වේදිකාවෙන් කලා ලොවට පාතැබූ ඇය පසුකාලීනව ටෙලිනාට්ය රංගනයට පිවිසුණා. ‘ආදරණීය මිනිසෙක්’ ටෙලිනාට්යයේ ‘එරංගි’ චරිතයට පණපොවන ඇය සිලිඳු රන්වල. ‘ආදරණීය මිනිසෙක්’ සමග ගෙවන ජීවිතයේ සුන්දරත්වය ගැන අපි ඇය සමග මේ විදියට කතා කළා.Sri Lanka Latest News
‘ආදරණීය මිනිසෙක්’ගෙන්ම අපි කතාව පටන්ගමු නේද සිලිඳු?
‘ආදරණීය මිනිසෙක්’ ටෙලිනාට්යයේ එරංගි චරිතය මට ගොඩක් විශේෂ චරිතයක්. මම මීට පෙර එරංගි වගේ අහිංසක චරිතයක් රඟපාලා නැහැ. එරංගිගේ තාත්තා නැතිවෙලා. අම්මයි මිලින්ද මාමයි එක්ක තමයි එරංගි ජීවත් වෙන්නේ. එරංගි රැකියාවක් විදියට සිකියුරිටි ජොබ් එකක් කරගෙන ගියා. ඒත් විවිධ ප්රශ්න හින්දා ඒ රැකියාව නැතිවෙනවා. ඔය විදියට තමයි එරංගි චරිතය ගලාගෙන යන්නේ. ජයප්රකාශ් සිවගුරුනාදන් තමයි ‘ආදරණීය මිනිසෙක්’ ටෙලිනාට්යය අධ්යක්ෂණය කරන්නේ.
ආදරණීය මිනිසුන්ට බැඳීමෙන් වෙන්වීම දුකක් නේද?
අනිවාර්යයෙන් මගේ ජීවිතයටත් ආදරණීය මිනිසුන් කිහිප දෙනෙක් ඉන්නවා. මොකද පොසිටිව් මිනිස්සු සමගනේ අපි දුක සැප බෙදාගන්නේ. එවැනි ආදරණීය මිනිස්සු දුරස්වෙලා යනකොට දරාගන්න අමාරුයි. හදවතින් බැඳිලා සිටි නිසා.
වේදිකාවෙන් කලාවට පිවිසි ඔබ දැන් වේදිකාවෙන් දුරස් වෙලාද?
වේදිකාව කියන්නේ වෙනස්ම අත්දැකීමක්. අදටත් මම වේදිකාවට ළෙන්ගතුයි. මේ දවස්වල රාජ්ය නාට්ය උළෙල වෙනුවෙන් ‘හයිනා ටවුන්’ වේදිකා නාට්යයේ පුහුණුවීම් කරගෙන යනවා. එයට අමතරව කීර්ති කේ. රත්නායකගේ ‘මූණු’ ටෙලිනාට්යයටත් සම්බන්ධ වෙනවා.
සිලිඳු එතරම් කාර්යබහුල රංගන ශිල්පිනියක් නෙවෙයි නේද?
එහෙම කාර්යබහුල වෙලා එක දිගට වැඩ කරන්න මම කැමැති නෑ. චරිතයකට මට ආරාධනා කළත් ඒ චරිතය මොන වගේද, මට වගේම ප්රේක්ෂකයන්ටත් දැනෙන හොඳ චරිතයක් ද කියලා බලලා, හොඳ චරිතයක් නම් මම අනිවාර්යයෙන් ඊට සම්බන්ධ වෙනවා. මම වෘත්තීය මට්ටමින් කලාව කරන්නේ නැහැ. තවත් ආයතනයක සේවය කරන ගමන් තමයි නිර්මාණ තෝරා බේරාගෙන මම කලා කටයුතුවලට සම්බන්ධ වෙන්නේ.
ඔබේ ආදරණීය මව ජනප්රිය රංගන ශිල්පිනියක්. ඇය සමග රඟපාන්න අවස්ථාවක් ලැබුණේ නැද්ද?
මගේ අම්මා තමයි වසන්ති රන්වල. අම්මා සමග පෝය ටෙලිනාට්යයක රඟපෑවා. ඒත් ගොඩක් ආශාවෙන් ඉන්නවා අම්මා සමග හොඳ නිර්මාණයක එකට රඟපාන්න.
ඇයගෙන් සිලිඳුට ලැබෙන සහාය කොහොමද?
අම්මාගේ මගපෙන්වීම යටතේ තමයි මම කලාවට සම්බන්ධ වෙන්නේ. අම්මාගෙන් ලොකු සහායක් මට ලැබෙනවා මගේ ගමනට. ඒක මට ලොකු ශක්තියක්.
වසන්ත විතාරණගේ
