අවන්හලක ඉපදී මා මියයනවා නම් මේ සසරේ පින් කළ ඇති එකම කෙනා මං…
අවන්හලක ඉපදී මා
මිය යනවා නම්
මේ සසරේ පිං කර ඇති
එකම කෙනා මං
බිඳුවක්වත් නෑ මට කිසි අඩු පාඩු
මිය යන තුරු සිටින්නේමි අවන්හලේ මං
මේ අවන්හලේ මං……
මේ පද පේලි ටික මුලින්ම ගායනා කරලා අද වෙද්දී දශක කිහිපයක් ගත වෙලා ගිහින්. ඒත් එදා වගේම අදටත් මේ ගීතය එක වගේම ජනප්රියයි. දශක කිහිපයක් පුරා පරම්පරා කිහිපයක්ම මේ ගීතය රස වින්දා. ඒ වගේම අනාගතයේදිත් මේ ගීතය තවත් බොහෝ දෙනකු රස විඳීවි. හැබැයි ඒ සොඳුරු හඬ අපි ළඟ ඉතිරි කරලා මේ ගීතයේ හිමිකාරයා වන ෂෙල්ටන් මුතුනමගේ නැමැති ආදරණීය කලාකරුවා අප අතරින් සදහටම වෙන් වෙලා ගියා. ඒ ගීතය විතරක් නෙවෙයි ෂෙල්ටල් මුතුනමගේ මහතා ගායනා කළ ජනප්රිය ගීත සියල්ලම අපේ හදවතේ හැමදාම රැඳී තියේවි.
“දීග නොයන් රත්තරනේ”, “මේ දෙව් මැඳුරේ පුදසුන අභියස”, “සමාව ඉල්ලා දෙපා සිඹින්නට”, “මහ සයුරේ ගැඹුරු දියේ ගෙවන ජීවිතේ”, “වාරු නැගෙන් සිත” වගේ ෂෙල්ටන් මුතුනමගේ මහතා ගායනා කළ ගීත රාශියක් අපිට මතක් කරන්න පුළුවන්. ගායකයෙකු විතරක් නෙවෙයි සංගීත ප්රසංග සංවිධායකවරයෙක් සහ සම්බන්ධීකාරයෙක් විදියටත් බොහෝ කාලයක් ෂෙල්ටන් මුතුනමගේ මහතා ප්රසංග වේදිකාව එක්ක කටයුතු කළා. ඊට අමතරව ඔහු ටෙලිනාට්යයක් සඳහාත් රංගනයෙන් දායක වී තියෙනවා.
අසනීප තත්ත්වයක් හේතුවෙන් මීගමුව මහ රෝහලේ ප්රතිකාර ලබමින් සිටි මුතුනමගේ මහතා මිය යන විට 73 වැනි වියේ පසුවූ බව තමයි දැන ගන්න ලැබෙන්නේ. යොවුන් වියේදී ඔහු හිමිකර ගත් ජනප්රියත්වය මිය යන විටත් එක විදියටම රඳවා ගන්න සමත් වූ තවත් එක් කලාකාරයෙක් විදියට මුතුනමගේ මහතාගේ නම අපේ හදවතේ සැමදා රුඳෙනු ඇති. ඒ වගේම ඒ හඬත් කවදාවත් වයසට ගියේ නැහැ.
කොහොම වුණත් අපි හැමෝටම උරුම ජීවිතයේ නියමය පසක් කරමින් ඒ සොඳුරු කලාකරුවා යන්න ගිහින්. මව්රට හාට් පාඨකයන් වෙනුවෙන් ෂෙල්ටන් මුතුනමගේ මහතාට පිරිනමන උපහාරය තමයි මේ.
චන්දන
