට මොනවද?
සාරිගප්පි, පපා හවුස් චිත්රපටවලට මම සම්බන්ධ වුණා.
🔴 යාළුවො මොකද කියන්නේ රඟපානවා දැකලා?
මම ලස්සනට රඟපානවා කියනවා. ඉදිරියට රඟපාලා හොඳම නිළිය සම්මානය ගන්න කියලත් නැන්දලා මාමලා කියනවා.
🔴 සමමානයක් ගන්න ගොඩක් ආසයිද?
ඔව්, මම ගොඩක් ආශාවෙන් ඉන්නේ.
🔴 ලොකු වුණාම කවුරු වෙන්නද බලාපොරොත්තුව?
පශු වෛද්යවරියක් වීමට කැමැතියි.
🔴 ඒ තරමට ජාන්චි දුව සතුන්ට ආදරෙයිද?
ඔව්. මම ගොඩක් සතුන්ට ආදරෙයි. මම පාරේ පයින් ගියත් සතුන්ට කෑම දිදී තමයි යන්නේ.
🔴 මෙහෙම එක දිගට රඟපාන්න ගියාම අධ්යාපන කටයුතුවලට බාධාවක් නැද්ද?
මම කොහෙ ගියත් පාඩම් කරන පොත්පත් අරගෙන තමයි යන්නේ. විවේකයක් ලැබුණු වෙලාවට මගේ පාඩම් කටයුතු කරනවා.
– වසන්ත විතාණගේ
