සිනමාවෙ වැඩදාපු සුලෝචනා ටෙලිවලින් හැඩ වෙයි

වේදිකාවෙන් තම රංග කුසලතාව විදහාපාමින් චරිතාංග රංගන ශිල්පිනියක් වූ ඇය අද පුංචි තිරයේ, සිනමාවේ දක්‍ෂ රංගන ශිල්පිනියක් විය. කාලෙකට පසු නැවැත ‘තණමල්විල කොල්ලෙක්’ ටෙලිනාට්‍ය හරහා ඇයව දැකගන්නට පුළුවන්. ඇය වෙන කවුරුත් නොව සම්මානලාභී ජනප්‍රිය රංගන ශිල්පිනී සුලෝචනා වීරසිංහ. ඇය සමඟ අප කෙටි පිළිසඳරකට එකතු වූයේ මේ විදියට.
ඉතින් කොහොමද සුලෝචනා?
මේ දවස්වල රාජකාරි කටයුතු කරගෙන පවුලේ අයත් සමඟ සතුටින් ඉන්නවා.
ඔබව කාලෙකට පස්සේ නැවැත අපට දැකගන්න පුළුවන්. ඒ ගැන කතා කළොත්?
ඔව්. අවුරුදු දෙකකට පස්සේ තමයි ටෙලිනාට්‍යයකට මම සම්බන්ධ වුණේ. නිර්මාණවලින් මට ආරාධනා ලැබුණත් මගේ රාජකාරි කටයුතු නිසාත් රඟපෑම වෙනුවෙන් ලොකු කාලයක් කැප කරන්න අපහසුයි. ඉතින් කාලෙකට පස්සේ රොෂාන් රවින්ද්‍ර අධ්‍යක්‍ෂණය කළ ‘තණමල්විල කොල්ලෙක්’ ටෙලිනාට්‍යයේ සමන්තිගේ චරිතය රඟපෑමට අවස්ථාව ලැබුණා.
‘තණමල්විලට ගොඩවීමට විශේෂත්වයක් ඇති?
රොෂාන් අයියා මගේ හොඳ යහළුවෙක්. ඔහු මට ආරාධනා කළා සමන්ති චරිතය නිරූපණය කිරීමට. ඉතින් මම පිටපත කියවලා බලන විට හොඳ නිර්මාණ පිටපතක්. මේ වගේ චරිතයක් මෙයට පෙර කරලා තිබුණේ නැති නිසා ඒ චරිතය කිරීමට ලොකු ආශාවක් තිබුණා. ගැඹුරු ජීවිතය ස්පර්ශ කරන, සහෝදරත්වය ස්පර්ශ කරන චරිතයක් තමයි සමන්ති කියන්නේ.
ඔබගේ ජීවිතයට කොයි විදියටද ඔබට සමන්තිව දැනුණේ?
අනිවාර්යයෙන්ම මටත් සහෝදරයෙක් ඉන්නවා. මගේ මල්ලි එක්ක තිබුණු ඒ සහෝදර බැඳීම, ආදරය, සෙනෙහස ගොඩාක් ඉවහල් වුණා. මේ චරිතයට මගේ අත්දැකීම් එකතු කරගෙන ‘තණමල්විල කොල්ලෙක්’ ටෙලිනාට්‍ය කණ්ඩායමේ සියලුමදෙනාගේ සහාය ඇතිව මම සමන්තිව ජීවමාන කළා.
ඔබ හිතනවාද ඔබේ චරිතයට සාධාරණයක් කළ බව?
ලැබෙන ප්‍රතිචාරත් එක්ක මම හිතනවා උපරිම සාධාරණයක් ඉටු කළ බව. ප්‍රේක්‍ෂකයන් සතුටු කළා කියන්නේ අපි සියලුම දෙනාගේ ශක්තිය සාධාරණය එයට ඉටුකළ බවයි. මොකද ‘තණමල්විල කොල්ලෙක්’ ටෙලිනාට්‍ය ගැන කතාබහට ලක්වන නිසා මේ දවස්වල එය අපි හැමෝටම සතුටක්.
ඔබ රංගන ශිල්පිනියක් වශයෙන් පැතිකඩ තුනකින් දස්කම්, විස්කම් පෙන්වපු සුවිශේෂී රංගන ශිල්පිනියක්. එහෙත් ඔබ වඩාත්ම කැමැති පැතිකඩ ගැන කිව්වොත්?
මම වේදිකාවේ, පුංචි තිරයේ, සිනමාවේ මේ අංශ තුනේම කටයුතු කළා. එහෙත් මම ගොඩාක් කැමැති සිනමාවට.
පසුගිය කාලේ සිනමා නිර්මාණ කිහිපයකම ඔබ කටයුතු කළා. එය ගැන කතා කළොත්?
2016 වර්ෂයේ ගින්නෙන් උපන් සීතල සිනමා නිර්මාණයට සම්බන්ධ වුණා. එයට අමතරව නිකිණි වැස්ස, ‘තණ්හා රති රඟා’ චිත්‍රපටවලටත් දායක වුණා. ඒ සියලුම චරිත එකිනෙකට වෙනස් චරිත. ඉදිරියේදී නිලෙන්ද්‍ර දේශප්‍රියගේ අලුත් චිත්‍රපටයකට දායක වීමට ආරාධනා ලැබුණා. එහි වැඩකටයුතු ළඟදීම පටන් ගනීවි. එයට සූදානමින් තමයි දැන් ඉන්නේ.
වේදිකාවෙන් ජයගත්ත ඔබ අද වේදිකාව අමතක කරලාද?
වේදිකාවෙන් මම සමුගෙන නැහැ. මේ දවස්වල රටේ තිබෙන ‘කොරෝනා’ වසංගතය නිසා වේදිකා නාට්‍ය අතරමඟ නතර වෙලා තියෙන්නේ. නිසි කාලවේලාවක් උදාවූ පසු වේදිකා නාට්‍ය වැඩකටයුතු නැවැත පටන් ගන්නවා.
ඔබ ලබපු අත්දැකීම් එක්ක ඔබේම කියලා නිර්මාණයක් කිරීමට සැලසුමක් තවම නැද්ද?
එහෙම අදහසක් නැතුවා නොවේ. මේ ක්‍ෂේත්‍රය ගැන තව ගොඩාක් දේවල් මට ඉගෙනගන්න තිබෙනවා. එහෙම ආවාට ගියාට මට නිර්මාණයක් කරන්න බැහැ. මේ ක්‍ෂේත්‍රය ගැන ගැඹුරින් හැදෑරීමක් කරලා අධ්‍යක්‍ෂණය පැත්තට යොමුවෙන්න අදහසක් තමයි තියෙන්නේ. ඒත් එයට තවම සුදුසු කාලය නෙවෙයි.
වසන්ත විතාරණගේ