මේ දවස්වල රූපවාහිනී නාළිකාවක ධරණි නමින් ටෙලිනාට්යයක් විකාශ වෙනවා. ඒ අතර ධරණි නමින් නුදුරු දිනයකදී තවත් ටෙලිනාට්යයක් තවත් රූපවාහිනී නාලිකාවක විකාශය වීමට සූදානම්. ඉතින් එකම නමක් ටෙලිනාට්ය දෙකක් සඳහා යෙදීම ගැන කට කතාවක් පැතිරගෙන යන නිසා මේ ධරණි ටෙලිනාට්ය දෙකේම අධ්යක්ෂවරුන් ලෙස කටයුතු කරන නිරෝෂන් ඉලේපෙරුම සහ ශියන්ත ප්රසාද් රත්නායක නිර්මාණකරුවන් දෙදෙනා සමඟ කෙටි කතා බහක් සඳහා අප සම්බන්ධ කරගත්තේ මේ පටලැවිල්ලේ ඇත්ත නැත්ත ඔබට කියන්නටයි.
නිරෝෂන් ඔබ අධ්යක්ෂණය කළ ‘ධරණි’ ටෙලිනාට්යයේ නම යොදාගෙන ‘ධරණි’ නමින්. තවත් නාට්යයක් විකාශය වෙනවා ඇත්තද මේ කතාව?
ඔව්. ‘ධරණි’ ටෙලිනාට්ය අධ්යක්ෂණය කළේ මම 2016 වසරේ. ශාන්ති දිසානායකගේ නවකතාව ඇසුරෙන් තමයි මම ටෙලිනාට්ය නිර්මාණය කළේ. මගේ ‘ධරණි’ ටෙලිනාට්යය විකාශය වීමටත් පෙර ෂෝෂල් මීඩියා පුවත්පත් හරහා මගේ නාට්යයට ලොකු ප්රචාරයක් දුන්නා. ඒ නිසා තමයි ගොඩදෙනෙක් දැනගත්තේ ‘ධරණි’ ටෙලිනාට්යය මගේ කියලා. හැබැයි කතා දෙකම එකිනෙකට වෙනස්.
දෙරණ රූපවාහිනියේ ‘ධරණි’ විකාශය වීමට යන බව ඔබ දැනගත්තේ කොහොමද?
මගේ හිතවත් මිතුරන් කතාබහා කරලා ඇහුවා ‘ධරණි’ ටෙලිනාට්ය දෙරණ නාළිකාවට දුන්නද කියලා. එවිට මම නැහැ කිව්වා. එතකො තමයි කිව්වේ ‘ධරණි’ කියලා ටෙලිනාට්යයක් විකාශය වීමට සූදානම් කියලා.
ඔබ මෙය ගැන අදාළ බලධාරීන්ගෙන් විමසීමක් කළාද?
ඔව්. මමත් නිෂ්පාදකත් එකතුවෙලා දෙරණ රූපවාහිනී නාළිකාවේ සභාපති ලක්සිරි වික්රමරත්න අධ්යක්ෂතුමන් සමඟ කතාබහ කළා. ‘ධරණි’ නමින් මමත් ටෙලිනාට්යයක් අධ්යක්ෂණය කරලා තියෙන්නේ. සියලුම රූගත කිරීම් වැඩකටයුතු අවසන් කරලා තියෙන්නේ කියලා. අපට කනගාටුව පළකරා ඒ නමින් ටෙලිනාට්යයක් දෙරණ නාළිකාවේ විකාශය වෙන එක ගැන. එතැනින් එහාට මොනවත් අපි කතා කරන්න ගියේ නැහැ.
ඔබේ ‘ධරණි’ ටෙලිනාට්ය විකාශය වීමට සූදානම්ද?
ඔව්. මෙයට කලින් මගේ නිර්මාණය විකාශය වෙලා. ඒත් මූල්ය ප්රශ්න ටිකක් මතු වුණු නිසා ඒ කාලවල නිෂ්පාදකතුමන් විකාශය කිරීමට කැමැති වුණේ නැහැ. මේ වසර අවසානයේ ජාතික රූපවාහිනියේ ‘ධරණි’ ටෙලිනාට්ය විකාශ වෙනවා.
ඒ කියන්නේ ‘ධරණි’ නමින්ද ටෙලිනාට්ය විකාශය වෙන්නේ?
එය ගැන සාකච්ඡා කරගෙන යනවා. ගොඩදෙනෙක් විවිධ අදහස් පළකළා. එක නම වුණාට කතාවන් දෙකක් නිසා ප්රශ්නයක් වෙන්නේ නැහැ. සමහරු කිව්වේ පොතේ කවරේ නම වැඩක් නැහැ පොත ඇතුළේ තියෙන කතාවයි වැදගත් කියලා. ඉතින් මගේ ‘ධරණි’ ටෙලිනාට්ය ගොඩදෙනෙක් වැලැඳ ගන්න බව මම විශ්වාස කරනවා.
—————————————————————————————
‘ධරණි’ට ලැබනෙ ප්රතිචාර කොහොමද?
ප්රතිචාර නම් සෑහෙන දුරට හොඳයි. රේටින් අතරත් ඉහළම තැනකට ඇවිත තිබෙනවා. පවුල් පසුබිම් මූලාශ්ර කරගෙන යන කතාවක්. විවිධ බාධක කම්කටොලු මැද විවිධ පැතිකඩවලට ‘ධරණි’ කතාව ගලා ගෙන යනවා.
අනෙකුත් මෙගා නාට්ය වගේ පැල්බැඳගෙන විකාශය වෙයිද?
එහෙම වෙන්නේ නැහැ. කතාවට සුදුසු විදියට, ගැළපෙන විදියට කෙටි කාලයක් තුළ කතාව අවසන් වෙයි.
බොහෝ දෙනෙක් චෝදනා නඟනවා ‘ධරණි’ වෙනත් ටෙලිනාට්යයක නමක් උපුටා ගැනීමක් කියලා. ඇත්තද මේ කතාව?
එහෙම දැනුවත්ව කරපු වැඩක් නෙවේ. මම දැනගෙන හිටියේ නැහැ ‘ධරණි’ නමින් ටෙලිනාට්යයක් කරලා තිබෙන බව. ටෙලිනාට්ය විකාශය වන කාල වකවානුවේ එහි රඟපාපු ශිල්පීන් තමයි මට කතා කරලා කිව්වේ ‘ධරණි’ නමින් ටෙලිනාට්යයක් කරලා තිබෙන බව. අපි ඒ වෙනකොට ටෙලිනාට්යයේ සියලුම ප්රචාරක කටයුතු සිදුකරලා තිබුණේ. ඉතින් ආපසු නම වෙනස් කිරීමට අපට අපහසු නිසා ඒ නමින් ටෙලිනාට්යය විකාශ වුණා. දෙරණ රූපවාහිනී නාලිකාවේ සභාපතිතුමන් ඇතුළු අධ්යක්ෂ මණ්ඩල සමඟ කතාබහ කරලා තමයි තීරණය කළේ.
එකම නමින් ටෙලිනාට්ය දෙකක් විකාශය වීමෙන් ටෙලිනාට්ය දෙකටම හානි සිදුවෙයිද?
එකම නම වුණාට කතා දෙකක් නිසා ප්රශ්නයක් වෙන්නේ නැහැ. මාර්කටින්වලදී තමයි ප්රශ්න මතු වෙන්නේ. අපේම ක්ෂේත්රයේ එකට වැඩ කරන පිරිසකට මම කවදාවත් එහෙම කරන්නේ නැහැ. කතා කරපු අයගෙන් පවා මම සමාව ඉල්ලුවා.
වසන්ත විතාරණගේ
