අනූෂා දේශපාලනයට…?

එළැඹෙන මහ මැතිවරණයට කලා ක්‍ෂේත්‍රයේ කිහිප දෙනකු එකතු වන බවට ආරංචි වුණා. ඒ ආරංචි අතර අපට මුලින්ම දැනගන්න ලැබුණේ අනුෂා දමයන්ති මහ මැතිවරණයට ඉදිරිපත් වීමට සූදානම් වන බවයි. ඒ කතාවේ අග-මුල සොයා ඇත්ත දැන ගැනීමට අපි ඇයව සම්බන්ධකර ගත්තා. ඇය පැවසුවේ මෙවන් කතාවක්.
කලාව අතහැර එළැඹෙන මහ මැතිවරණයට සම්බන්ධ වන කතාවක් පැතිරෙනවා. ඇත්තද මේ කතාව?
කවුද ඔය බොරු කතා ගොතන්නේ. එහෙම අදහසක් නැහැ. කලාව හැමදාමත් මගේ ජීවිතය.
ඒ කියන්නේ හිතේ කොතැනකවත් නැතිද දේශපාලනයට සම්බන්ධ වෙන්න?
මම රට වෙනුවෙන්, රටේ ජනතාව වෙනුවෙන් 2005 මහින්ද රාජපක්‍ෂ මහතා ජනාධිපති කරවීමට මැදිහත් වුණා. එදා පටන් අද දක්වා මම එතුමන් වෙනුවෙන් කටයුතු කළා. එය එතුමත් දන්නවා. මම කාලෙන් කාලෙට පැති මාරු වුණේ නැහැ.
අද දේශපාලනයට එන ගොඩ දෙනෙක් වාසි බලාගෙන තමයි කටයුතු කරන්නේ නේද?
ඒ කතාව ඇත්ත. හැබැයි මම දේශපාලනය වෙනුවෙන් මූලික වෙලා කටයුතු කළේ කිසිම නිලතල, බලයක්, වාසියක් බලාගෙන නෙවෙයි. මට ජීවත් වෙන්න කලාව තියෙනවා. ඒ මගේ වෘත්තිය. ඉතින් මට වෙනත් වෘත්තියක් මොකටද?
ඇත්තටම නරකද මහ මැතිවරණයට ඉල්ලුවොත්?
ඒ දැක්ම මගේ හිතේ නැතුවා නොවේ. නමුත් තවම එහෙම අදහසක් ආවේ නැහැ. මගේ පළාතේ විතරක් නෙවේ මුළු රටේම ජනතාව මට දුරකතන ඇමතුම්වලින් කතා කරලා කියනවා මහ මැතිවරණයට එන්න කියලා කාන්තාව වෙනුවෙන් හඬක් නඟන්න කවුරුත් නැහැ කියලා. හැමෝම මට උදවු කරනවා කියලා. මොකද ඔවුන් දන්නවා මම වැරැද්දක් නොකරන බව.
කලා ක්‍ෂේත්‍රයේ ගොඩ දෙනෙක් මහ මැතිවරණයට ඉදිරිපත්වෙලා පාර්ලිමේන්තුවට ගියා. ඒත් අවසානයේ වුණේ මඩ නාගත්ත එක විතරයි?
මඩ නාගත්තා කියන එක අතීතයේ ඉඳන් එන කතාවක් තමයි. නමුත් මම ජනතාවගෙන් ඉල්ලන්නේ හැම කලාකරුවාම එක වගේ නැහැ. ඒ නිසා එකම විදියට මනින්න එපා කියලා. නමුත් ජනතාව දැන් බුද්ධිමත්. ඔවුන්ට හොඳ දැක්මක් තියෙන එක ගැන මම සතුටු වෙනවා. මම කරපු දේවල්වල විශ්වාසයක් තිබෙන නිසා තමයි ජනතාව මට ආරාධනා කරන්නේ. මම කලා ශිල්පිනියක් නිසා රටේ ජනතාව හැමෝම ආදරෙයි. නමුත් දේශපාලන පක්‍ෂයක් තෝරාගත්තාට ඒ ආදරයේ අඩුවක් මම දකිනවා. ඒ නිසා මේ ඉන්න විදියට කලා කටයුතු කරගෙන ඉන්නවා. හැබැයි රටේ දියුණුව වෙනුවෙන්, ජනතාව වෙනුවෙන් මම කටයුතු කරනවා.
දැන් පවතින දේශපාලන ක්‍රමවේදයත් එක්ක ඔබ හිතනවාද කලාවට සුබවාදී වෙයි කියලා?
අනිවාර්යයෙන්ම එය මම විශ්වාස කරනවා. මේ ගෙවුණු දින කිහිපය තුළ කලාවට විතරක් නෙවේ රටම දියුණුවෙන වෙනස් වන බවක් මම දකිනවා. එය ජනතාවත් විශ්වාස කරාවි. අගමැති මහින්ද රාජපක්‍ෂ මැතිතුමන් පවා කලාවට ගොඩාක් ළැදි කෙනෙක්. ඒ නිසා අපේ වෘත්තියටත් හොඳ සාධාරණයක් කරාවි ඉදිරියේදී.
මේ දවස්වල නිර්මාණ වැඩකටයුතු කොහොමද?
රොෂාන් වීරසිංහගේ ‘සිහින කුමරි’ ටෙලිනාට්‍යයේ වලව් කුමාරිහාමි කෙනෙක්ගේ චරිතයක් නිරූපණය කරනවා. මම නිරූපණය කළ චරිත අතර වෙනස්ම චරිතයක් ඉදිරියේදී දැකබලා ගන්න පුළුවන් වෙයි.
වසන්ත විතාරණගේ