ග්‍රහ බලයෙන් බිහිවන කෝටිපතියෝ

සියලු සැප සම්පත් තමන් සතුකර ගැනීම මෙලොව උපදින සෑම කෙනකුගේම එකම සිහිනය බව රහසක් නොවේ. සෑම කෙනකුම ගෙවෙන හැම තත්පරයකම සිතන්නේ ධනවතකු වීමටයි. මේ ගැන ඔබේ කේන්දරයේ මනාව සටහන් වී තිබෙනවා. පෙර කරන ලද මහා පින්කම්වල බලයෙන් මෙලොවදී මහා ධනයක් අත්පත් කරවන බව ජ්‍යොතිෂයේ මනාවට සඳහන්ව තිබෙනවා. උපතින්ම ධනය, මැදි වයසේ ධනය සහ සැඳෑ සමයේ ධනය ලෙස ධනය ලැබීමේ ක්‍රම ත්‍රිත්වාකාරයකට සටහන් වෙනවා.

ග්‍රහ හැසිරීම අනුව ග්‍රහයන් තිදෙනෙක් උච්ච ක්‍ෂේත්‍රව උපතේදී සිටීමෙන් ධනවතකු බවට පත්වේ. එමෙන්ම ග්‍රහයන් තුන්දෙනෙක් මූල ත්‍රිකෝණව සිටීමෙන්ද ධනවත් බව උරුම වෙනවා. තවද ග්‍රහයන් හතරදෙනෙක් උච්ච ක්ෂේත්‍රව උපතේදී සිටීමෙන්ද ධනවත් බව උරුම කර දෙනවා.
මීළඟට අපි බලමු ධනවත් බව ලබාදෙන අනෙකුත් ග්‍රහ යෝග මොනවාද කියලා.
■ නවය අධිපති 5 වැන්නේත්, 5 අධිපති නව වැන්නේත් පිහිටන කළ ධනය ලැබීමේ වාසනාව උදාවෙනවා.
■ 10 අධිපතියා පහේද, 04 අධිපතියා දහයේද සිට ඔවුනොවුන් ත්‍රිකෝණ අධිපති හරහා පෙනීම මඟින් රජකුට සමාන සැප සම්පත් උරුම වේ.
■ නවය අධිපතියා ලග්නාධිපති සමඟ හෝ නවය අධිපතියා විසින් දැකීමෙන්ද පස්වැන්න අධිපතියා ලග්නයත්, 4 හෝ 10 යන ස්ථානයකත් සිටියදී උපන්නේ නම් මහා ධනයක් හිමිවන්නේය.
■ නවය ධනු, මීන දෙකින් එකක් වී දහයේ ශුක්‍ර සිටියදී කිවි අධිපතියා දැකීමෙන්ද ධනයක් හිමිවේ. සඳු කටකය 5 සිටියදී, ශනි 11 වැන්නට පැමිණ උපන්නේ නම් මහා ධන කුවේරයකු වේ.
■ ශුක්‍ර ස්වක්ෂේත්‍රව පහේද, ශනි 11 වැන්නේද සිටීමෙන් මහා ධනයක් හිමිවනු ඇත.
■ පස්වැන්න සිංහය වී එහි රවි සිට ලග්න ස්ථානයේ ගුරු සිටීමෙන් රන්, රිදී, මුතු මැණික් හිමිවන වාසනාව ලැබේ. ලග්නය සිංහ වී එහි රවි, ගුරු, කුජ සිටීමෙන්ද ක්‍රමයෙන් ධනවතකු බවට පත්වනු ඇත.
■ කටක රාශිය තුළ සඳු, ගුරු, කුජ තිදෙන එහි සිටියදී උපත ලැබීමෙන්ද මහා ධනයකට හිමිකාරයකු බවට පත්වනු ඇත.
■ ලග්නය මේෂ, වෘශ්චික දෙකින් එකක් වී කුජ, බුධ, ශනි, කිවි එක්වීමෙන්ද ධන සම්පත් වර්ධනයට හේතු යෙදේ.
■ 5 අධිපති 11 අධිපති උපතේදී බලවත්ව යෙදීමෙන්ද, ලග්නාධිපති ශනි වී උච්ච රාශියකට පැමිණි විට උපත ලබා ඇති විට 10, 7, 1 රාශිවල ශුක්‍ර යෙදීමෙන්ද ධනය, බලය, ශක්තිය ලැබෙන බව පැවසේ.
■ 2, 9, 11 අධිපති ග්‍රහයන් අතර ලග්නයෙන් 1, 4, 7, 10 යන රාශි අතරින් එක් රාශියක එක් ග්‍රහයෙක් සිටීමෙන් 5, 11 අධිපති ගුරු වීමෙන්ද සැපය, බලය සහ ධනය ලැබෙනු ඇත. 1, 4, 7, 10 සහ 5, 9, 2 අධිපතිත් හතරේ යෙදී උපන්නෙහි නම් මහා ධන කුවේරයකු බිහි කරන බව සඳහන් වේ.

මේ ආකාරයට කේන්දරවල බොහෝ ධන යෝග පිහිටන අතර ඒ ඒ ග්‍රහ තත්ත්වයන් හමුවේ එම ධන යෝග ක්‍රියාත්මක වීමත් බලවත් වීමත් සිදුවේ. ඒ අනුව ජන්මීන්ට ධනය, බලය නොඅඩුව ගලා එන අතර ජන්ම පත්‍ර ඉතා සූක්ෂ්මව පරීක්ෂා කිරීමෙන් මෙම ග්‍රහ යෝග සහ ධන යෝග හඳුනාගත හැකිවේ. එසේ හඳුනා ගන්නා ග්‍රහ තත්ත්වයන්ගෙන් නිසි කලදී ඉතා කල්පනාකාරීව ප්‍රයෝජන ගත හැකි අතර, ඒ සඳහා ජන්මීන් උනන්දු වීම ඉතාම වැදගත්වේ.
ජ්‍යොතිෂවේදී සත්‍යජිත් සම්පත්