⬤ අතහැරුණු දේවල් ගැන දුකක් නැහැ…
⬤ ගත්ත තීරණය වෙනස් කරන්නේ නැහැ…
අයිශ්වර්යා රායි බච්චන්.., ලොව සිටින ලස්සනම කාන්තාවන් අතර එක් කාන්තාවක් වේ. එවැනි හැඳින්වීමකට ඈෂ් බඳුන් වූයේ, ඈ ‘මිස් වර්ල්ඩ්’ කිරුළ හිස මත දැරීම පමණක්ම නිසාම නොව… සත්තකින්ම වචනයේ පරිසමාප්ත අර්ථයෙන්ම ඈෂ්ට උපතින්ම ආශ්චර්යමත් රූ සපුවක් හිමිව තිබිණ. ඒ නිසා මෙන්ම තවමත් ඈ කිරුළට අමතරව රූ සිරිය අතින්ද ලොව අති සුන්දර කාන්තාවකි.
ඈෂ් අහංකාර බව කියන කතාව ඇත්තද..?
අහංකාර කමකට වඩා ඈෂ් නිතර සමාජය ඉදිරියෙහි පරෙස්සමට ගනුදෙනු කරන්නීය.
ඈෂ්ගේ වචන මෙන්ම යම් කතාබහද පරෙස්සම්ය.
සම්මුඛ සාකච්ඡාවකදී ඇය තමා මෙහෙය වන්නට උත්තර බඳින්නේ බොහෝදුර හිතා බලලාය.
උත්තර දීමට අසීරු ප්රශ්න ඇය ඉතාම උපායශීලීව ලිස්සා හරින්නීය.
කිසිවිටෙක සහෝදර නිළියක හෝ නළුවකු විවේචනය නොකරන ඈෂ්… වාචාල කටක් හිමි කරන් ජොහාර් හමුවේ, ‘කොෆි විත් කරන්’ රියැලිටි ෂෝ එකේදී පවා කතාබහ කරන පරෙස්සම සිත්ගන්නාසුළුය.
කොටින්ම කියතොත් අයිෂ්වර්යා බච්චන් මැඳුරට කවදාවත් දූවිලි අංශුවකවත් කිලුටක් නොකරන සුන්දර කාන්තාවකි.
ඈෂ් ගැන තව රසැති තොරතුරු බොහෝමයක් වේ. ඒ අතර ඈ විසින් ප්රතික්ෂේප කරන ලද චිත්රපට රැසක කතාව පසුගිය දිනෙක ‘ෆිල්ම් ෆෙයාර්’ සඟරාවේ පලවී තිබිණ.
ඈෂ් ඒ චිත්රපට අතහැර දැමුවේ ඇයි..?
ඈෂ් එයට දුන් පිළිතුර වූයේ ඒ කිසිවක්ම ඇගේ සිත්ගත්තේ නැතැයි කියාය. එලෙසම පිටපත කියවන විට තමාට එය ‘බෝරිං’ යැයි සිතුණු වගද ඈෂ් කියා සිටියාය.
ඒ චිත්රපට දියාරු ගණයේ ඒවාද..?
ඔබ පුදුමයට පත්වන තරමට ඒ චිත්රපට කිහිපය මනස්කාන්තය… විචිත්රවත්ය, ඒ බොහෝ චිත්රපටවල අධ්යක්ෂවරයා වූයේ යාශ් චොප්රාය. කිහිපයක නම් පවසන්නේ නම්, කුච් කුච් හෝ හේ, වීර් සාරා, දිල් තෝ පාගල් හේ ය.
දෙවියනේ… ඈෂ් ඒ සොඳුරු පෙම් කතා අතහැර දැමුවේ ඇයි.., අනෙක යාශ්ජිගේ ආරාධනාවන් ඈෂ් ප්රතික්ෂේප කළේ මොන හිතකින්ද?
එතැන කියවෙන තවත් කදිම පුවතක් වන්නේ..,
‘ඔබ මෙහි නමට කැමැති නැතුවද..?’ එහෙම නම් අප එය වෙනස් කරමු යැයි’ කියාද යාශ් චොප්රා ඈෂ්ට පවසා ඇත. එහෙත් ඈෂ්ගේ උත්තරයෙහි වෙනසක් වී නැත. අවසානයේදී එය රාණි මුඛර්ජි, ප්රිටි, කාජල් සහ කරිෂ්මා අතර බෙදී ගියේය. සියලුම චිත්රපට අති සාර්ථක විය. ‘බොක්ස් ඔෆීස්’ අතර එය ප්රමුඛව තිබිණ.
ඈෂ් පසුව ඒ ගැන පසුතැවුණාද?
‘නැහැ කිසිවිටෙක මම පසුතැවීම් වෙනුවෙන් තීරන ගන්නා කෙනෙක් නෙවෙයි.’
ඉහත ප්රශ්නය මාධ්යවේදියකු ඇසූ මොහොතේ ඈෂ් දුන් පිළිතුර ඒ විය.
එනමුදු… යම්කිසි අවස්ථාවක ඈෂ් කොතැනක හෝ කියා තිබුණේ..,
‘මට අතහැරී ගිය යම් දේ තුළ මම පසුකලෙක හොඳක් දුටු අවස්ථාද තිබුණා… යැයි යනුවෙනි.
ඈ ඒ පැවැසුවේ මෙම චිත්රපට මාලාව ගැනද?
එය නම් කියන්නට නොදනිමු. හැබැයි ආරාධ්යා කුස පිළිසිඳ ගත් මොහොතේ විශිෂ්ඨ ගණයේ තෙලිඟු චිත්රපටයක් තමාට අත්හැරුණු වග ඈෂ් පුවත්පත් කතාබහකදී පවසා තිබුණු වග මතකය.
මේ අල්ලපනල්ලේ ‘ෆිල්ම් ෆෙයාර්’ සඟරාව පරණ කතාවක් ඇදගත්ත හේතුව මොකක්ද?
1960 සහ 70 දශකයේ චිත්රපට කිහිපයක් නව මුහුණු කිහිපයක් සමග නිෂ්පාදනය කිරීමේ සූදානමකට ප්රකට උතුරු ඉන්දීය නිෂ්පාදකයන් කිහිප දෙනෙකු සූදානම් වන බව ආරංචි වී ඇත.
ඉතින් එයින් සමහර නිර්මාණ සඳහා ඈෂ්ට ආරාධනා ලැබෙන්නට යනවද?
පුංචිපහේ කසුකුසුවක එහෙම සඳහන්ය. ඈෂ් තවමත් කිසිවක් පවසා නැති බවද අසන්නට ඇත.
පරණ කතාවක්.., ෆෙයාර් සඟරාවට මතක් වූයේ එනිසා වන්නට ඇත.
දමයන්ති රේණුකා ප්රනාන්දු
