කොමර්ෂල් බැංකුවට ඒෂියාමනි සඟරාවෙන් සම්මාන දෙකක්

ආසියාවේ බැංකු සහ ප්‍රාග්ධන වෙළඳපොළ කර්මාන්තවල හඬ ලෙසින් සැලකෙන කීර්තිමත් ‘ඒෂියාමනි’ සඟරාව මගින් පිරිනමන ‘හොඳම සුළු හා මධ්‍යම පරිමාණ ව්‍යවසාය බැංකුව’ සහ ‘ආයතනික සමාජ සත්කාර සඳහා හොඳම බැංකුව’ යන ගෞරවණීය ජාත්‍යන්තර සම්මාන යුගලය පිට පිටම දෙවන වසර සඳහාත් දිනා ගැනීමට කොමර්ෂල් බැංකුව සමත්වී තිබේ.

ශ්‍රී ලංකාවේ සුළු හා මධ්‍ය පරිමාණ ව්‍යවසාය ක්ෂේත්‍රය දියුණු කිරීම තුළින් රටේ ආර්ථිකයට බැංකුව ලබාදී තිබෙන දායකත්වය සහ එම ක්ෂේත්‍රය සවිබල ගැන්වීම වෙනුවෙන් බැංකුව ඉදිරිපත් කර තිබෙන මූල්‍ය සේවා ඇගයීමෙන් පසුව බැංකුව වෙත ‘හොඳම සුළු හා මධ්‍ය පරිමාණ ව්‍යවසාය බැංකුව’ යන ජාත්‍යන්තර සම්මානය ලබාදී තිබීම මෙහිදී කැපී පෙනේ. මේ අතර, බැංකුව විසින් සිය ආයතනික සමාජ වගකීම් භාරය මගින් මෙරට අධ්‍යාපනය, සෞඛ්‍ය, පරිසරය සහ ප්‍රජා සංවර්ධනය දියුණු කිරීම සඳහා රටපුරා ජාතික මට්ටමින් කරන මෙහෙවර ඇගයීමට ලක් කරමින් මෙහිදී ‘ආයතනික සමාජ සත්කාර සඳහා හොඳම බැංකුව’ යන ජාත්‍යන්තර සම්මානය ලබාදී ඇත.