ඩිම්පල් නැන්දා ඔබට සුබපතමි

අගය කරන්න වචන නැති තරම්…

පසුගිය දිනෙක ප්‍රවීනත්වයටපත් බොලිවුඞ් නිළි ඩිම්පල් කපාඩියාගේ ඉන්ස්ටර්ග්‍රෑමයෙහි ප්‍රශංසනීය සුබපැතුමක් සටහන්ව තිබිණි.
‘ආදරණීය ඩිම්පල් නැන්දා,
බොබී නම් ආදරණීය කතන්දරය ඉතා අලංකාරව, වර්ණවත්, සොඳුරු කෙල්ලක ලෙස උතුරු ඉන්දීය සිනමාවට ශෝභාවක් වූ ඔබ ජාත්‍යන්තර සිනමාව තුළද රැඟූ ආකාරය අනගිභවනීයය.
ජෝන් ඬේවිඞ් වොෂින්ග්ටන් සමඟ ඔබ ඔබේ රංගනීය හැඟීම් බෙදාගත් ආකාරය දීප්තිමත්ය.
ඔබේ කතා කරන දෙනෙත ඔබට හිමි රංගනයෙහි බලසම්පන්න බව අවුලවාලීය..,
ඔබේ හැසිරීම් සමබරව තිබිණ. අන්‍යයන් පොළඹවනසුළුය..,
සත්තකින්ම අතිශයෝක්තියකින් තොරව මම ඔබව අගයමි. ඉන්දියානු නිළියක හොලිවුඞ් චිත්‍රපටයක කළ ආකර්ශණීයම රංගනය මම ‘ටෙනෙට්’ තුළින් ඉතාම පැහැදිලිව දුටුවෙමි.
අගය කරන්නට වචන නැති තරම්ය එය..,
ඩිම්පල් නැන්දා ඔබට සුබපතමි..,
මට ඔබට ගරු කරන රිතික් රෝෂන්..,
ඩිම්පල්ගේ සිත, මේ සෙනෙහෙබර සුබ පැතුම හමුවේ දැඩිව සංවේදීව තිබිණි. ඇගේ දෑසට කඳුළු උනන්නට වූ බව ඈ ට්වින්කල් ඛන්නා සමඟ පවසා තිබුණාය.
එලෙසම ‘ජෝන් වොෂින්ග්ටන්’ සමඟ ඩිම්පල් පෙනී සිටින රූප රාමුවක්ද රිතික් විසින් සුබපැතුම පාමුල මුදාහැර තිබිණි.
ඔබට ස්තුතියි රිතික්, මගේ දූවරුන්වත් මෙතෙක් මට නොදුන් අගයක් මම අද ඔබෙන් ලදිමි… එතරම් අවංකව රංගවේදියකුට තවත් රංගනවේදිනියක අගය කරන්නට හැකි යැයි මට සිතුණේ නැත. ‘ටෙනෙට්’ නැරැඹීම ගැනත්, මටවත් නොපෙනුණු අගයක්, මගේ රංගනය වෙනුවෙන් මට දුන් ඔබට දෙවනුවද ස්තුති කරන්නෙමි.
ඩිම්පල් කියා තිබුණේ රිතික්ගේ සුබපැතුමට ප්‍රතිචාර දක්වන විට තම දෙනෙතින් කඳුළු වැටුණේ ඇයිදැයි යන්න තමාටද ප්‍රශ්නයක් බවකි.
කොයික කෙසේ වුවද, රිතික්ගෙත්, ඩිම්පල්ගෙත් මේ සුබපැතුම් සහ තුති පිදීමේ හුවමාරුවට ඔවුන්ගේ අනුගාමිකයන් විසින් ලක්‍ෂ ගණනින් ප්‍රතිචාර දක්වා තිබිණ. එහි වූයේ ඉතා සංවේදී, දයාබර සටහන්ය.
ටෙනෙට් නැරැඹීම සඳහා රිතික් තම පුතුන් දෙදෙනාද කැටුව ගොස් තිබිණි. නාමාවලිය සඳහා පෙළ ගැස්ම තිරය මත සටහන්වන තුරුවත් ඩිම්පල් ‘ටෙනෙට්’ හී රඟන බව තමා දැන නොසිටියේ යැයි රිතික්… ඩිම්පල්ට පවසා තිබුණේ සුබ පැතුමෙන් පසු රිතික්ට දුරකතන ඇමැතුමක් දෙන මොහොතේය.
‘මැඩම්’ යනුවෙන් ආමන්ත්‍රණය නොකර රිතික් තමාව නැන්දා යනුවෙන් ඇමැතීම ගැන තමා දැඩි සතුටට පත්වූ බවත් ඒ සෙනෙහෙබර ආමන්ත්‍රණය හමුවේ තමා ඉතා තදින් සංවේදී වූ බවත් ඩිම්පල් තවදුරටත් පවසා තිබිණ.
රිතික් පවසා තිබූ අන්දමට යමක්-කමක් තේරුම් යන කොලුගැටයකු අවදියේ තමා ‘බොබී’ චිත්‍රපටය තමාගේ හොඳම චිත්‍රපට තේරීම් අතර එකක්ව තිබිණ.
ඩිම්පල් කපාඩියා ‘බොබී’ හී රිෂී කපූර්ට ආදරය කරන හුරුබුහුටි ආකාරයට අද යොවුන් නිළියකට ළංවීමටවත් බැරි යැයි ඔහු තම පියා සමඟ එය වරින්වර නරඹන අවස්ථාවල කිහිපවිටක් පවසා තිබිණි.
කොහොම නමුත් ‘ටෙනෙට්’ හී සුබ පැතුමෙන් අනතුරුව රිතික් සහ ඩිම්පල් නිතර ඉන්ස්ටර්ග්‍රෑම් සහ ට්විටර් හරහා හිතෛෂී සටහන් මුදාහරින බව ‘හින්දුස්ථාන් ටයිම්ස්’ හී ‘ස්ටාර් ගොසිප්’ තීරුවෙහි සටහන්ව තිබිණ.
එතරම් දයාවෙන් මා අගය කරන්නට ඔබ වැනි පුතකු මට සිටියා නම් එය ඉතා අගය යැයි ඩිම්පල් කපාඩියා රිතික්ට පවසා තිබුණේ ‘2021’ට රිතික් ඇයට නැන්දා යන ආදරණීය ආමන්ත්‍රණයෙන් සුබපතද්දීය.
උතුරු ඉන්දීය සුපිරි නළු රන්බීර්ද ඩිම්පල්ගේ අපූරු මිතුරෙකි.
රන්බීර් එලෙස ඩිම්පල් හා මිතුරු වූයේ ඈ තම පියාගේද සමීපතම හිතවතියක නිසාය.
උත්සව අවස්ථාවන්හිදී ඩිම්පල්ව හමුවන සමහර අවස්ථාවන්වල රන්බීර් අසන නිතර ප්‍රශ්නයක් වන්නේ,
‘ඔයා මගේ තාත්තාව අමතක කර රාජේෂ් ඛන්නාට මනාප වූයේ ඇයි’ කියාය.
එවැනි මොහොතක ඩිම්පල් හඬනඟා සිනාසෙන්නේ රන්බීර්ට පහරක් ගසමින්ය.
ලොව අනේකාකාර බැඳීම් සහ හිතවත්කම් වෙයි. ආදරයෙන්, රාගයෙන් තොර වූ බැඳීම්ද ඒ අතර ප්‍රකටය. මිතුදමක්ද නොවන ඒ බැඳීම් ගෞරවනීයය. ඔහු රළුය… එයට වයස් බේදයක්ද නොවන්නේය.
සංවේදී සුබපැතුමක් සමඟ රිතික් සහ ඩිම්පල් අතරද ඇති වූයේ එවැනි ගෞරවනීය බැඳීමක් වන්නට ඇතිය.
දමයන්ති රේණුකා ප්‍රනාන්දු