විවාහය රස කරන ලලනාවෝ

විවාහ ජීවිත රුවන් මාලිගයේ පිවිසුම් මංගල දොරටුවේ රන් යතුර ඇත්තේ බිරිය අතේය. සෑම කාන්තාවකටම යුගදිවිය වාසනාවන්ත කිරීමේ හැකියාව, දක්‍ෂතාව, උපක්‍රමශීලීත්වය නොමැත. සාර්ථක යුග දිවියක් ගතකිරීමට බලපාන්නේ ඇගේ බාහිර රූපය නොවේ. ආදරය, ප්‍රේමය, ළෙන්ගතුකම මිශ්‍ර වූ සියුම් වින්දනීය සෞන්දර්යාත්මක රාගය සම්මිශ්‍රණය වූ බිරියකට යුගදිවිය සාර්ථක කරගැනීමට හැකිවෙයි. මවක්, මිතුරියක්, උපදේශිකාවියක්, බිරියක් මෙන්ම සයනයේදී වෛශ්‍යාවක් බඳු බිරියක් සිය සැමියාට උපරිම තෘප්තිය ලබා දෙන්නීය. යුගදිවිය රසයෙන් සපිරි මංජුසාවක් කරගැනීම ඉතාම පහසුය. විවාහය සාර්ථක කරන ශ්‍රේෂ්ඨම ගති ලක්‍ෂණ ඇගේ ජන්ම පත්‍රය තුළ සටහන්ව ඇත. එහිදී 2-7 ලග්න හා සඳුගේ, සිකුරුගේ බලය ඉවහල් වෙයි. 2.7 ලග්නයට වැටෙන සුබ ග්‍රහ දෘෂ්ටියද දෙවනුව බලපෑම් කෙරේ. 2-7 ලග්නයට පාපීන් සිටීම පෙනීම අහිත කරවෙයි. ලග්නයට ඍජුවම 7 වැන්න පෙනීම හරහා විවාහයටද තදින්ම බලපෑම් එල්ල වෙයි.

පුරපස නවවක, දසවක, පසළොස්වක තිථියකින් 7 බුධ – ශුක්‍ර සංයෝගවී උපත ලද කාන්තාව සිය සැමියා ගතින්, සිතින් දෙකෙන්ම සනහාලන්නීය. ඇය සමඟ එක්වීම සුරලොවට පිවිසීමක් බඳුය.

බුධ සමඟ සඳු සංයෝගවී 7 වැන්නට සුබ දෘෂ්ටි ගතවී ග්‍රහ හැසිරීම බලවත් වූ විට සිය සැමියාගේ ආදරය දිනාගන්නා අතර, සැමියාට එක් රැයක්වත් ඇය නොමැතිව සිටීමට නොහැකි වනු ඇත.
සුබ ග්‍රහයෝ ලග්නගතව සිට ශ-කු-රා පාපීන් නොදැක සුබයන්ගේ දෘෂ්ටි සහිතව නම් එය යුග දිවියේ රස ආකරයකි.

බු-ච, ගු-ශු බලවත්ව 1- හෝ 7 ඇත්නම් යුග දිවියට කාම කොවුලකුට අඹදළු වැනිය.
5 වැන්නේ ගුරු – ශුක්‍ර සංයෝගයෙන් පින්වත් දරුවන් ලබයි. සැප සම්පත් ලැබීමේ ජන්ම වාසනාව ලබන්නීය. වාසනාව සපිරී යනු ඇත.

සඳු 11 සිට 7 වැන්නේ බුධ – ශුක්‍ර දෙදෙනාම යෝග වීම නිසා සැමියාත් ජනයාත් අතර, ඇය ආකර්ෂණය ලබන්නීය. ඇය සීදේවියකි.

ලග්නයේ සියලුම සුබයන් සිටීම නිසාද, 7 වැන්නේ ග්‍රහ හැසිරීමත්, පෙනීමත් හරහා අති සාර්ථකව යුග දිවියක් ගෙවීම උත්පත්ති වාසනාව එකී බිරිය ලබන්නීය. ඇය සැමියාට මරකත මිණකි. වාලම්පූරියකි.

ලග්නාධිපතියා 7 අධිපතියා සමඟ 7 සිට ගුරුගේ පෙනීම හෝ සඳුගේ පෙනීමක් ඇත්නම් ඇයද විවාහයේ රස ගුලාවකි. ඇය දකින සැමියාට අමෘතයකි. යුගදිවිය අතිශයින්ම සාර්ථක වෙයි.
බුධ – ශුක්‍ර දෙදෙනාම ලග්නයට පැමිණීම හේතුවෙන් රාගාධික රූමත් කතක් වෙයි. පින් ඇත්තියකි.

බුධ – ගුරු – කිවි ත්‍රියෝගය සැපසම්පත් ලබන යුග දිවියේ රසපහස විඳින බලවත් කතක් වෙයි. ලග්නයේ සුබයන්ද, 7 වැන්නේ සුබයන් හෝ සුබ දෘෂ්ටි ගතවීමද, 2, 8, 9 බලවත් වූ විට එකී බිරිය සැමියාගේ ආදරය දිනා ගනිමින් ඔහුට මෙලොව සැප සම්පත් ළඟාකර දෙන්නීය.

සම්භෝගයේ රසවිඳීමටත්, සුරාන්තය දක්වාම වින්දනයට පත්වීමටත්, 7 වැන්නේ බලවත් සුබ ග්‍රහ පිහිටීම අනිවාර්ය වෙයි. ස්පර්ශ, කටුක, කෲර ග්‍රහ පිහිටීම් නිසා උපරිම වින්දනය අතෘප්තිකර තත්ත්වයට පත්වෙයි.

විවාහ දිවිය යනු මෙලොව රස ආකරයකි. දෙදෙනාගේම කායික හා මානසික සතුට, සැපත, උත්තරීතර තෘප්තිය ලැබීමට ජන්ම පත්‍රයේ ඉතාම සුබවාදී ධනාත්මක පැතිකඩ මත ග්‍රහ පිහිටීම යෝග වීම හා දෘෂ්ටිය අනිවාර්ය වන බැව් සනිටුහන් කරමු.
‘ලොව ඇති උතුම්ම භාණ්ඩය ස්ත්‍රී භාණ්ඩය වෙයි’ – දුස්සරිය සූත්‍රය
ප්‍රවීණ ජ්‍යොතිෂවේදී ටී. හෙන්රි බෙම්මුල්ල