කටට සැරට සැප දෙන කොච්චි කරල

‘කොච්චි’ කිව්ව ගමන් අපිට දැනෙන්නෙ ටිකක් සැර ගතියක්. මේ නම වෑංජනයක්, සම්බෝලයක් එක්ක මිසක් සංගීතයත් එක්ක කොහෙත්ම පෑහෙන්නෙ නෑ. නමුත් මේ ‘කොච්චි’ කියන නම අද වෙනකොට සංගීත ක්ෂේත්‍රය තුළ කතාබහට ලක්වෙන ජනප්‍රිය මාතෘකාවක් බවට පත්කරන්න කොච්චි කරල් හතරකට හැකියාව ලැබිල තියෙනව. ඒ ලංකාවේ පළමු තරු කිරුළ හිමිකරගත් තරුණිය වන උපේකා නිර්මාණිගෙ අලුත් වැඩෙත් එක්ක. ඉතින් කොච්චිවල සැර කොහොමද කියල බලන්නත් එක්ක අපි උපේකට කතා කළා.
කොච්චිවල සැර මේ වනකොට අපිට හොඳට දැනෙන්න අරන් තියෙනව. ඇත්තටම කොහොමද මේ වැඬේ පටන් ගත්තෙ?
කොච්චි කියන්නෙ කාන්තා කටහඬවල්වල් මූලික කරගත්ත බෑන්ඞ් එකක්. මාත් එක්ක එරන්දි මධුෂිකා, ටෂ්නි පෙරේරා, නිරාශා නැටලි කියන ගායිකාවන් තුන්දෙනා තමයි බෑන්ඞ් එකේ මේ වැඬේ කරගෙන යන්නෙ. මට ඕන වෙලා තිබ්බෙ ලංකාවෙ කවුරුත් නොකරපු, දැක්ක ගමන් වැලඳගන්න, කනට මිහිරි වැඩක් කරන්න. ඒ අනුව තමයි අපි හතරදෙනා එකතු වෙලා කොච්චි පටන් ගත්තෙ.
අනිත් කොච්චි කරල් හොයාගත්ත විදිහ ගැන කතා කළොත්?
ඒ තුන්දෙනාම ඩී්‍රම් ස්ටාර් තරගාවලියට සහභාගි වුණු අය. ඇත්තටම ඔය තුන්දෙනා කාලයක් තිස්සෙ මගේ ඔළුවෙ හිටිය තුන්දෙනෙක්. ඔවුන්ට පිහිටල තියෙන්නෙ එකිනෙකාට වෙනස් කටහඬවල්. මේ වැඬේ පටන්ගන්න ඕනෙ කියල හිතුණ ගමන්ම මගේ ඔළුවට ආවෙ මේ තුන්දෙනා.
ඩී්‍රම් ස්ටාර් එක්ක ලැබුණු ජනප්‍රියත්වයත් එක්ක තනියම ගමනක් යන්න පුළුවන්කම තියෙද්දි ඇයි බෑන්ඞ් එකක් පටන්ගන්න හිතුවෙ?
මේ වෙනකොට මම ඩී්‍රම් ස්ටාර් වෙලා අවුරුදු දහයක් විතර වෙනව. මේ කාලය තුළ මම ගායිකාවක් විදිහට ක්ෂේත්‍රයේ වැඩකටයුතු කළා. විවාහයෙන් පස්සෙ මවක් වීමත් එක්ක සංගීත වැඩකටයුතුත් ටිකක් අතපසු වුණා. ඉතින් ඔහොම ඉන්නකොට තමයි කොරෝනා වසංගතයක් එක්ක සියලුම වැඩ නතර වුණේ. ඒ වෙලාවෙ තමයි මම හිතුවෙ යූටියුබ් චැනල් එකක් පටන් අරන් ගර්ල්ස් බෑන්ඞ් එකක් හදන්න ඕනෙ කියල. මුලින්ම අපි වෙන වෙනම සින්දු රෙකෝඞ් කරල ගෙන්නගෙන පස්සෙ ඒව එඩිට් කරල තමයි මුලින්ම වැඬේ කළේ. ඔය විදිහට තමයි මේක පටන් ගත්තෙ.
කොච්චි වගේ සැර කෙල්ලො ටිකක් ඉන්න නිසාද බෑන්ඞ් එකට කොච්චි කියල නම දැම්මෙ?
ඇත්තටම මේ කොච්චි කියන එක මට කරන්න වෙන්නෙ නෑ මගේ හස්බන්ඞ්ගෙ සහයෝගය නොලැබුණා නම්. බෑන්ඞ් එකක් මේන්ටේන් කරනව කියන එක ගර්ල්ස්ලට ටිකක් අමාරු වැඩක්. ඉතින් මගේ අදහස් ඒ විදිහටම ක්‍රියාත්මක කරන්න සම්පූර්ණ සහයෝගය දෙන්නෙ මගේ හස්බන්ඞ්. මේකට නම දාන වෙලේ මම හිතුවෙ ටිකක් වෙනස් සිංහල නමක් බෑන්ඞ් එකට දාන්න ඕනෙ කියල. එතකොට මගේ හස්බන්ඞ් තමයි යෝජනා කළේ බෑන්ඞ් එකේ ඉන්නෙත් කෙල්ලොම හින්ද, කෙල්ලො ටිකක් සැර හින්ද මේකට ‘කොච්චි’ කියල නම දාමු කියල. ඒ විදිහට හිතල තමයි මේ නම දැම්මෙ.
කොච්චි වැඩිපුරම ජනප්‍රිය වෙලා තියෙන්නෙ කවර් සින්දු එක්ක නේද?
අපේ බෑන්ඞ් එකේ සින්දු තුනක් මේ වෙනකොට අපි කරල තියෙන්නෙ. ඒවයෙ මියුසික් වීඩියෝත් මේ වෙනකොට කරල තියෙන්නෙ. රටේ මේ වෙලාවෙ තියෙන තත්ත්වයත් එක්ක ඒක රිලීස් කරන එක අපරාධයක් කියල හිතුණ. රටේ තත්ත්වය ටිකක් සමථයට පත්වුණාට ඒවත් එක්ක තවත් අලුත් වැඩ කීපයක් කිරීමේ බලාපොරොත්තුවෙන් තමයි ඉන්නෙ.
සමාජ මාධ්‍ය ඔස්සේ වන ජනප්‍රියත්වයම මතම කොච්චිට ක්ෂේත්‍රයේ රැඳිල ඉන්න පුළුවන් හිතල හිතනවද?
එහෙම එකක් නෑ. අපේ නිර්මාණ අපි මුලින්ම රිලීස් කළේ යූටියුබ් එක හරහා. ඉතින් ඒ ඔස්සේ ලැබුණ ජනප්‍රියත්වයත් එක්ක තමයි මේ තාක් දුර ඇවිත් ඉන්නෙ. ඒ දැකපු දේවල් අනුව තමයි බොහෝ මාධ්‍යවලින් අපිට වැඩසටහන්වලට කතා කරන්නෙ. ඉතින් ඉදිරියෙදි යූටියුබ්වලින් විතරක් නෙමෙයි අනෙක් සෑම තැනකදිම අපිව දකින්නට ලැබෙයි.
මේ කරපු වැඩ ටිකත් එක්ක කොච්චිවලට ලැබෙන ප්‍රතිචාර මොන වගේද?
ඇත්තටම මේ වෙනකම් කවුරුවත් නරකක් නම් අපිට කියල නෑ. රසවින්දනය දන්න කිසිම කෙනෙක් අපිට බනී කියල නම් මම හිතන්නෙ නෑ.
‘කවර්’ හරහා ගීතවලට හානි කරනව කියන චෝදනාව ඇවිත් නැද්ද?
අපි මොන වෙනස්කම් කළත් සින්දුවේ මෙලඩි එකට හානියක් නොවෙන්න තමයි ඒ දේවල් කරන්නෙ. අනිත් එක අපි කරන හැම නිර්මාණයක්ම අපි කරන්නෙ මුල් අයිතිකරුවන්ගෙ අවසරය ඇතිව. අපි මේ වැඬේ කරන්නෙ යම්කිසි ප්‍රමිතියක් ඇතිව. නැතුව නිකන් කරන්නම්වාලෙ කරන් වැඩක් නෙමෙයි මේක. ඉතින් ඒ විදිහෙ චෝදනාවක් නම් කාගෙන්වත් ඇවිල්ල නෑ.
ඩී්‍රම් ස්ටාර් වෙලා ගෙවුණු අවුරුදු දහය ගැන මේ වෙනකොට මොකද හිතෙන්නෙ?
ඇත්තටම ඒ ගැන මතක් වෙනකොට ගොඩක් සතුටුයි. අද මම මේ තැන ඉන්නෙ ඩී්‍රම් ස්ටාර්වලින් ලැබුණු දේවල් නිසයි. මම තමයි ලංකාවෙ මුලින්ම රියැලිටි වැඩසටහනක් ජයග්‍රහණය කළ තරුණිය. ඒක ගැනත් මම ගොඩක් සතුටු වෙනව.
මීට අවුරුදු දහයකට කලින් තරුවක් වුණු ඔබ අද බිහිවන තරුණ ගැන කොහොමද දකින්නෙ?
මම හිතන්නෙ ඔවුන්ගෙ පැවැත්ම තීරණය වෙන්නෙ ඔවුන් ක්ෂේත්‍රය තුළ වැඩ කරන විදිහ අනුව. දැන් බිහිවන තරුණයන් දිහා බැලුවම පේන්න තියෙන දෙයක් ඉතාමත් දක්ෂ, යම්කිසි දැනුමක් තියෙන අය තමයි දැන් රියැලිටි වැඩසටහන්වලින් බිහිවෙන්නෙ. තාක්ෂණික දැනුමත් ඔවුන්ට උපරිමයෙන් තියෙනව. මේ දවස්වල දකින්න තියෙන දෙයක් තමයි මේ තරගවලදි ගොඩක් ඇහැ යන්නෙ සහ වැඩිපුර මතක හිටින්නෙ ගෑනු ළමයි. ඉතින් ඒකත් ඒ අයට හොඳ අවස්ථාවක් කියල තමයි මට හිතෙන්නෙ.
උපේකගෙ ඉදිරි නිර්මාණ කටයුතු කොයි විදිහටද සැලැසුම් කරල තියෙන්නෙ?
ඉදිරියෙදි මගේ තනි නිර්මාණ සහ කොච්චිත් එක්ක කරන නිර්මාණ කිහිපයක්ම එළිදක්වන්න බලාපොරොත්තුවෙන් ඉන්නෙ. යූටියුබ් හරහා තමයි ඒ නිර්මාණ එළියට දාන්න බලාපොරොත්තු වෙන් ඉන්නෙ. මොකද ඒ හරහා තමයි අපිට ඕනම දෙයක් අරන් අපේ රසිකයන් අතරට යන්න පුළුවන් ලේසිම මාර්ගය. ඉදිරියෙදි හොඳ නිර්මාණ කීපයක්ම අපෙන් අහන්න, දකින්න ලැබෙයි.
ඉන්දික වික්‍රමරත්න