පුත්තලම නගරයේ නිවසකට පැමිණි නාඳුනන දෙදෙනෙකු ලබාදුන් කේක් ආහාරයට ගැනීමෙන් සිහිසුන් වූ එකම පවුලේ පස් දෙනෙකු පුත්තලම මූලික රෝහලට ඇතුළත් කර තිබෙනවා. (Sri Lanka Latest News)
මෙම තත්ත්වයට මුහුණ පා ඇත්තේ 65 හැවිරිදි කරණවැමියකු හා ඔහුගේ 63 හැවිරිදි බිරිද, 29 හැවිරිදි දියණිය, කරණවැමියාගේ 86 හැවිරිදි පියා හා 84 හැවිරිදි මව ඇතුළු පිරිස බවයි වාර්තා වන්නේ.
හෘද සැත්කමකට ලක්කර සිටි නිවෙස් හිමි කරණවෑමියාට හිතවත්කමක් පෙන්වා, ඔහුට පුද්ලික ආයතනයකින් රුපියල් 50000ක මුදලක් ප්රදානය කිරීමට සූදානම් වන බව සැකකරුවන් පවසා තිබෙනවා.
ඊට අදාල චෙක්පත ලබාදීමට ප්රථම මෙම ආගන්තුකයන් රැගෙන ආ කේක් කපා ආහාරයට ගෙන, එය ඡායාරූපයට නගා චෙක්පත ප්රදානය කිරීමට සුදානම් වන ආයතනයට යැවිය යුතු බවද ඔවුන් පවසා තිබේ.
ඒ අනුව එම යෝජනාවට නිවැසියන් එකග වී ඇති බවත්, ඉන් පසුව කේක් කපා ආහාරයට ගැනිමටත් බීම පානය කිරීමටත් ඔවුන් කටයුතු කර තිබුණි.
නමුත් නිවෙස් හිමි හෘද රෝගී කරණවැමියා කුඩා කේක් කැල්ලක පමණක් ආහාරයට ගෙන ඇති අතර, ඔහු බීම පානය කර නොමැති බවයි වාර්තා වන්නේ.
එසේ සිටියදී මෙම නාදුනන ආගන්තුකයින් රැගෙන ආ කේක් හා බීම පානය කල තම බිරිද, දියණිය පියා හා මව සුළු වේලාවකින් සිහිසුන්ව ඇද වැටෙනු දුටු මෙම නිවෙස් හිමි කරණවැමියා කඩිනමින් පුත්තලම නගරයෙ රැකියාවක නිරත තම වැඩිමහල් දියණියට ජංගම දුරකථනයෙන් ‘නංගී වැටුනා’ යැයි පමණක් පවසා ඇති බවත් ඒ සමගම මෙම කරණවැමියාද සිහිසුන්ව ඇද වැටි ඇති බවත් කියයි.
මෙම තැනැත්තා දියණියට දුරකතන ඇමතුම ලබාදීමේන් පසු කලබල වූ ආගන්තුක සැකකරුවන් දෙදෙනා නිවසින් පැනගොස් ඇති බවද හෙළිව තිබේ.
තම පියා ලබාදුන් දුරකතන ඇමතුමෙන් පසු කිසිදු පිළිතුරක් පියගෙන් නොලැබීමෙන් කලබලයට පත් වැඩිමහල් දියණීය, කඩිනමින් කුලී රථයක නැගී නිවෙසට පැමිණ ඇති බවත්, ඒ වන විටත් නිවසේ සියලු දෙනාම සිහිසුන්ව ඇද වැටී සිටි බවත්, ඉන් පසුව අසල්වැසියන්ට කෑගසා සියලු දෙනා පුත්තලම රෝහලට රැගෙන යාමට කටයුතු කර ඇති බවත් වාර්තා වේ.
lankadeepa
