පුංචි තිරයේත්, සිනමාවේත් සුවිශේෂ දස්කම් දක්වන ජනප්රිය චිත්රපට සහ ටෙලිනාට්ය අධ්යක්ෂ හර්ෂ උඩකන්දගේ නවතම ටෙලි නිර්මාණය වන ‘මං ආදරෙයි’ ගැන කතාකරන්න අපි ඔහුව සම්බන්ධ කරගත්තා.Sri Lanka Latest News
හර්ෂ මොකක්ද මේ අලුත් ආදර පලහිලව්ව?
මගේ නවතම ටෙලිනාට්යය ‘මං ආදරෙයි’ මගේ ආදරණීය ප්රේක්ෂක ජනතාවට දැන් ඉතින් භාරයි. මම හැමෝටම ආදරෙයි. හැබැයි මම මේ දවස්වල නම් හදවතින්ම බැඳිලා ඉන්නේ ‘මං ආදරෙයි’ ටෙලිනාට්යයට. 27 වැනිදා සිට සතියේ දිනවල රාත්රී 9.30ට දෙරණ රූපවාහිනියෙන් එය රසවිඳින්න කියලා මම ආරාධනා කරනවා.
පාසල් ප්රේම කතාවක් විදියට අපි මෙය දකිනවා. ඒ ගැන සඳහන් කළොත්?
පාසල් අවධිය තේමා කරගෙන ගොඩනැගුණු තුන්කොන් ආදරණීය ප්රේම කතාවක් විදියට තමයි ‘මං ආදරෙයි’ ගලාගෙන යන්නේ. පාසල් අවධියේ අපි හැමෝටම ආදරණීය ප්රේම කතා තියෙනවා. ඒ පාසල් ප්රේමය සරලවම කිව්වොත් හරිම පිරිසුදු ආදරයක්. පාසල් ආදරයෙන් ගොඩනැගුණු ප්රේමයක් විවාහයක් දක්වා ඇවිත් පවුලක් විදියට ගොඩනැගෙනවා කියන්නේ ඒ ආදරය හරිම වාසනාවන්ත ආදර කතාවක් විදියට මම දකිනවා.
එතකොට හර්ෂගේ පාසල් ආදර කතාවක්ද ‘මං ආදරෙයි’ විදියට අපි දකින්නේ?
මේ කතා තේමාව මගේ. මගේ සහායට අහිංසා නිල්මිණී ඉන්නවා. අපි දෙන්නා එකතු වෙලා තමයි මෙය තිර රචනා කරන්නේ. මම ලබපු විඳපු සුන්දර අත්දැකීමක් පවා එකතු කරගෙන ලියන්නේ. මේ ආදර කතාව හරහා අපි හැමෝම ඒ ගෙවපු පාසල් අතීත කතාවට වුණත් යන්න පුළුවන්.
හැබැයි ඉතින් හර්ෂ හිතන තරම් පාසල් ප්රේමය ගොඩනගන්න බැහැ නේද?
පාසල් කාලයේදී ප්රේම සම්බන්ධයක් පවත්වාගෙන යන එක ලේසි පහසු දෙයක් නෙවෙයි. බාධාවන් ඕනෙ තරම් එනවා. ඒ කාලේ පෙම් හසුනක් දෙන්න මොන තරම් ගේමක් ගහනවද? මම හිතන්නේ ඒ කාලේ ඒ විඳපු ආදර කතාවන් බාධාවන් එක්ක හරිම සුන්දර විදියට ගෙවිලා ගියා. වර්තමානයේ එහෙම පාසල් ප්රේමය ඒ තරම් ලස්සනට කවි සිතුවිලි එක්ක ගොඩනැගෙනවා කියලා හිතන්න අමාරුයි. දැන් ඉතින් හැම දේම වෙනස් වෙලා. හැබැයි ඉතින් මොන විදියකින් හරි ප්රේමයක් ගොඩනැගුණත් ආදර සිතුවිලි නම් වෙනස් වෙන්නේ නැහැ.
සිනමාවේ ඔබ සුවිශේෂ නිර්මාණකරුවෙක්. දැන් එය අතහැරලද?
මම සිනමාවට තවමත් ආදරෙයි. කොවිඩ් කාලයත් සමග මම හිතුවා වෙනස් පැත්තකට හිත යොමුකරලා නිර්මාණ කරන්න. ඒ කාලයත් සමගම මම එක දිගටම ටෙලිනාට්ය නිර්මාණය කළා. මගේ නිර්මාණ සඳහා විශේෂ ඉඩක් දෙරණ රූපවාහිනියෙන් මට ලැබුණා. අවුරුදු හතරක් විතර එක දිගට මම වැඩ කරගෙන ආවා. මේ මගේ හයවැනි නිර්මාණය.
වසන්ත විතාරණගේ
