රාවණා ටෙලි නාට්යයෙන් ප්රේක්ෂක ආදරය දිනාගත් ප්රාර්ථනා සෙව්වන්දී මේ දිනවල සංවරය, සඳලු සේයා මෙන්ම ඉරුගල් වලව්ව ටෙලිනාට්යයේ සුදු මැණිකේගේ චරිතයෙන් ප්රේක්ෂකයන් අතරට එන්න නියමිතයි. මේ අලුත් නිර්මාණත් සමග ඇගේ මේ දිනවල වැඩකටයුතු ගැන විමසා බලන්න ‘මව්රට’ ‘හාට්’ අපි ඇයව සම්බන්ධ කරගත්තා.
ආයුබෝ වේවා ප්රාර්ථනා සෙව්වන්දි…
ඔබටත් ආයුබෝවන්.
මේ දිනවල වගතුග මොනවද?
මේ දිනවල ප්රියන්ත ෆර්නෑන්ඩෝ මහත්මයා අධ්යක්ෂණය කරන සංවරය ටෙලිනාට්යය රූගත කරනවා. සංඛ ප්රසාද් සහ සංජය තුසිත මොරගල අධ්යක්ෂණය කරන සඳලු සේයා ටෙලිනාට්යයේත් රූගතකිරීම් වෙනවා. සංජය බණ්ඩාර අධ්යක්ෂණය කරන ඉරුගල් වලව්ව ටෙලිනාට්යයේ ප්රධාන චරිතයටත් රංගනයෙන් දායක වෙනවා.
ඔබ මේ තරම් ජනප්රිය වෙන්නේ රාවණා ටෙලිනාට්යය නේද?
ඔව්. ඇත්තටම රාවණා ටෙලිනාට්යයේ ප්රධාන සෙන්පතිනියගේ චරිතයෙන් තමයි මම මිනිසුන් අතරට ආවේ.
එදා ඉඳන් අද වෙනකන් ප්රාර්ථනාට ලැබෙන ප්රතිචාරය මොන වගේද?
ඇත්තටම එදා ඉඳන් අද දක්වාම ඉතාමත් හොඳ ප්රතිචාර ලැබෙනවා. මගේ සෑම නිර්මාණයකටම එක සේම ප්රේක්ෂකයන්ගේ ආදරය ලැබීම මට ලොකු සතුටක්.
මුලින්ම කැමරාවක් ඉදිරියේ රඟපානකොට දැනුණු හැඟීම කොයි වගේද?
මගේ පළමු නිර්මාණය සිද්ධාර්ථ ගෞතම රඟපාන්න යනකොට මම වයසෙනුත් පොඩියි. එදා මට බයක් ඇතිවුණා. නමුත් රජ කාලේ වස්ත්රාභරණ අන්දනකොට රඟපාන්න ආශාව ගොඩක් වැඩි වුණා. මං මාව ලස්සනට දැක්කා. නමුත් පළවෙනි දර්ශනය ගන්නකොට ඇස්වල කඳුළු පිරිලා චකිතයක් බයක් ඇති වුණා. නමුත් කෲ එකේ සහයෝගය ආදරණීය බව එක්ක ඒ බය නැති වුණා.
රජ කතා ගැමි කතා වගේ චරිතවලින් මිදිලා වෙනස්ම චරිතයක් කරන්න ඔබේ කැමැත්තක් නැද්ද?
ඇත්තටම මම රජ කතා වගේ පෞරාණික තලයේ නිර්මාණ, ගැමි නිර්මාණවලට රංගනයෙන් දායක වෙලා තියෙනවා. මං හිතන්නේ මගේ පෙනුම සහ උස නිසා ගොඩක් වෙලාවට රජ කාලේ කතාවලට ආරාධනා ලැබෙනවා. නපුරු, මුරණ්ඩු, හිතුවක්කාර චරිතයකින් ප්රේක්ෂකයාට ඉදිරියේදී මාව දැකගන්න පුළුවන් වේවි. අනික මම සෑම නිර්මාණයක්ම භාරගන්නේ නෑ. අනවශ්ය ලෙස ජනප්රිය වීමට කැමැත්තක් නෑ. ඒ නිසා මගේ ප්රතිපත්තීන් සීමාවන් තුළ ඉඳලා ලැබෙන නිර්මාණ භාරගන්නවා.
ඔබ නිර්මාණයකදී සලකාබලන සීමාවන් මොනවද?
මම ප්රතිපත්තියක් විදියට සිපගැනීමේ, වැලඳ ගැනීමේ හෝ නිරුවත් දර්ශන භාරගන්නේ නෑ. මේ නිසාම මම සීමාවුණු චරිත පමණක් තෝරාගන්නා බවට ක්ෂේත්රයේ අය චෝදනාවකුත් කරනවා. මං හිතනවා මේ සීමාවන් තුළ ඉඳලා ලැබෙන ඕනෑම චරිතයකට මට සාධාරණයක් කරන්න පුළුවන් කියලා. ඇත්තටම මගේ ප්රතිපත්ති නිසාම බොහෝ නිර්මාණවල ප්රධාන චරිත පවා මට අහිමි වෙලා තියෙනවා.
ඔබට සිනමා නිර්මාණයකට ආරාධනා ලැබුණොත් භාරගන්නවද?
සිනමා නිර්මාණයකට ආරාධනා ලැබිලා තියෙන්නේ. එයත් සාකච්ඡා මට්ටමෙන් තමයි තියෙන්නේ. කලින් කිව්වා වගේ සිනමාවෙදි වුණත් මගේ සීමාවන්වල ඉඳලා කරන නිර්මාණ පමණයි මම භාරගන්නේ.
රංගන ක්ෂේත්රයේදී ඔබට මුහුණ දෙන්න ලැබුණු ලොකුම අභියෝග මොකක්ද?
මම 2019 ආරම්භ කරපු ගමන ඉතාමත් හෙමීට තමයි මේ දක්වා ආවේ. මගේ ලොකුම අභියෝගය මගේ සීමාවන් ප්රතිපත්ති ඇතුළේ චරිත තෝරාගැනීම. ගෙදරින් මට ලොකු සහයෝගයක් තිබෙනවා. මම ඉන්න සීමාවන්වල නිසාම මට තාම අනවශ්ය විදියට ගොසිප් හැදිලා නෑ. මම අනිත් අයටත් කියන්නේ සීමාවන් ඇතුළෙ වුණත් ක්ෂේත්රයේ හෙමින් ගමනක් ගියාට කමක් නෑ, අපි හරි ගමනක් යනවා නම්.
ඔබේ ඉදිරි බලාපොරොත්තු මොනවාද?
මම පොඩි තැන ඉඳලා ගමනක් ආපු කෙනෙක්. මම වෙනස් නොවී මගේ ප්රතිරූපයේ වෙනසක් කර නොගනිමින් අඩුපාඩු හදාගෙන හැමෝටම මතක හිටින රංගන ශිල්පිනියක් වීම තමයි මගේ බලාපොරොත්තුව.
රසාංජලී වාසල
