සෞරග්රහ මණ්ඩලයේ රජු ලෙස සලකන රවි ග්රහයා 2026 පෙබරවාරි මස 13 වැනිදා කුම්භ රාශියට පිවිසෙන්නේ ලග්න 12 ටම සුවිශේෂී බලපෑමක් එල්ල කරමිනි. වසරකට වරක් සිදුවන මෙම රවිගේ කුම්භ රාශි ගමනය, මෙවර අනෙක් ග්රහයන්ගේ පිහිටීම අනුව ඇතැම් ලග්න හිමියන්ට අතිශය සුබපල ගෙන දෙන ”රාජ යෝග” නිර්මාණය වන බව පෙනෙන්නට තිබේ. ඔබේ ලග්නයට අනුව ඉදිරි කාලය කෙබඳු වේදැයි සිදුකළ විස්තරාත්මක විග්රහයයි මේ.
මේෂ ලග්නය
සතුරු කරදරවලට තිත
මේෂ ලග්නයෙන් උපන් ඔබට මේ දිනවල ලග්නාධිපති කුජ දසවැන්නේ උච්චව සිටීමත්, පෙබරවාරි 13 වැනිදා රවි ඔබේ අයස්ථානය හෙවත් 11 වැන්නට පැමිණීමත් ඉතා හොඳ වාසනාවකි. පහුගිය කාලයේ රැකියාවල තිබුණු ගැටලු සහ සතුරු කරදර මෙතෙකින් අවසන් වේ. ඔබ රැකියාවක් නැතිව සිටි කෙනෙක් නම්, නියම අවස්ථාවක් මේ දිනවල පෑදෙනු ඇත. විශේෂයෙන්ම සමාජයෙන් සහ යාළුවන්ගෙන් ලැබෙන උදව් ප්රතික්ෂේප නොකරන්න, මන්ද ඔබේ ඉදිරි ගමනට පාර කැපෙන්නේ ඒ හරහාය.
වෘෂභ ලග්නය
රාජ්ය අංශයෙන් උසස්වීමක්
වෘෂභ ලග්න හිමියන්ගේ කර්මස්ථානය හෙවත් 10 වැන්නට රවි පැමිණෙන්නේ ‘දික් බල’ ශක්තියත් රැගෙනය. ඔබ රජයේ රස්සාවක් කරන කෙනෙක් නම්, උසස්වීම් හෝ බලාපොරොත්තු වුණු ස්ථාන මාරු මේ කාලයේ ලැබීමට ඉඩ වැඩිය. යාන වාහන හීන සැබෑ කරගන්න අවශ්ය උනන්දුව රවිගෙන් ඔබට ලැබෙන අතර, විදේශගත වීමට බලාපොරොත්තුවෙන් සිටී නම් ඒ සඳහා පාර කැපෙන හොඳම කාලය මෙයයි.
මිථුන ලග්නය
පෙර පින මතු වන යෝගයක්
මිථුන ලග්න හිමියන්ගේ නමවැන්න හෙවත් පූර්ව පුණ්යස්ථානයට රවි පැමිණ බුධ සමඟ එක්වී ‘බුධාදිත්ය යෝගය’ නිර්මාණය කරයි. මෙය පියාගෙන් උදව් උපකාර ලැබෙන, වන්දනා ගමන් යෙදෙන සහ අධ්යාත්මික සුවය ලැබෙන කාලයකි. විදේශිකයන්ගෙන් ලැබෙන ආධාර නිසා ඔබේ ආර්ථිකය ශක්තිමත් වනු ඇත. කෙසේ වෙතත් නමවැන්නේ රාහුත් සිටින බැවින් පලක් නැති ගමන් බිමන් ගොස් ශරීරය මහන්සි කරගැනීමෙන් වළකින්න.
කටක ලග්නය
අටවැන්නේ රවි – කල්පනාවෙන්!
කටක ලග්න හිමියන්ට නම් මේ මාරුව ටිකක් බරපතළය. රවි පැමිණෙන්නේ ඔබේ අටවැන්නට බැවින් හදිසි ලෙඩ රෝග, විශේෂයෙන්ම අස්ථි සම්බන්ධ ගැටලු මතු විය හැකිය. සතුරන්ගේ බලවේග ක්රියාත්මක වීමට ඉඩ ඇති බැවින් පෙබරවාරි 13න් පස්සේ ටිකක් ඉවසීමෙන් සහ බුද්ධිමත්ව වැඩ කරන්න. රිය පදවන විට වෙනදාට වඩා අවධානයෙන් සිටීම ඔබේ ආරක්ෂාවට හේතු වනු ඇත.
සිංහ ලග්නය
පවුලේ අවුල් ඉවරයි
සිංහ ලග්නයෙන් උපන් ඔබේ ලග්නාධිපති රවි හත්වැන්නට පැමිණීමත් සමඟ පවුල් ජීවිතයේ තිබුණු ගැටලු බොහොමයක් විසඳී යනු ඇත. දරුවන්ගේ අනාගතය වෙනුවෙන් හොඳ තීරණ ගැනීමටත්, හවුල් ව්යාපාර දියුණු කිරීමටත් මෙය සුබ කාලයකි. එහෙත් ලග්නාධිපති හත්වැන්නේ සිටින විට ඔබ ගැන පමණක් සිතන ආත්මාර්ථකාමී ගතියක් මතු විය හැකි බැවින්, අන් අය කෙරෙහි දක්වන ආදරය සහ කැපවීම අඩු නොකිරීමට වගබලා ගන්න.
කන්යා ලග්නය
බුද්ධියෙන් ගොඩ යමු
කන්යා ලග්න හිමියන්ගේ හයවැන්නට රවි ඇතුළු ග්රහයන් හතර දෙනෙක්ම ඒකරාශී වේ. මේ හේතුවෙන් රැකියා ස්ථානයේ කුමන්ත්රණ සහ සතුරු බලවේග වැඩි විය හැකිය. මානසික පීඩනය පාලනය කරගනිමින් බුද්ධිමත්ව වැඩ කළ යුතු අතර, විවාහ ජීවිතයේ ඇති විය හැකි සුළු සුළු කටකතා සහ ප්රශ්න හමුවේ ඉවසීමෙන් කටයුතු කිරීම අත්යවශ්ය වේ.
තුලා ලග්නය
ලොතරැයි වාසනා, ධන ලාභ
තුලා ලග්න හිමියන්ට මෙය ඉතාමත් සුබ කාලයකි. ඔබේ පස්වැන්නට රවි පැමිණීම නිසා දරු සම්පත් බලාපොරොත්තු වන අයට සුබ ආරංචි ලැබෙන අතර, ලොතරැයි ජයග්රහණ වැනි හදිසි ධන ලාභවලට ලොකු ඉඩක් පවතී. පහුගිය කාලයේ තිබුණු මානසික පීඩනය ඉවර වී ඇඟට ලොකු ශක්තියක් දැනෙන මේ කාලය ඔබේ දියුණුවට උපරිමයෙන් පාවිච්චි කරන්න.
වෘශ්චික ලග්නය
දේපළ වාසනාව දොරකඩටම
වෘශ්චික ලග්න හිමියන්ගේ හතරවැන්නට රවි පැමිණීමත් සමඟ දේපළ වාසනාව මතු වේ. අලුතින් නිවසක් ගැනීමට, ඉඩමක් මිලදී ගැනීමට හෝ තිබෙන නිවස අලුත්වැඩියා කිරීමට අවස්ථාව ලැබෙනු ඇත. රැකියාවේ තිබුණු බාධා කුජගේ බලයෙන් ජයගන්න පුළුවන් වුවත්, කේතු දහවැන්නේ සිටින බැවින් රැකියාව සම්බන්ධ තීරණ ගැනීමේදී මඳක් විමසිලිමත් වන්න.
ධනු ලග්නය
වචනය රජ කරවන කාලය
ධනු ලග්න හිමියන්ගේ වික්රමස්ථානය හෙවත් තුන්වැන්නට රවි පැමිණීම නිසා ඔබේ පෞරුෂය සහ නායකත්ව හැකියාව ඉහළ යනු ඇත. ඔබ කියන දේට අන් අය අවනත වන අතර, අභියෝග හමුවේ නොසැලී සිටීමට රවිගෙන් ලොකු ශක්තියක් ලැබේ. කේන්තිය පාලනය කරගෙන සැමට ඇහුම්කම් දෙන නියම නායකයෙක් වීමට මින් මඟ පෑදේ.
මකර ලග්නය
ශනි අපලය ඉවරයි
මකර ලග්න හිමියන්ට දැන් ඇත්තේ වසර හතහමාරක කටුක කාලයකින් පසු නිදහසේ හුස්ම ගන්නා කාලයකි. රවි ඔබේ දෙවැන්නට පැමිණීම ආර්ථිකයට ගොඩක් හොඳය. පහුගිය කාලයේ තිබුණු නීතිමය ප්රශ්න සහ මුදල් ගැටලු විසඳී ධනය රැස් කිරීමට අවස්ථාව උදා වේ. විවාහයෙන් පසු ජීවිතය සාර්ථක කරගන්නටත් මෙය කදිම අවස්ථාවකි.
කුම්භ ලග්නය
මහා පෙරළියක්
කුම්භ ලග්න හිමියන්ගේ ලග්නයටම රවි පැමිණීම නිසා ඔබේ පෞරුෂය සහ ආත්ම අභිමානය ඉහළ යයි. ඒරාෂ්ටකයේ අවසාන කාලය වුවත්, රවිගේ පැමිණීමෙන් අභියෝගවලට මුහුණ දෙන්න ලොකු පන්නරයක් ලැබේ. එහෙත් ශනි දෙවැන්නේ සිටින බැවින් මුදල් කළමනාකරණය ගැන පරෙස්සම් වන්න. අධ්යාත්මික පැත්තට නැඹුරු වීමෙන් ඔබට ලැබෙන සහනය වැඩි වනු ඇත.
මීන ලග්නය
නීතියෙන් පරෙස්සම් වන්න
මීන ලග්න හිමියන්ට මේ කාලය තරමක් අභියෝගාත්මක විය හැකිය. රවි පැමිණෙන්නේ ඔබේ 12 වැන්නට බැවින් නීතිමය ප්රශ්න හෝ අනපේක්ෂිත වියදම් මතු විය හැකිය. රජයට සම්බන්ධ වැඩ කරනවා නම් ඉතාමත් පරෙස්සම් විය යුතුය. ශනි ලග්නය උඩින් ගමන් කරන බැවින් මානසික වෙහෙස සහ ශරීරයේ වෙහෙස මතු විය හැකි නිසා, ඉවසීමෙන් සහ දහමට ළැදිව මේ කාලය ගත කිරීමෙන් අපල තත්ත්වයන් මඟහරවා ගත හැකිය.
ජ්යොතිෂවේදී ඔස්මන් පෙරේරා
