ශ්රී ලංකාව භූමිකම්පාවලින් තොර ඉන්දීය සාගරයේ සුරක්ෂිත දූපතක් බවට සමහරෙක් තර්ක කරති. එය කොතරම් සාවද්ය ප්රකාශයක්ද යන්න ගම්ය වන්නේ ශ්රී ලංකාව පිළිබඳ භූ විද්යාත්මක ඉතිහාසය අධ්යයනය කිරීමෙනි.
මහාචාර්ය පී. ඩබ්ලිව්. විතානගේ මහතා 1615දී සිදුවූ භූමිකම්පාවක් පිළිබඳ සිය වාර්තාවල සඳහන් කර ඇත. එම භූමිකම්පාව සිදුවී ඇත්තේ පෘතුගීසි පාලන සමයේදීය. එවකට කන්ද උඩරට රාජධානියේ පාලන බලය සෙනරත් රජුට හිමි වී තිබිණි.
එම භූමිකම්පාව සිදුවීමට පෙර 1615 මාර්තු 07 වැනිදා වලිග තුනකින් සමන්විත වල්ගා තරුවක් අහසේ දිස්විය. එය අසුබ පෙර නිමිත්තක් බවට රටවැසියාගේ විශ්වාසය විය. වල්ගා තරුවෙන් සිදුවුණු මහා විපත 1615 අප්රේල් මස 14 වැනිදා උදෑසන හතේ කණිසමත් සමඟ සිදුවිය. සමස්ත ලංකා ධරණි තලයම ශීඝ්රයෙන් කම්පනය විය. නිවෙස් ඇතුළේ සිටි ජනතාව භීතියෙන් මාර්ගවලට දිව ගියහ. ඇස් පනාපිටම ගේ දොර ගොඩනැඟිලි බිමට සමතලා විය.
කොළඹ නගරයේ කොටුපවුර විනාශ වූ අතර ගල්වලින් තැනූ පාලමක්ද සහමුලින් ම විනාශ විය. තවද හදිසි ගින්නක් කොළඹ නගරයේ පැතිර ගියේය. මෙම අති බිහිසුණු භූකම්පාවේ ප්රතිඵලයක් ලෙස පුද්ගලයන් 2,000කට වඩා පිරිසක් ජීවිතක්ෂයට පත් වූ බවට වාර්තාවල සඳහන් වේ. කොළඹ නගරය නැවත යථා තත්ත්වයට පත් කිරීමට පෘතුගීසිනට සෑහෙන කාලයක් ගත විය.
මෙම භූමිකම්පාව සිදුවී හරියටම වසර 199කට පසුව මඩකලපුවේදී තවත් භූමිකම්පාවක් සිදු වී ඇත. ඒ 1814 ජුනි මස 14 වැනි දිනය. කෙසේ වෙතත් එය 1615 භූමිකම්පාව තරම් දරුණු එකක් නොවීය. ඉන් පසුවද ශ්රී ලංකාවේ වරින් වර භූ චලන සිදුවිය. මේ සිදුවීම්වලින් ගම්ය වන්නේ කුමක්ද? ශ්රී ලංකාවේ භූමිකම්පා සිදුනොවන බව මිථ්යා ප්රකාශයක් බව නොවේද?
එස්.එම්. ජයසූරිය
