HNB FINANCE පොළොන්නරුව ශාඛාවේ 16 වැනි සංවත්සරයේදී පරිසර පවිත්‍රතාවට මුල්තැනක්

HNB FINANCE පොළොන්නරුව ශාඛාවේ 16වැනි සංවත්සරයට සමගාමීව පරාක්‍රම සමුද්‍රයේ වැව් බැම්ම සහ ඒ ආශ්‍රිත වටපිටාව පිරිසිදු කිරීමේ වැඩසටහනක් ක්‍රියාවට නැංවීමට පොළොන්නරුව ශාඛාවේ කාර්ය මණ්ඩලය පියවර ගන්නා ලදී. දිගු කාලයක් මුළුල්ලේ පොළොන්නරුව හා ඒ අවට ප්‍රජාවගේ සියලු මූල්‍ය අවශ්‍යතා සපුරාලමින් වඩාත් විශ්වාසවන්ත සේවාවක් ලබාදෙන පොළොන්නරුව ශාඛාව මෙම සමාජ සද්කාර්ය ශාඛාවේ සේවක සේවිකාවන්ගේ සහභාගිත්වයෙන් සිදුකරන ලදී.

දෙස් විදෙස් සංචාරකයින්ගේ ආකර්ෂණය දිනාගත් පරාක්‍රම සමුද්‍රය හා එහි වැව් තාවුල්ල මේ නිසාම කැලි කසළ එක් රැස්වන ස්ථානයක් බවටද පත්ව ඇත. පොළොන්නරුවේ පළාත් පාලන ආයතනයන් විසින් නිසි ලෙස කසළ බැහැර කිරීම සඳහා අවශ්‍ය පහසුකම් සම්පාදනය කර තිබුණද සංචාරකයින්ගේ සහ මෙහි පැමිණෙන ජනතාවගේ නොසැලකිලිමත් බව හේතුවෙන් වැව් බැම්ම ඇතුළු පරිශ්‍රය නිතර කැලිකසළවලින් පිරී යයි. ශ්‍රී ලංකාවට පමණක් නොව මුළු ලොවටම උරුමයක් වූ පරාක්‍රම සමුද්‍රය රැක ගැනීමේ කාලීන අවශ්‍යතාව පෙරදැරි කරගනිමින් HNB FINANCE පොළොන්නරුව ශාඛාව පරාක්‍රම සමූද්‍රයේ වැව් බැම්ම සහ වැව් තාවුල්ල පරිශ්‍රයේ රැඳී තිබුණු කැලිකසළ මුළුමනින්ම ඉවත් කොට මෙම පරිශ්‍රයන් පිරිසිදුව තබා ගැනීමට අවශ්‍ය පියවර ගන්නා ලදී. මේ සඳහා පොළොන්නරුව නගරයේ පළාත්පාලන ආයතනයන්ගේ සහාය ද ඔවුන්ට හිමි විය.