AIA ඉන්ෂුවරන්ස් සිය ප්‍රාදේශීය සංවර්ධන කළමනාකරුවන් අගයයි

AIA ඉන්ෂුවරන්ස්, නොබෝදා සිය බෙදාහැරීම් ජාලය තුළ සේවය කරමින් සමාගමට අගනා දායකත්වයක් ලබාදෙන ප්‍රාදේශීය සංවර්ධන කළමනාකරුවන් ඇගයීමට ලක්කරන ලද අතර, මෙහිදී ඇතැම් කළමනාකරුවන්ගේ උසස්වීම්ද සමරන ලදී.

මෙම උත්සව අවස්ථාවේදී, ප්‍රාදේශීය සංවර්ධන කාර්යාලයන් දිගුකාලීනව ලබා ඇති ජයග්‍රහණයන් මෙන්ම බෙදාහැරීම් අංශයේ සාර්ථකත්වය උදෙසා ඔවුන්ගේ මහත් කැපවීම සහ දායකත්වය ඇගයුමට ලක්කෙරිණි. 2009 වසරේදී සමාගමේ සමස්ත බෙදාහැරීම් ජාලයේ කොටසක් ලෙස එක්වුණු ප්‍රාදේශීය සංවර්ධන කාර්යාලයන් එතැන් පටන් සමාගමේ ව්‍යාපාරික සාර්ථකත්වය උදෙසා විශාල කාර්යභාරයක් ඉටුකරමින් සිටියි. මෙම අවස්ථාවේදී ප්‍රාදේශීය සංවර්ධන කාර්යාල කළමනාකරුවන්ගේ ව්‍යවසායකත්වය ප්‍රවර්ධනය කිරීම මෙන්ම ඔවුන් අතර ඔවුනගේ ව්‍යාපාරයේ දියුණුව සඳහාම වන හිතකර සහ යහපත් තරගකාරීත්වයක් ඇතිකරලීමද අපේක්ෂා කෙරිණි.

පසුගිය දශකයක කාලය තුළදී ප්‍රාදේශීය සංවර්ධන කාර්යාල බෙදාහැරීම් ජාලය ඉතා දියුණු තත්ත්වයක් කරා ගමන්කර ඇති අතර, දැනට සමස්ත බෙදාහැරීම් ජාලයේ මුළු නව ව්‍යාපාරවලින් 18%ක දායකත්වයක් ගෙන එන්නේ මෙම අංශයයි. මෙම උත්සවයේදී එම කළමනාකරුවන්ගේ කාර්යසාධනය මත උසස්වීම් ප්‍රදානය කරන ලදී.