වර්තමාන ශ්රී ලාංකේය රංගන ක්ෂේත්රය තුළ තමන්ටම අනන්ය වූ සලකුණක් තැබූ, ප්රේක්ෂක ආදරය නොඅඩුව දිනාගත් අපූරු රංගන ශිල්පියකු ලෙස කුසල් මධුරංග හැඳින්විය හැකිය. සරල, සුහදශීලී මෙන්ම අතිශය තාත්වික රංගන පෞරුෂයකින් හෙබි ඔහු, විශේෂයෙන්ම ටෙලිනාට්ය කලාව තුළ විවිධ වූ චරිත ඔස්සේ සිය ප්රතිභාව විදහා දැක්වූවෙකි. රංගනය යනු හුදු රංගනයක්ම නොව, එය ජීවිතය හා බද්ධ වූ කලාවක් බව පසක් කරන ඔහුගේ කලා දිවිය සහ ඉදිරි බලාපොරොත්තු පිළිබඳ ‘හාට්’ අප කළ කතාබහ මෙසේ දිගහැරේ.Sri Lanka Latest News
මේ දවස්වල වැඩකටයුතු ගැන කතා කළොත්..?
මේ දවස්වල අලුතින් අපි ටෙලිඩ්රාමා දෙකක් විතර කළා. ඊට අමතරව පාට කුරුල්ලෝ නාට්යය විකාශය වෙනවා. ඒකේ රූගතකිරීම් තියෙනවා. ඒ එක්කම අනුජ ප්රියභානු අධ්යක්ෂවරයාගේ ‘ටැක්සිකාරයා’ ටෙලිනාට්යය විකාශය වෙනවා. ඒකේ රූගතකිරීම් සිද්ධ වෙනවා. මීට අමතරව උදයසිරි වික්රමරත්න මහත්මාගේ ‘හරිම බඩු තුනක්’ වේදිකා නාට්යයත්, ඒ වගේම ධර්මප්රිය ඩයස් මහතාගේ ‘මම නෙවෙයි වෙන කෙනෙක්’ වේදිකා නාට්යයත්, චාලක රණසූරියගේ ‘සඳුදා වැටෙන්නේ සිකුරාදට’ නාට්යය සහ නිලංක නිසලාංජල්ගේ ‘අතරමැදියා’ වේදිකා නාට්යයත් වේදිකාගත වෙනවා. අයහපත් කාලගුණ තත්ත්වයන් හින්දා සමහර දර්ශන කැන්සල් වුණා.
සිහින සමාගම, බස් එකේ ඉස්කෝලේ වැනි ටෙලිනාට්යවලට සම්බන්ධ වූ ඔබ ප්රේක්ෂක ආදරය නොමඳව දිනාගත් චරිතයක් තමයි ‘පාර දිගේ’ බණ්ඩා චරිතය. කුසල්ව අද වෙනකොට බහුතරයක් දෙනා දන්නේ මංජිත විදියට..?
ඇත්තටම ‘සිහින සමාගම’ තමයි මගේ පළමුවැනි ටෙලිනාට්යය. ඊට පස්සේ ‘බස් එකේ ඉස්කෝලේ’. ‘පාර දිගේ’ නාට්යයට සෑහෙන ප්රතිචාර ලැබුණා. අදටත් ඒ චරිතෙට සෑහෙන්න ප්රතිචාර ලැබෙනවා. ඊට පස්සේ ඒ ජනප්රියතාව සහ ඒ ප්රේක්ෂකයන්ගේ ආදරය නොඅඩුව ලැබුණා ‘පාට කුරුල්ලෝ’ නාට්යයේ මංජිතට. ප්රේක්ෂක ආදරය ‘පාරදිගේ’ ටෙලිනාට්ය හරහා උපරිම තැනට ආවා. ඉතින් ‘පාට කුරුල්ලෝ’ නාට්යයත් එක්කත් ඒක නොඅඩුව රැකගන්න ලැබිච්ච එක මම භාග්යයක් විදියට සලකනවා.
දේශාන් කියන ටැක්සිකාරයා ඔබේ ජීවිතයේ තවත් නව පෙරළියක්ද?
ඔව්. ඒකටත් හොඳ ප්රතිචාර හම්බවෙනවා. ඉතින් අපි ටික කාලයකට ඉහතදී කරපු ටෙලිනාට්යයක්. දැන් විකාශය වෙන්න පටන් අරගෙන. ඒක සති අන්තයේ යන ටෙලිනාට්යයක්. සති අන්තයේ යන ටෙලිනාට්යයක් විදිහට මම පළමුවැනියටම රංගනයෙන් දායක වෙන්නේ මේ නාට්යය නිර්මාණයට. ඉතින් ඒකත් හොඳ කතා වස්තුවක්. ඇත්තටම ටැක්සි දුවන මහත්වරුන්ට ගොඩක් දේවල් ජීවිතයේ හම්බ වෙනවා. ජීවිතයේ විවිධාකාර මිනිස්සු හම්බවෙනවා. ඒ එක්ක බැඳුණු ලස්සන කතාවක් වෙයි. හොඳ ප්රේක්ෂක ප්රතිචාර ලැබෙයි කියලා බලාපොරොත්තු වෙනවා.
ඔබේ රංගනයන් තුළ චරිත තේරීම කොයි වගේද?
යම් මට්ටමකින් තෝරාබේරා ගැනීමක් සිද්ධ වෙන්න ඕනෙ නාට්යයක විතරක් නෙවෙයි ජීවිතයේ සියලු දේවල් සම්බන්ධව. ඉතින් තෝරා බේරා ගැනීමක් සිද්ධ වෙනවා යම් මට්ටමකින්. නමුත් අර අපිට හම්බවෙන දේ හරියාකාරව කරන්න පුළුවන් කණ්ඩායමක් ලැබෙන එක තමයි ප්රධානම දේ. කතාබහ කරමින් හොඳ නිර්මාණයක් එළියට ගන්න උත්සාහ දැරීමක් තමයි කරන්න ඕනේ. ඒක සාමූහික ක්රියාවක්. විවිධාකාරයේ වැඩ හම්බවෙනවා. ඒ වැඩ ඔක්කොම කරන්න බෑ. වැඩියෙන්ම ආස කරන, තමන්ට දෙයක් කරන්න පුළුවන් සහ කණ්ඩායමක් ඉන්න අවශ්යයි. එතකොට ඒ හැම දේම එක්ක කාර්යබහුලකම බලන්න ඕනේ. ඒ වැඩේට නියැළෙන්න පුළුවන් කාලය ඒ හැම දෙයක් එක්කම තමයි වැඩ තෝරාබේරා ගැනීම් සිද්ධ වෙන්නේ.
සමාජ මාධ්ය හරහා ලැබෙන ප්රතිචාර සහ විවේචන ඔබ දකින විදිය..?
ප්රතිචාර, විවේචන ලොකුවටම ගන්න තත්ත්වයක මම නැහැ. සාමාන්යයෙන් කමෙන්ට් කියවනවා පවා අඩු කෙනෙක් මම. නමුත් ඒ ලැබෙන ප්රතිචාරයට යම් විදියේ වටිනාකමක් දෙන්න කැමැතියි. අපේ හොඳ වුණත් වැඩිපුර කියන අවස්ථාවලදී ඒකත් අනවශ්ය විදියට අපේ වැඩවලට බාධා වෙන්න සහ ඒක අපේ හිත්වල පැලපදියම් වීමම අවාසිසහගත තත්ත්වයක් වෙන්නත් පුළුවන්. ගුණදොස්, හොඳ නරක විවිධ කාලවල විවිධ ස්වරූපයෙන් එනවා. ඉතින් ඒක හරියාකාරව ගන්න ඕනෙ. අටලෝදහම කියලා එකකුත් තියෙනවනේ. ඉතින් සමහර වෙලාවට හොඳ දේවල් අහන්න වෙනවා. සමහර වෙලාවට බැණුම් අහන්න වෙනවා. ඒක ඉතින් සාමාන්ය විදිය. අනවශ්ය විදියට ගන්න ඕනෙත් නෑ නොගෙන ඉන්න ඕනෙත් නැති දෙයක්.
ඔබව සිනමාව තුළ දකින්නට ලැබෙන්නෙ ඉතා අඩුවෙන්. මේ පිළිබඳ සඳහන් කළොත්?
සිනමා නිර්මාණ කිහිපයකට දායක වුණා. නමුත් හරි සිනමා නිර්මාණයක් තාම මට හම්බවෙලා නෑ ඇත්තටම. ඒ වගේම නිර්මාණ කීපයක් කළා. නමුත් තාම ඒවා තිරගත වුණෙත් නෑ. හැබැයි තාම සිනමා ප්රේක්ෂකයන්ට හොඳ බලාපොරොත්තුවක් දෙන්න බැරිවෙලා තියෙනවා. ඉතින් ඒකට නොඅඩුව ආසයි නළුවෙක් සහ නිළියක්. වේදිකාව, සිනමාව, ටෙලිනාට්යය කියන තත්ත්වයන් තුළ සිනමා නළුවෙක්, නිළියක් වෙන්න ඕනෙම කෙනෙක් කැමැතියි. මේ මොහොතේ ලංකාවේ සිනමාව ඉතාම හොඳ තැනක තියෙනවා. මේ වගේ මොහොතක ඉතින් ඇත්තටම හොඳ සිනමා නිර්මාණයක් හම්බවෙනව නම් සන්තෝසයි. නමුත් සිනමා නිර්මාණවලට ලැබුණු ඇරවුම් අඩුයි.
අවසාන වශයෙන් දැනගන්න කැමැතියි ඔබේ ඉදිරි වැඩකටයුතු ගැන?
මම හැමදාම කියන කාරණයක් තමයි ඉදිරි වැඩකටයුතු කියල ලොකු ප්ලෑන් නෑ. ලොකු ප්ලෑන්ස් තියාගෙන ජීවත් වෙන්න පුළුවන් තත්ත්වයක නැහැ ලෝක ස්වභාවය. ඉතින් ඉදිරි වැඩකටයුතු කරගෙන යන්න බලාපොරොත්තුවෙන්, ඉදිරි අවුරුද්ද මැනේජ් කරගෙන, දින කාලසටහන් හදාගෙන වැඩකට හානියක් නොවන විදිහට වැඩ කරගෙන යනවා කියන බලාපොරොත්තුව තමයි තියෙන්නේ.
අසිංසලා වීරහිංගේ
