ලංකාවේ ඉඳන් ගොඩක් ඈතින් පිහිටලා තියෙන රටක් වුණත් ඉතාලිය අපට හරිම සමීපයි. ඒකට ප්රධානතම හේතුව අපේ රටේ බොහෝ දෙනෙක් ඉතාලියේ ඉන්න එක. රැකියාවල නියුතු අය වගේම ඉතාලියේ ස්ථිර පදිංචිය හිමි ශ්රී ලාංකිකයන් බොහෝ දෙනකුත් ඉන්නවා.(Sri Lanka Latest News)
සාමාන්යයෙන් අපි දන්න කියන කවුරුම හරි ඉතාලියේ ඉන්නවනේ. අඩු ගානේ ඉන්න කෙනෙක් ගැන අහලා හරි තියෙනවා. එහෙම නැති කෙනෙක් ඉන්නවා නම් ඒ ඉතාම අඩුවෙන්. ඒ තරමටම ඉතාලිය අපට හරිම සමීපයි. බොහෝවිට අතීතයේ නම් වැඩි වශයෙන් ඉතාලි ගියේ මීගමුව, වෙන්නප්පුව අවට පිරිස්. ඒක අමුතුවෙන් කියන්න දෙයක් නෙවෙයි. මීගමුවට පුංචි ඉතාලිය කියන්නෙත් ඒකනේ.
මීට දශක දෙක තුනකට කලින් නම් ඒ බොහෝ දෙනෙක් ඒ ගමන ගියේ බෝට්ටුවෙන්. මෙච්චර රටවල් තියෙන ලෝකේ බෝට්ටුවලින් ඇයි ඉතාලිම යන්නේ කියන එකත් මට කාලයක් ප්රශ්නයක් වෙලා තිබුණා. මොකද ලෝක සිතියමට අනුව ලංකාවේ ඉඳන් බෝට්ටුවේ ඉතාලි එන්න නම් අප්රිකා මහද්වීපය වටෙන් එන්න ඕනේ. ඒ අතරමඟ තව යුරෝපා රටවලුත් පහුවෙනවා. ඒත් ඔය බෝට්ටු ගමන ගොඩක්ම ආවේ ඉතාලියට. ලංකාවේ ඉඳන් විතරක් නෙවෙයි, පාකිස්තානේ, ඉන්දියාව වගේ අසල්වැසි රටවල බහුතරයකුත් ඔය වගේ ඇවිත් තියෙනවා.
ඉතාලියේ ක්රියාත්මක වෙන ලිහිල් සංක්රමණ නීති තමයි ඒ ගමනට ඉතාලියම තෝරාගන්න හේතුව. සාමාන්යයෙන් ඉතාලි මුහුදු සීමාවට ඇතුළු වෙන සංක්රමණිකයන්ව හරවා යැවීමක් සිද්ධ වෙන්නේ නෑ. ඒ වගේම අතීතයේදී ඉතා පහසුවෙන් ඒ අයට නීත්යනුකූල ලියකියවිලි හදාගැනීමේ පහසුවත් ඉතාලියේ තිබිලා තියෙනවා. කතාවට ‘කොල නීති’ කියන්නේ ඒවට. අද වෙද්දී නම් ඒ තත්ත්වය බොහෝ දුරට වෙනස්. බෝට්ටුවෙන් එන ඉතාලි ගමන දැන් නම් බොහෝ දුරට නැවතිලා. ඒ වෙනුවට දැන් භාවිත වෙන්නේ වෙනත් ක්රම. ඒත් ඉතාලිය එක්ක අපට දැනුණු සමීප බව තාමත් එහෙමමයි.
ලංකාවෙන් පිට වෙනත් රටක් ගැන කියවෙන සින්දු, චිත්රපට, ටෙලිනාට්ය ගත්තත් ඒ අතර වැඩියෙන්ම කියැවෙන්නේ ඉතාලිය ගැන කියන එකට විවාදයක් නැහැ. චිත්රපට ගත්තොත් අපේ මතකයට මුලින්ම එන්නේ ‘මිල්ලෙ සොයා’. මෑතකාලීන ගීත ගත්තොත් ‘චාවෝ මල්ලී’, ‘මං ඉතාලියේ තනි වුණා’ වගේ ගීත උදාහරණයට ගන්න පුළුවන්. ධනපාල උඩවත්ත ගායනා කරන ඒ ගීතයේ ඉතාලියේ බොහෝ නගර සහ ස්ථාන ගැන කියැවෙනවා. ඒ වගේම බොහෝ ටෙලිනාට්යවලත් ඉතාලියේ ඉන්න චරිත ගැන අපට අහන්න දකින්න ලැබෙනවා.
අතීතයේ බෝට්ටුවලින් ඉතාලි ආව ගමන ගැන තමයි ‘මිල්ලෙ සොයා’ චිත්රපටයෙන් කියැවෙන්නේ. මිල්ලෙ කියන්නේ ඒ කාලේ ඉතාලියේ තිබුණු මුදල් ඒකකය. ඒත් අද වෙද්දී ඉතාලියේ මිල්ලේ සොයාගන්න නැහැ. යූරෝ තමයි දැන් ඉතාලියේ මුදල් ඒකකය විදියට භාවිත වෙන්නේ.
ලංකාවේ ඉඳන් ඉතාලිය ගැන අහද්දී අපට මැවෙන්නේ වෙනම ලෝකයක්. දන්න වචනවලින් කිව්වොත් දිව්ය ලෝකයක් වගේ එකක්. මට වුණත් එහෙමයි. ඉතාලියේ ඉඳන් නිවාඩුවට ලංකාවට ආව කෙනෙක් වුණත් දැක්කම අපේ හිතට එහෙම හැඟී මක් එනවනේ. ලස්සනට අඳින පලඳින, සුවඳ හමන මිනිස්සු තමයි අපට ඉතාලිය කිව්ව ගමන් මතක් වෙන්නේ.
ඒ කතාව 100%ම බොරු නෙවෙයි. ඒත් ඒක 100%ක් ඇත්තත් නෙවෙයි කියලා තේරෙන්න නම් ඉතාලියටම එන්න ඕනේ. මොකද ඉතාලිය කියන්නේ බහුවාර්ගික රටක්. විවිධ රටවල ජනතාව එකට ජීවත් වෙන රටක්. ඉතාලියේ බස් රථයකදී හෝ දුම්රියකදී සුදු හම තියෙන මිනිස්සු එක්ක හරි හරියට කළු හම තියෙන මිනිස්සුත් දැකගන්න පුළුවන්. ආව ගමන් නම් ඒක ටිකක් අසාමාන්ය දෙයක් විදියට තමයි තේරෙන්නේ.
ඒත් පහු වෙද්දී නම් ඒක සාමාන්ය අතට හැරෙනවා. ඒ කළු හම සහිත අප්රිකානුවන් බහුතරය ඉතාලි ජාතිකයන්. ඉතාලිය අප්රිකා මහද්වීපයට නුදුරින් පිහිටලා තියෙන හින්දා අප්රිකා ජාතිකයන් තමයි විශාල වශයෙන් සංක්රමණිකයන් විදියට ඉතාලියට එන්නේ. එහෙම ආව බොහෝ දෙනෙක් අද වෙද්දී ඉතාලි පුරවැසිභාවය හිමිකරගෙන තියෙනවා. ඒ හින්දා ඉතාලි පාසලක් තුළ වුණත් හරි හරියට කළු හම සහිත ශිෂ්ය ශිෂ්යාවන් දැකගන්න පුළුවන්.
වර්තමානය වෙද්දිත් අප්රිකා රටවලින් ඉතාලියට පැමිණෙන සංක්රමණිකයන්ගේ අඩුවක් නැහැ. ඒ වගේම ඉතාලියේ නිදහස් සහ සාමකාමී වාතාවරණයට මේ ඇතැම් අප්රිකානුවන්ගෙන් වෙන බලපෑමත් සුළුපටු නැහැ. අද වෙද්දිත් ඉතාලියේ බොහෝ නගරවල යටිබිම් පදික මාරු බොහෝ කළු ජාතිකයන්ගේ රාත්රී නවාතැන් බවට පත්වෙලා තියෙනවා.
ඒ හේතුවෙන් එම උමං මාර්ග අපිරිසිදු සහ අනාරක්ෂිත ස්ථාන බවටත් පත්වෙලා තියෙනවා. ඔව්. දුගඳ හමන උමං ඉතාලියෙත් තියෙනවා. ඒ වගේම දුම්රියවල හොරෙන් ගමන් කිරීම, සිඟමන් ඉල්ලීම මෙන්ම බලහත්කාරයෙන් මුදල්, බඩු බාහිරාදිය පැහැර ගැනීම සම්බන්ධයෙනුත් ඔවුන්ට චෝදනා එල්ල වෙනවා. රාත්රී කාලයට තනිවම ගමන් කරන්න සුදුසු නැති ප්රදේශ අදටත් ඉතාලියේ තියෙනවා. හැබැයි ඕනෑම නගරයක වීදියක් හෝ දෙකක් පමණයි මේ තත්ත්වයට පත්වෙලා තියෙන්නේ.
ඒ එක්කම නීති වීරෝධී මත්ද්රව්ය අලෙවියේත් ඉදිරියෙන්ම ඉන්නේ මේ කළු ජාතිකයන්. ලෝකයේ බොහෝ තහනම් මත්ද්රව්ය ඉතාලියේ අලෙවි වෙනවා. හමේ පාට අනුව මිනිස්සු වෙන් කරන එක පහත් වැඩක් වුණත් මේ දේවල් විස්තර කරන්න වෙන ක්රමයක් නැති හින්දා එහෙම කළ බවත් කියන්න ඕනෑ.
මීට අමතරව ඉතාලිය ගැන තව කතාකරන්න බොහෝ දේවල් තියෙනවා. ඇවිදින්න බොහෝ තැන් තියෙනවා. ඉතාලියේ ඉන්න අපේ අය කරන කියන බොහෝ දේවල් තියෙනවා. සුදු කළු ඉතාලියේ ඒ හැම දෙයක් ගැනම අපි හීන් සීරුවේ කතා කරමු.
චන්දන පොන්නම්පෙරුම
