⬤ මට ලැබෙන්නෙ දඟකාර – කටකාර නපුරු චරිත…
‘තව දුරයි ජීවිතේ’ ටෙලිනාට්යයේ ‘ටිටී’ගේ චරිතයට පණපෙවූ ඒ දඟකාර, කටකාර සොඳුරු රුවැත්තියට අදටත් ප්රේක්ෂක ආදරය ලැබෙනවා නිසැකය. පුංචි තිරයේ සිය දක්ෂතාවය පාමින් ආදරණීය ප්රේක්ෂකයන්ගේ සිත් දිනා ගනිමින් ඇය කලා ක්ෂේත්රයේ දිගු ගමනක් ආ තැනැත්තියකි.
රංගන ශිල්පිනියක්, නිවේදිකාවක් මෙන්ම ගායන ශිල්පිනියක් ලෙසින්ද ඒ අපූරු කලාකාරිනිය හැඳින්වීමට හැකිය. ඇය නමින් යොවුන් නිළි පබසරා මධුෂාණිය. ‘මව්රට’ හදවතෙහි විශේෂාංගය ‘හාට්’ සමඟ සුහද පිළිසඳරකට ඇය එකතු වූයේ මේ විදියටය.
🔴 මොකද පබසරා මේ දිනවල පේන්න නැත්තෙ?
ඇත්තම කියනව නම් මේ දවස්වල කිසිම වැඩකට සම්බන්ධ වුණේ නැහැ. මීට මාස තුනකට විතර කලින් අවසන් වුණු ‘රන්තිලි වැව’ නාට්යයට තමයි අන්තිමටම සම්බන්ධ වුණේ. ඉතින් පසුගිය කාලෙම වැඩ කළ නිසා මට හිතුණා මේ දවස්වල ටිකක් ගෙදරට වෙලා විවේකීව ඉන්න.
🔴 ඔබ රංගන ක්ෂේත්රයට සම්බන්ධ වෙලා කොපමණ කාලයක් වෙනවද?
මම පුංචි කාලේ ඉඳන්ම රංගනය හැදෑරුවා. ටෙනිසන් කුරේ මහතාගේ ‘මෑන් ද මෑන්,’ ‘කුරුල්ලා’ යන නාට්යයේ රඟපෑවා. ඊට පස්සේ ‘එෆ්.එම්’ නාලිකාවලට සම්බන්ධ වෙලා නිවේදන කටයුතු සිදුකළා. ඒ කාලෙ නම් රංගනයෙන් සෑහෙන කාලයක් ඈත් වෙලා හිටියේ. නැවැතත් රංගන ක්ෂේත්රයට සම්බන්ධ වෙලා කටයුතු කළා. ඉතින් පසුගිය කාලෙ තමයි මම එකදිගට රංගනයෙන් සම්බන්ධ වුණේ. සැරින් සැරේ ක්ෂේත්රයට ආව ගිය නිසා හරියටම එහෙම කාලවකවානුවක් කියන්න බැහැ.
🔴 ඒ කියන්නෙ දැන් ඔබ නිවේදන කටයුතුවලින් ඈත්වෙලාද?
නැහැ. ඇත්තෙන්ම කිව්වොත් මගේ ආසාවක් තියෙනවා නැවැත වතාවක් රංගන ශිල්පිනියකට වඩා නිවේදිකාවක් විදියට වැඩ කරන්න. ආයෙත් නාලිකාවකින් මට ආරාධනා කළොත් නිවේදිකාවක් විදියට හොඳ වැඩසටහනකට සම්බන්ධ වෙන්න සතුටින් එය මම බාර ගන්නවා.
🔴 රංගනය, නිවේදනය වගේම ඔබ ප්රසංග වේදිකාවටත් සහභාගි වෙනවා නේද?
ඔව්. ඇත්තටම ප්රසංග කියන දේ නම් ආයෙත් සෑහෙන කාලයකට කරන්න පුළුවන් වෙයි කියල නම් මම හිතන්නෙ නැහැ. මොකද මේ කොරෝනා තත්ත්වය එක්ක එළිමහන් ප්රසංග පවත්වන්න දෙන්නෙ නැහැනෙ. අනෙක මම ගොඩක් වෙලාවට ලංකාවෙ ප්රසංගවලට සහභාගි වුණේ නැහැ. විදේශ සංචාරවල ප්රසංග සඳහා පමණයි සහභාගි වුණේ.
🔴 පබසරා වැඩිපුරම ප්රේක්ෂකයො අතරට ගියේ කටකාර, නපුරු චරිත හරහා. වෙනස්ම ආකාරයේ චරිතයකින් ප්රේක්ෂකයා අතරට එන්න අදහසක් නැද්ද?
කැමැතියි. ඒත් මට ගොඩක් වෙලාවට දඟකාර චරිත, නපුරු චරිත තමයි ලැබෙන්නෙ. අහිංසක චරිත ලැබෙන්නෙම නැති තරම්. ඉතින් කටකාර, දඟකාර, නපුරු චරිත සාර්ථකව කරන නිසාද දන්නෙත් නැහැ මට ඒ චරිතම විතරක් ලැබෙන්නෙ. හැබැයි ඉතින් එහෙම චරිත ලැබුණා කියලා එහි වැරැද්දක් මම දකින්නෙ නැහැ. මම හිතනවා ඒ චරිතවලින් ප්රේක්ෂකයො අතරට යන්න පුළුවන් කියලා.
🔴 පබසරාට සිනමාවෙන් ආරාධනා ලැබුණෙ නැද්ද?
සිනමාවෙන් ආරාධනා කලින් නම් ලැබුණා. හැබැයි ඉතින් මෑතකදි නම් ආරාධනා ලැබුණෙ නැහැ. සිනමාවට සම්බන්ධ වෙන්න එහෙම අවස්ථාවක් මට ලැබුණෙම නැහැ. සිනමාවට සම්බන්ධ වෙන්න අනිවාර්යෙන්ම කැමැතියි. මොකද සිනමාව කියන්නේ රංගන ශිල්පිනියකට ගොඩක් වටින දෙයක්.
🔴 ක්ෂේත්රය තුළ මෙතෙක් ආ ගමනේදී ප්රේක්ෂකයන්ගෙන් ලැබුණු ප්රතිචාර මොනවගේද?
ඇත්තම කිව්වොත් මට ගොඩක්ම ප්රතිචාර හමුවුණේ ‘තව දුරයි ජීවිතේ’ ටෙලිනාට්යයේ ‘ටිටී’ගේ චරිතයට. හිතාගන්න බැරි විදියට මගේ ජීවිතේ වෙනස් කරපු චරිතයක් තමයි ‘ටිටී’ කියන්නෙ. ගොඩක් දේවල් මට ඒ චරිතයෙන් ලැබුණා. මම නාට්ය ගණනාවකටම සම්බන්ධ වෙලා වැඩ කළාට මට ප්රේක්ෂකයො අතරට වැඩිපුරම යන්න පුළුවන් වුණේ ඒ චරිතය හරහා. ‘ටිටී’ කිව්වම ඕනෑම කෙනෙක් දන්නවා. අදටත් ප්රේක්ෂකයො කතා කරනවා. ඉතින් මගෙ ජීවිතේ මට ලැබුණු වටිනාම චරිතයක් තමයි ‘ටිටී’ කියන්නෙ. මම හිතනවා ඒ චරිතය ගොඩක් වාසනාවන්ත චරිතයක් කියලා.
🔴 ඉතින් විවාහය ගැන තවම හිතලවත් නැද්ද?
විවාහ වෙන්න අදහසක් තියෙනවා. හැබැයි ඉතින් දැන්ම නෙවෙයි. ලබන අවුරුද්දෙ වගේ බලාපොරොත්තුවක් තියෙනවා.
ජෙහානි සිල්වා
