සිසු දරුවන්ගේ මනසට කලාත්මක රසවින්දනයක් එකතු කරමින්, ඔවුන්ට කලාවට පිවිසීමට දොර විවර කරන ඇය ගුරුවරියක්. මේ දිනවල ටෙලිනාට්ය කිහිපයකින් විවිධ චරිත හරහා ඔබට සමීප වන සිළුමිණි අලගියවන්න රංගන ශිල්පිනිය සමග කෙටි කතාබහකට අපි මෙලෙස ඇය සමග සම්බන්ධ වුණා.Sri Lanka Latest News
කාලයක් ඔබ නිහඬව ඉඳලා ප්රේක්ෂකයන් අතරට නැවත ඇවිත්?
පාසල් අවධියේ ඉඳලා කලාවට පුදුම ආශාවක් තිබුණේ. එදා ඉඳලා කලාවේ රැඳී සිටීමට නොහැකි වීම ගැන මම අදටත් දුක් වෙනවා. මම ගුරුවරියක් ලෙස උපරිම කැපවුණා. ඒ වගේම මම බිරිඳක් නිසා සහ පවුලේ වැඩකටයුතු නිසා මට කලාව වෙනුවෙන් ලොකු කාලයක් යොදවන්න අපහසු වුණා. දැන් මට එහෙම ලොකු ප්රශ්නයක් නැහැ. මගේ පුතා ලොකු ඉලන්දාරියෙක්. පුතා තමයි මාව කලා කටයුතු සඳහා සම්බන්ධ කරන්න උනන්දු කරන්නේ. ඒ වගේම මගේ පවුලේ මවුපියන්, සහෝදර පිරිසගෙන් මට ලොකු සහායක් ලැබෙනවා. ගුරු වෘත්තියේ නිරත වෙන ගමන් මම කලාවට සම්බන්ධ වෙනවා. මේ වනවිට මම බොරැල්ල සී.ඩබ්.ඩබ්. කන්නන්ගර විද්යාලයේ නාට්ය හා රංග කලා ගුරුවරියක් ලෙස කටයුතු කරනවා.
සිළුමිණිගේ මේ දිනවල කලා කටයුතු මොනවද?
මේ දිනවල ‘සින්ටෝ’ ටෙලිනාට්යයේ කුල්වාන්ගේ අක්කා ලෙසට රඟපානවා. ඒ වගේම ‘සිහිනෙක තනිවෙලා’ ටෙලිනාට්යයේ ‘යමුනා’ චරිතය රඟපානවා. මේ චරිත දෙකටම ප්රේක්ෂකයන් ගොඩක් ආදරය කරනවා. ‘කොටු’ ටෙලිනාට්යයටත් මට හොඳ ප්රේක්ෂක ආදරයක් ලැබුණා.
කොටු පැනිල්ලේ තවම අවසානයක් නැහැ නේද?
‘කොටු’ ටෙලිනාට්යය හරහා මාව ප්රේක්ෂකයන් අතරට ගියේ සිළු චරිතය හරහා. ටෙලිනාට්යයේ කොටුව නම් පැනලා ඉවරයි. දැන් ඉතින් සිනමාවෙත් කොටුවක් පනින්න තමයි මේ දිනවල සූදානම. ‘කොටු’ චිත්රපටයේ රූගත කිරීම් එක්ක තමයි මේ දිනවල මම කාලය ගතකරන්නේ. මම හිතනවා ‘කොටු’ ටෙලිනාට්යය වගේම ‘කොටු’ චිත්රපටයත් ප්රේක්ෂකයන් අතර ජනප්රිය වේවි කියලා.
සමාජයේ කොටු ගැන විවිධ ආකල්ප තියෙනවා නේද?
ඔව්. සමාජයේ කොටු පැනිල්ල ඉතා බහුලව සිදුවෙන දෙයක්. ඒ තුළින් කැත වචනයක් විදියට ‘කොටු’ පාවිච්චි කරනවා. හැබැයි අසංක සායක්කාරගේ කොටු නිර්මාණය ඉතා කලාත්මක ඇහැකින් සැකසෙන නිර්මාණයක්. ඔහු වේදිකාවට කොටු ගෙනවා. ටෙලිනාට්ය හරහාත් කොටු නමින් ජනප්රිය ටෙලිනාට්යයක් නිර්මාණය කළා. ඔහු දැන් සූදානම චිත්රපටයක් කරන්න. වෙන කෙනෙක් කොටු වැරැදි විදියට වුණත් නිර්මාණය කරන්න පුළුවන්. ප්රේක්ෂකයන්ට කුතුහලයක් ආපු නිසාමයි කොටු නිර්මාණය ගැන බලන්නට පෙලඹවීමක් ඇති වුණේ. අසංක සායක්කාර ඉතා නිර්මාණශීලී දක්ෂ අධ්යක්ෂවරයෙක් ලෙසයි මම දකින්නේ.
සිළුමිණි පාසල් කාලයේදීමද කලාව හඳුනාගත්තේ?
මගේ ගම්පළාත වැලිමඩ, මැදවෙල ප්රදේශය. මගේ මවුපියන් දෙන්නම ගුරුවරු. මගේ තාත්තා කලාවට ගොඩක් සමීප කෙනෙක්. බණ්ඩාරවෙල විශාකා බාලිකා විද්යාලයට තමයි මම මුලින්ම ගියේ. පසුව උසස් අධ්යාපනය සඳහා බණ්ඩාරවෙල මධ්ය මහා විද්යාලයට ගියා. පාසලේ බාහිර ක්රියාකාරකම් සඳහා මම ලොකු උනන්දුවක් දක්වපු කෙනෙක්. පාසල් සමස්ත ලංකා නාට්ය තරගවලින් මම ජයග්රහණ ලබාගත්තා.
‘රොමියෝ ජුලියට්’ ඔබේ කලා දිවියේ මැජික් එකක් වුණා?
ජයනාත් බණ්ඩාර අයියා හරහා තමයි මට මේ අවස්ථාව ලැබුණේ. රොමියෝගේ මව විදියට මම තවමත් රොමියෝ ජුලියට් වේදිකා නාට්යයේ රඟපානවා. ඔහු සහ තිමිර උඩලමත්තගේ ‘සංසාරණී’ මම රංගනයෙන් දායක වුණු පළමු ටෙලිනාට්යය. කැමරාව ඉදිරියේ රඟපෑම ගැන මට ලොකු අවබෝධයක් තිබුණේ නැහැ. ඉතින් මට ඒ ගැන වැඩිදුර හැදෑරීමට මගේ වයස නොබලා මම අසංක සායක්කාරගේ රංගන වැඩමුළුවට සම්බන්ධ වුණා. ඉතින් මේ තුන්දෙනාගෙන්ම ලැබුණු සහායත් එක්ක තමයි මට අද මේ තැනට නැවත එන්න ලැබුණේ. ‘රොමියෝ ජුලියට්’ වේදිකා නාට්යය මට මැජික් එකක් වගේ තමයි.
අවසානයේ ‘සේරම හරිගියා’. ඒ ගැන ඔබට මොනවද කියන්න තියෙන්නේ?
2025 රාජ්ය සේවක නාට්ය උළෙලේ ‘සේරම හරියයි’ මගේ තිර රචනයක්. මගේම අධ්යක්ෂණය තුළින් මම තනියම ‘සේරම හරියයි’ නාට්යයේ රඟපෑවා. මට එය විශේෂ මතකයක්. ඒ හරහා ඒ තරගාවලියේ ජූරියේ විශේෂ ඇගයීම් සම්මානයක් මගේ රංගනය වෙනුවෙන් ලැබුණා.
වසන්ත විතාරණගේ
