සිප්හලට අරුණාලෝකය කැන්දූ මනුසත්කාර මෙහෙයුම

අනුරාධපුර ත්‍රිකුණාමලය මාර්ගයේ තිරියාය මංසන්ධියේ සිට කිලෝමීටර් 15ක් පමණ දුරකින් පිහිටා ඇති කිවුලේකඩ විද්‍යාලය පළමු වසරේ සිට අ.පො.ස සාමාන්‍ය පෙළ විභාගය දක්වා ඉගැන්වීමේ කාර්යයේ නිරත විද්‍යාලයකි. දශක හතකට පමණ පෙර ස්ථාපනය කරනු ලැබූ මෙම විද්‍යාලය දරුවන්ගේ නැණස පෑදීම වෙනුවෙන් හුදෙකලා අරගලයක නිරත වූ විද්‍යාලයකි. අවම වූ පහසුකම් යටතේ පළමු වසරේ සිට අ.පො.ස. (සා/පෙළ) දක්වා දරුවන් හට අධ්‍යාපනය ලැබීමට සෙවණ ලබාදෙන මෙම විද්‍යාලය 14 දෙනෙකුගෙන් සමන්විත ගුරු මණ්ඩලයක කැපවීමෙන් ළමුන් 242 දෙනෙකුට සිප් නැණ ලබාදෙන්නේ අභියෝග රැසකට මුහුණ දෙමිණි.

මේ ඔස්සේ යමින් මෙම දරුවන්ගේ මූලික අවශ්‍යතා අවබෝධ කරගත් ඩයලොග් පූර්ණ දායකත්වයෙන් ක්‍රියාත්මක මනුසත්කාර මෙහෙයුම, ජල ගැටලුව හේතුවෙන් මෙම දරුවන් මුහුණදෙන දුෂ්කරතාවය මෙන්ම එමඟින් නිර්මාණය වන අනාරක්‍ෂිත සෞඛ්‍ය පරිසරය සම්බන්ධයෙන් අවධානය යොමු කරමින් ඒ වෙනුවෙන් සිය මෙහෙයුම් කාර්යයන් නොපමාව දියත් කිරීමට යොමුවිය. මෙහිදී ජලය ලබා ගැනීමට සුදුසු ප්‍රදේශ නොමැති වීම හේතුවෙන් නළ ළිං මාර්ගයෙන් ජලය සැපයීමේ ව්‍යාපෘතියක් ක්‍රියාත්මක කිරීමට යොමුවිය. මෙයට සමගාමීව ජල නළ පද්ධතිය සහ සනීපාරක්‍ෂක පහසුකම් වර්ධනය කිරීමේ කාර්යය සඳහාද සිය දායකත්වය ලබාදුන් මනුසත්කාර මෙහෙයුම, ආයතනික සාමාජික සාමාජිකාවන්ගේ පූර්ණ සැලසුම් සහ මැදිහත් කාර්යයෙන් මෙය දියත් කිරීමද සුවිශේෂී කරුණකි.