ඔබ දනවත් වෙන දවස ඔබව බලාගන්න

ධනය අද සමාජයේ සෑම කෙනකුටම අවශ්‍ය දෙයකි. එනිසාම වර්තමානයේ කේන්දරය පරීක්‍ෂාවට යන සියලුදෙනා අසන පොදු ප්‍රශ්නයක් ලෙස ධනය සම්බන්ධ ප්‍රශ්නය හඳුන්වා දිය හැකිය. ඕනෑම කෙනකුට තම කේන්දරය බලා තමාට ධනය ලැබිය හැකි මාර්ගය කුමක්ද යන්න වටහා ගතහැකි වෙයි. ඒ සඳහා කේන්දරයක ධනස්ථානය ලෙස සැලකෙන 2 වැන්නට අධිපති ග්‍රහයා සිටින තැන හඳුනාගත යුතුය. ඉන්පසු තමාට ධනය ලැබෙන මාර්ග මොනවාදැයි බලමු.
ලග්නය 2 වැන්න අධිපති
මේෂ – ශුක්‍ර
වෘෂභ – බුධ
මිථුන – සඳු
කටක – රවි
සිංහ – බුධ
කන්‍යා – ශුක්‍ර
තුලා – කුජ
වෘශ්චික – ගුරු
ධනු – ශනි
මකර – ශනි
කුම්භ – ගුරු
මීන – කුජ
ඉහත සටහනට අනුව ඔබේ 2 වැන්නාධිපති කේන්දරයේ කුමන කොටුවක සිටිනවාදැයි පරීක්‍ෂා කර බලන්න. ඉන්පසු පහත පරිදි එම ස්ථානයට අදාළ පලාපලය හඳුනා ගන්නට ඔබට හැකි වේවි.
1 වැනි කොටුව (ලග්නයේ)
2 වැන්න අධිපති ග්‍රහයා 1 වැන්න හෙවත් ලග්න භාවයේ නම් ස්ව උත්සාහයෙන් ධනය උපයා ගන්නට කැමැති අයෙකි. අනුන් යටතේ කරන රැකියාවකට වඩා තමාගේම ව්‍යාපාරයක් කරයි. එයින් දියුණුවට පත්වෙයි.
2 වැනි කොටුව
2 වැන්න අධිපති 2 වැන්නේම සිටී නම් විවිධ මාර්ගවලින් බොහෝ ධනය උපයාගත හැකිය. එකක් වරදින විට තව එකක් පටන්ගෙන එයින් ධනය සොයාගනී. මුදල් සම්බන්ධ ආයතනවල සේවයෙන් දියුණු විය හැකිය.
3 වැනි කොටුව
2 වැන්නාධිපති ග්‍රහයා 3 වැනි භාවයේ නම් සංගීතය, නාට්‍ය, චිත්‍රපට ආදී කලා අංශවලින් මුදල් උපයාගෙන දියුණු විය හැකිය. පුවත්පත්, රූපවාහිනී, ගුවන්විදුලි වැනි ආයතනවල රැකියා සුදුසු වෙයි. එයින් ප්‍රසිද්ධිය සහ ධනය උපයයි.
4 වැනි කොටුව
2 වැන්නාධිපති 4 වැන්නේ නම් වාහන, ව්‍යාපාර ආදියෙන් ධනය උපයාගනී. බස්, වෑන්, මගී ප්‍රවාහන ආදී ව්‍යාපාරවලින්, වගා කටයුතුවලින් දියුණුව ලබාගත හැකිය. මැණික් ලැබීමේ වාසනාව ඇත.
5 වැනි කොටුව
2 වැන්න අධිපති 5 වැන්නේ නම් විශාල ව්‍යාපාර මගින් ධනය ලැබීමට වාසනාව ඇත. විනෝදයට සම්බන්ධ ව්‍යාපාර, උපකාරක පන්ති ඇසුරින් ධනය ලැබීමටද වාසනාව ඇත. ගුරු වෘත්තියද ගැළපෙයි.
6 වැනි කොටුව
2 වැන්නාධිපති 6 වැනි කොටුවේ නම් වෛi වෘත්තියට සුදුස්සෙකි. රේස්පොළවල, සූදු පොළවල් ආදිය පවත්වා ආදායම් ලබයි. බටහිර ඖෂධ අලෙවියට සුදුසුය.
7 වැනි කොටුව
2 වැන්නාධිපති 7 වැන්නේ නම්, ව්‍යාපාර කටයුතු මගින් ධනය උපයා ගතහැකිය. හවුල් ව්‍යාපාරද ගැළපෙයි. විදේශ සමඟ කරන ගනුදෙනු සහ මඟුල් කපුකම්ද හොඳින් ගැළපෙයි.
8 වැනි කොටුව
2 වැන්නාධිපති 8 වැනි කොටුවේ නම් බොහෝ අනතුරුදායක ක්‍රියාමාර්ග ඔස්සේ මුදල් උපයනු ඇත. පතල් කර්මාන්තයද සුදුසු වෙයි. ස්විප් ලොතරැයි වැනි දිනුම් ලැබෙනු ඇත.
9 වැනි කොටුව
2 වැන්නාධිපති 9 වැන්නේ නම් විදේශ රැකියා වඩාත් ගැළපෙයි. එයින් ධනය ලැබේ. පියාගේ දේපොළවලින් ආදායම් ලැබේ. නීතිඥ වෘත්තියද හොඳින් ගැළපෙයි.
10 වැනි කොටුව
2 වැන්නාධිති 10 වැන්නේ නම් රැකියා සහ වෙළෙඳ යන අංශ දෙකම ගැළපෙයි. සුළුවට පටන් ගත්තද ටික කලකින් දියුණුවෙන් දියුණුවට පත්වෙයි. විශාල ආදායම් ලබන්නකු වීමටද වාසනාව ඇත.
11 වැනි කොටුව
2 වැන්නාධිපති 11 වැන්නේ නම් ස්ථිර ආදායම් මාර්ග හිමිවෙයි. ස්ථිර තැන්පතු පවත්වාගෙන යයි. පොලී ලාභ ලබයි. මහන්සි නොවී ධනය ලබන අයකු වෙයි.
12 වැනි කොටුව
2 වැන්නාධිපති 12 වැන්නේ නම් ලැබෙන ආදායම් විනාශ කරගනී. හොර මත්පැන්, ගණිකා ව්‍යාපාර, පාතාල කල්ලි ආදියට සම්බන්ධව ආදායම් ලබයි. විවිධ ජාවාරම්වලටද සම්බන්ධ වීමට බලයි.
ජ්‍යොතිෂවේදී ජයශ්‍රී නන්දකුමාර