⬤ සරම් ඇඳලා පුරුදු නෑනේ…
⬤ මම කුංෆු සටන් ඉගෙනගන්නවා…
⬤ මට ඕනෙ අධ්යක්ෂවරයෙක් වෙන්න…
මේ දවස්වල දකින දකින නිර්මාණවල ළමා තරු වැහිවැහැලා. ඉතින් හෝඩි පන්තියේ ඉඳලම හුරතල් බසින් හැඩවැඩ පෙන්වන පුංචි තරුවක් ගැන තමයි මේ කතාව. ඔහු සචින් නෙත්සර. ස්වාධීන රූපවාහිනියේ විකාශය වන ‘මහාපොළොව’ ටෙලිනාට්යයේ ‘ජයසේන’ විදියට මේ පුංචි තරුව රඟපානවා. ඉතින් පුංචි පුතාගේ දඟකාරකම්, හපන්කම් ගැන අපිත් එක්ක කිව්වෙ මේ විදියට.
🔴 සචිත් පුතා මොකද කරන්නේ මේ දවස්වල?
සෑහෙන කාලයකට පස්සේ පාසල් ආරම්භ වුණා. අධ්යාපන කටයුතු එක්ක තමයි මේ දවස්වල මම මූලික වෙලා වැඩ කරගෙන යන්නේ. ඒත් හිතට පුංචි බයකුත් තියෙනවා ආපසු පාසල් වැහෙයිද කියලා.
🔴 පුතා පාසල් යන්නේ කොහාටද?
මහරගම ශ්රී චන්ද්රරත්න මහා විiාලයට. මම දැන් පහ වසරේ මෙවර ශිෂ්යත්ව විභාගය ලිවීම සඳහා ඒකට සූදානම් වෙනවා.
🔴 එතකොට රංගන කටයුතුවලට සම්බන්ධ වුණේ නැද්ද?
නිර්මාණවලින් නම් ආරාධනා එනවා. ඒත් ඒ කිසිවක් බාර ගත්තේ නැහැ. අධ්යාපන කටයුතු නිසා.
🔴 ‘මහපොළොව’ ටෙලිනාට්යයේ ඔබ නිරූපණය කළ ‘ජයසේන’ චරිතය ගැන කිව්වොත්?
‘මහපොළොව ටෙලිනාට්ය ගොඩ දෙනෙක් ආශාවෙන් නරඹනවා. මමත් ඒ ටෙලිනාට්ය ගොඩාක් ආශාවෙන් බලනවා. මම තමයි ඒ ටෙලිනාට්යයේ ‘ජයසේන’ගේ ළමා කාලයට රඟපෑවේ. මම හොඳට රඟපානවා කියලා දකින හැමෝම කියනවා. මට සුබපතනවා. ඉදිරියට හොඳට රඟපාන්න කියලා.
🔴 පුංචිම කාලේ ඉඳලම රඟපෑමට ආශාවක් පුතාගේ තිබුණද?
ඔව්… මම පෙර පාසල් යන කාලෙත් ළමා නාට්ය රඟපෑවා. ඉතින් මටත් ආශාවක් තිබුණා ටෙලිනාට්යවල රඟපාන්න. මම මුලින්ම සම්බන්ධ වුණේ වෙළෙඳ දැන්වීම්වලට. ඒ හරහා මාව දැකලා ටෙලිනාට්යවලට, චිත්රපට සඳහා රඟපාන්න සම්බන්ධ කරගත්තා.
🔴 ‘මහපොළොව’ ටෙලිනාට්යයේ රඟපාන්න ගිහින් අමතක නොවන සිදුවීම් එහෙම ඇති…?
ඒ ටෙලිනාට්ය රූගත කළේ ලස්සනම පළාතක. හරිම විනෝදයෙන් තමයි අපි හිටියේ. හැබැයි ඉතින් මගේ චරිතයට මට අඳින්න තිබුණේ සරමක්. කොයිවෙලේත් ඒක කඩා වැටෙනවා. මම සරමක් ඇඳලා නැති නිසා මට ඒක හුරු නැහැ.
🔴 පුතාට රඟපාන්න කලින් දෙබස් දෙනවාද බලාගන්න?
නැහැ… එහෙම දෙන්නේ නැහැ. මොකද අපි දෙබස් කටපාඩම් කරගෙන රඟපායි කියලා. ඒ නිසා ඒ වෙලාවට කියන දේ කරනවා. අනෙක මට එක පාරක් පිටපත බැලුවම චරිතය ගැන හිතලා මට ඒ විදියට හැඩගැහෙන්න පුළුවන්.
🔴 පුතා ‘කුංෆු’ සටන් හදාරනවා කියලා ආරංචියි?
ඔව්… මගේ අයියත් ටෙලිනාට්යවල රඟපානවා. එයා තමයි පහන් සන්දීප. අයියත් කුංෆු සටන් හදාරන නිසා මටත් හිතුණා ඒ කලාවත් ඉගෙනගන්න.
🔴 සචින් පුතාව අපට ඉදිරියේදී දැකබලා ගන්නට පුළුවන් නිර්මාණ මොනවද?
අපිට අපි නෑ, අත් නොහරින හිත්, කකුළුවෝ මකුළුවෝ රේස්, පස් වැනි නිර්මාණය සඳහා මම රඟපෑවා.
🔴 පුංචි හිතේ අනාගත බලාපොරොත්තුව?
මම ගොඩාක් කැමැති චිත්රපට, ටෙලිනාට්ය අධ්යක්ෂවරයෙක් ලෙසට වැඩ කරන්න තමයි.
වසන්ත විතාරණගේ
