දුබලත්වයෙන් මුවහත් වූ ඔහුට ඩයලොග් මනුසත්කාර මෙහෙයුමේ සවිය

පියෙකුගේ හද කම්පනයට පත්කරවන කතාවක් සහිත වීඩියෝවක් අපට පසුගිය දිනෙක සමාජ මාධ්‍ය ඔස්සේ සංසරණය වනු දකින්නට ලැබිණි. හදිසි අනතුරක් හේතුවෙන් දෙපයම අහිමි වූ ඔහු අද වන විට තවත් අසරණ බවට පත්ව ඇත්තේ ඔහුගේ සිතෙහි ඇති දිරියට අත්වැලක් සැපයීමට ශක්තියක් ඇති අයෙකුගේ සහාය නොලැබීම හේතුවෙනි. මෙම දිරිය පියාණන් වෙත ශක්තියක් වෙමින් ඔහුට අවශ්‍ය සහාය ලබාදීමේ අරමුණින් ඩයලොග් පූර්ණ දායකත්වයෙන් ක්‍රියාත්මක වන ‘මනුසත්කාර මෙහෙයුම’ පසුගියදා ඔහුගේ නිවෙසට පැමිණියේ ජනතාව වෙනුවෙන් කැපවෙන ආයතනයක් ලෙස ඔවුනගේ පීඩාවන් හමුවේ ඔවුන්ට ශක්තියක් වීමේ මානුෂීය හැඟීම පෙරදැරි කරගනිමිනි.

මාවනැල්ල, රුවන්දෙණිය ප්‍රදේශයේ ජීවත්වන දීප්ති සතුරුසිංහ මහතා මීට වසර පහකට පමණ පෙර හදිසි අනතුරට පත්වන්නේ ඔහු කිසිදු විටෙක අපේක්ෂා නොකළ අයුරිනි. කුඩා දියණියකගේ වගකීම සිය දෙවුර මත දරමින්, ඇයගේ අනාගතය සාර්ථකව ගොඩනගා ගැනීමට අවශ්‍ය මග සකසමින්, ඇයට සාර්ථක අධ්‍යාපන පරිසරයක් නිර්මාණය කරමින් පියෙකුගේ ආරක්ෂාව සහ වගකීම නොපිරිහෙළා ඉටුකළ දීප්ති මහතා, මෙම අවාසනාවන්ත සිදුවීම හමුවේ නිමේෂයකින් ඔහුගේ එම සිහින සහ බලාපොරොත්තු සුනු විසුනු වී ගියේ ඔහු සදාකාලිකව ඇඳකට සහ රෝද පුටුවකට කොටු කරමිනි.

ඔහුට ශක්තියක් වීම අපගේ යුතුකමයි. එය ඔහුට කරන උපකාරයකටත් වඩා ඔහුගේ අත්ම ශක්තිය වඩවාලීමට කරන්නා වූ සහායකි. ඉතා සුළු ආබාධයක් ඇතමෙකු තවකෙකු වෙත අතපාන තත්ත්වයකට පත්කරනා කාලයක දීප්ත වැන්නන් මේ අයුරින් ඇගයීම සැබෑ මනුසත්කාරයකි. අපි ඔහුගේ දිරියට ශක්තියක් වෙමු.