කිරි දානයක වැඩි ප්‍රතිඵල ලබාගන්න

ජීවිතයට සෞභාග්‍ය උදාකරමින් සියලු වස් දොස් දුරු කරමින් සශ්‍රීකත්වය වර්ධනය කෙරෙන උතුම් වූ කිරි අම්මාවරුන්ගේ දානය පත්තිනි මෑණියන් උදෙසා පහත ආකාරයට පැවැත් වීමේන් ඔබත් මහැඟි ආනිශංස ලබා ගන්න. පුරාණයේ සිට අප හෙළ සංස්කෘතියේ සුවිශේෂ සලකුණක් ලෙසින් හැඳින්වෙන පත්තිනි දේවිය මුල්කර ගනිමින් සිංහල බෞද්ධ නිවෙස්වල පැවැත්වෙන පිරිසිදු හා උතුම්ම පූජා විධියක් ලෙස උතුම් වූ කිරි අම්මාවරුන්ගේ දානය හඳුන්වනු ලබනවා. දානයේ ආනිශංස අතිමහත්ය.

මේ තුළින් අප සංස්කෘතියේ අභිමානය කියාපානු ලබනවා. විවිධ වූ අපල උපද්‍රවයන්, ලෙඩ රෝග, ව්‍යාධි, කරදර බාධා, රැකී රක්ෂා හා විවාහ බාධා, දරුඵල ගැටලු මෙන්ම ජීවිතයේ අනේක විධ වූ ගැටලු දුරු කර ගැනීමවස් අප බොහෝ සිංහල බෞද්ධ ජනතාව පත්තිනි දේවියට බාර හාර වීමෙන් අනතුරුව අදාළ කාල සීමාව තුළ එම පොරොන්දුව ඉටු කිරීම සඳහා පැවැත්වෙන ඉතා විශේෂ මෙන්ම අනභිභවනීය පූජා ක්‍රමයක් ලෙස කිරි අම්මාවරුන්ගේ දානය හඳුන්වා දිය හැකිය. මෙම සත් කටයුත්ත නියමාකාරයෙන් පැවැත්වීමෙන් තම තමන් බලාපොරොත්තු වන්නා වූ ප්‍රතිඵල සර්වප්‍රකාරයෙන්ම සාර්ථක කර ගැනීමේ හැකියාව පවතී.

කිරි අම්මාවරුන්ගේ දානයේදී එම උතුම් වූ පූජාව සඳහා කිරි අම්මාවරුන් තෝරා ගැනීමේදී කරුණු රාශියක් කෙරෙහි අවධානය යොමු කළ යුතුය. ඒ සඳහා තෝරා ගන්නා කාන්තාවන්,
* පතිදම් රකින සිල්වත් අය විය යුතුය.
* දිළිඳු බවින් යුතු බිලිඳුන් සිටින අය විය යුතුය.
* කුලහීන නොවන අය විය යුතුය.
* කණවැන්දුම් නොවූ ආගම දහම කෙරෙහි භක්තිමත් අය විය යුතුය.

ඉහත දැක්වූ කාරණා හත සම්පූර්ණ වූ මව් කිරි බොන බිලිඳුන් සිටින කාන්තාවන් වැඩි දෙනෙකු සහිතව කණවැන්දුම් ස්ත්‍රීන් තෝරා නෙගෙන (වයස අවුරුදු 50ට වැඩි කාන්තාවන්ගේ කණවැන්දුම්භාවය පිළිබඳ ගැටලු මතු නොවේ.) මෙම කණ්ඩායම කාන්තාවන් 7 දෙනෙකු වන සේ නිසි පරිදි තෝරා ගැනීම තුළින් මෙම උතුම් ශන්ති කර්මය සිදු කිරීමෙන් බලාපොරොත්තු වන යහපත අපට සර්වප්‍රකාරයෙන්ම ඉටු කර ගැනීමේ හැකියාව පවතී.
කිරි අම්මාවරුන්ගේ දානය සඳහා ආරාධනා කිරීමේදී පහත සඳහන් කාන්තාවන් තෝරා නොගත යුතුය.

* අනුන්ගේ ඕපා දූප සොයමින් කේලාම් කියමින් උනුන් කොටවමින් නිතර රණ්ඩු කරන සැර පරුෂ හික්මීමක් නොමැති අසංවර ස්ත්‍රීන්.
* දරුවන් නොලැබූ වඳ ස්ත්‍රීන්.
* මස් මාළු විකුණන හා ඒවා අනුභව කරන ස්ත්‍රීන්.
* අභිසාරිකාවන් හා මත්පැන් පානය කරන ස්ත්‍රීන්.
* සැමියා අකාලයේ මියගිය වැන්දඹු කාන්තාවන්.
* ලැබූ දරුවන් සියලුදෙනා මියගිය කාන්තාවන්.
* ඉතා මහලු හා දුර්වල, අසනීප සහිත හැරමිටි වාරුවෙන් ගමන් කරන අය.
* සුවකළ නොහැකි කුෂ්ට රෝගයන්ගෙන් පෙළෙන අය.
* දෙනෙත් අන්ධ හා බිහිරි අය.
* උපතින් හෝ පසුව අත් පා බිඳීම් ආදියෙන් අංගවිකල වූ අය.
* අංශභාග හෝ අපස්මාර රෝගී වූවන්.

පත්තිනි දේවිය දොළොස් වාරයක් හා සත්වාරයක් මොලොව පහළ වී ඇති බව ජනප්‍රවාදයේ සඳහන්ය. ඒ අනුව සත් වාරයක් මොලොව පහළ වූ ආකාරයට අනුව සිද්ධපත්තිනි, සළඹපත්තිනි, අඹපත්තිනි, මල් පත්තිනි, ගිනිපත්තිනි, දේවපත්තිනි, සත් පත්තිනි යන පත්තිනි මාතාවන්ගේ නම් හත වෙනුවට අම්මාවරු 7 දෙනෙකු මෙම දානය සඳහා සහභාගි කර ගනී. කිරිබත් කැවුම් කිරියා හා කෙසෙල් ගෙඩි ඇතුළු තවත් රස කැවිලි වර්ග ප්‍රධාන කොට ගනිමින් සෙනසුරාදා හෝ බදාදා යන දින මූලික කොට ගනිමින් ඔබත් වසරකට වරක්වත් තම නිවෙසේදී හිමිදිරි උදෑසන මෙම දානය පැවැත්වීම තුළින් මහඟු ප්‍රතිඵල උදා කර ගන්න.
ජ්‍යොතිෂවේදී සම්පත් එස්. කල්පගේ