කොකා-කෝලා වෙතින් කොවිඞ් සටනට මිලියන 130ක්

ශ්‍රී ලංකාව රටක් වශයෙන් මේ වන විට විශාල අභියෝගයක් වන කොවිඞ් – 19 වසංගතය තුරන් කිරීම සඳහා දැවැන්ත අරගලයක නිරත වෙමින් සිටියි. රාජ්‍ය අංශය මේ වෙනුවෙන් දක්වමින් සිටින කැපවීමට තවත් අමතර ශක්තියක් වෙමින් රුපියල් මිලියන 130ක දායකත්වයක් ලබාදීමට කොකා-කෝලා සමාගම පෙරමුණට විත් තිබේ. විශේෂයෙන්ම සෞඛ්‍ය අමාත්‍යාංශයට අවශ්‍ය කරන කොවිඞ්-19 පරීක්ෂණ උපකරණ කට්ටල ඇතුළු වෛද්‍ය උපකරණ ලබා දීමට කටයුතු කරන ලදී. ශ්‍රී ලංකාවේ රාජ්‍ය අංශය මෙම වසංගතය මැඩලීම සහ ජනතාවගේ සෞඛ්‍ය තත්ත්වය ඉහළ නැංවීම වෙනුවෙන් ගෙන යනු ලබන උත්සාහයන්ට කොකා-කෝලා සමාගමේ දායකත්වය විශාල පිටිවහලක් වන බව පැහැදිලිය.

විශේෂයෙන්ම කොවිඞ්-19 වෛරසයේ පැතිරීමත් සමග Lockdown කරන ප්‍රදේශවල ජීවත්වන ජනයාගේ ශාරීරික, මානසික හා සමාජීය යහපැවැත්ම ඉහළ නැංවීම පිළිබඳවද වගකීම් සහගත ව්‍යාපාරික ආයතනයක් ලෙස කොකා-කෝලා සමාගම සිය අවධානය යොමුකරන ලදී. මෙහිදී ශ්‍රී ලංකා රතුකුරුස සමාජය සමග සහයෝගීතාවයෙන් අසීරුතාවයන්ට මුහුණදී සිටින පවුල් වෙත අත්‍යවශ්‍ය ආහාර ද්‍රව්‍ය, සනීපාරක්ෂක භාණ්ඩ සහ ප්‍රථමාධාර අවශ්‍යතා බෙදාදීමට කොකා-කෝලා සමාගම කටයුතු කළ අතර, කොවිඞ්-19 වෛරසයෙන් බේරීම සඳහා මෙන්ම මූලික ප්‍රථමාධාර පිළිබඳවද අවශ්‍ය දැනුවත්කිරීම් සිදුකරන ලදී.