ලංකාවේ ක්රිකට් ඉවරයි කියලා හුඟක් අය හිතන්න පටන් අරගත්තෙ සෑහෙන කලකට කලින්. ඒ කවදා ඉඳලද කියලා නිශ්චිතව කියන්න බැරි වුණත් ලංකාව ක්රිකට් තරග දිනන එක වෙන්නෙ අතිශය කලාතුරකින්. ඒත් ඒක අමතක කරලා දාලා ලංකාවෙ ප්රේක්ෂකයො මැච් බලනවා. ඉන්දියාවේ වගේ අපේ රටේ මිනිස්සු ක්රීඩකයන්ගෙ ගෙවල්වලට ගල් ගහන්නෙ නෑ. ඉන්දියාවෙ වගේ මේ තරමට මැච් පැරැදුණා නම් මොනවායින් මොනවා වෙයිද කියන්න බෑ. ඒ මිනිස්සු ක්රිකට් ක්රීඩකයන්ට සලකන්නෙත් දෙවියන්ට වගේ. ඉන්දියාවෙ ක්රිකට් ක්රීඩකයන්ගෙ වත්කම් එහෙමත් අපේ අයට වඩා ඉතා ඉහළයි. හැබැයි එහෙමයි කියලා නෑ. ඒ මිනිස්සු තද වුණොත් ගෙවල් දොරවල් කඩලා බිඳලා දාන්නෙ කිසිම වගක් විභාගයක් නැතිව. ඒ නිසා තරග පරදින්න එනකොට ක්රීඩකයන්ගෙ ගෙවල්වලට ආරක්ෂාව දාන්න සිදුවෙනවා. හැබැයි වැරැදිලාවත් ලංකාවෙ ප්රේක්ෂකයො ක්රීඩා ලෝලියො ඔය තත්ත්වයට පත්වෙලා හිටියා නම් ලංකාවෙ වෙනම පොලිස් ඒකකයක් ඕකටම පත්කරන්න වෙනවා. මොකද මේ පරදින පැරදිල්ලෙ හැටියට ලංකාවෙ පොලිසියට ඔය හාදයන්ගෙ ගෙවල් මුර කරනවා ඇරෙන්න වෙන වැඩක් ඉතිරි වෙන්නෙ නෑ. ඒ වගේම මේ පරාජයන් දරාගන්න අද වෙනකොට ලංකාවෙ ක්රීඩා ලෝලීන් හොඳටෝම හුරුවෙලා ඉවරයි.
හැබැයි මේ වතාවෙ වෙන්නෙ ලංකාවෙ ක්රීඩාවෙ අපි කිසිසේත්ම බලාපොරොත්තු නොවුණු ආකාරයේ අප්රසන්න දෙයක්. ඒ තමයි ක්රීඩකයන්ගෙ විනය ගැන ආපු අලුත්ම නරක ආරංචිය. දැන් අපි ක්රීඩකයන්ගෙ විනය ගැනත් එහෙමටම කියන්න ප්රශ්න නෑ. මොකද මෙයාලා විනය කඩකරන එක විලාසිතාවක් කරගෙන. එහෙම විනය කඩකරලා අහවර වෙලා මැච් එකක පනහක් ගැහුවාම රටේම ඉන්න ක්රීඩා ලෝලීන්ට පලු යන්න බැනලා ලොකු ටෝක් එකක් දෙනවා. එයාලා කියන්නෙ ක්රිකට් දන්න අයට තේරෙනවා කියලා.
කොහොම නමුත් පසුගිය දවසක මරු වැඩක් වුණා. හැමදාම විනය කඩකරමින් බලධාරීන්ට වෙට්ටු දාපු විනයක් නැති ක්රීඩකයන්ගෙ රෙදි ප්රසිද්ධියේ ගැළවුණා. හැබැයි ඒ රෙදි ගැළෙව්වෙ ලංකාවේ ක්රීඩා ලෝලියෙක්. දිගින් දිගටම තරග පරාජය වුණු අපේ කට්ටිය ලන්ඩන් වීදියක් දිගේ ඔට්ටු සෙල්ලම් කරන විදිය ඔහු දැක්කා.
මේ කරමින් හිටපු සෙල්ලම මොකක් වුණත් එයාලා ඒ රටට කරන්න ආපු සෙල්ලම හරියට නොවන නිසා අපේ ක්රීඩා ලෝලීන්ට මේ ක්රීඩකයො ගැන තිබුණේ අප්රසන්න හැඟීමක්. මේ සිදුවීමට මුහුණ දෙන්නෙ නසීර් නිස්තාර් කියන ශ්රී ලාංකිකයා. මේ නම අහපු ගමන්ම ඔබට තේරේවි ඔහු මුස්ලිම් ජාතිකයෙක් කියන එක. හැබැයි සිංහල, දෙමළ, මුස්ලිම් මොකක් වුණත් ඔහු ශ්රී ලාංකිකයෙක්. බැලූ බැල්මට පේන්නෙ ඔහු නිකම්ම නිකන් ශ්රී ලාංකිකයෙක් නෙවෙයි, ලොකු ‘ක්රිකට්’ ඇම්මක්, රට ගැනත් ලොකු ආදරයක් තියෙන කෙනෙක් කියලා. ඔහුගෙ ෆේස්බුක් ගිණුමේ හැම තැනකම වගේ තියෙන්නේ ජාතික කොඩි. ඒ වගේම ඔහුට ක්රිකට් සම්බන්ධවත් විශාල උනන්දුවක් තියෙන විත්තිය මේ ගිණුම දැක්කම පැහැදිලි වෙනවා. මේ හාදයා කීප වතාවක්ම ශ්රී ලංකා කණ්ඩායම ක්රීඩා කරන තරග එහෙමත් බලන්න ගියපු කෙනෙක්. එහෙම ගියපු නිසා මෙහෙම අපේ අයියලා ගැන විශාල ආදර ගෞරවයක් ඇතිවුණා වෙන්නත් පුළුවන්.
“අද රාත්රියේ ඩර්හම්හිදී දැකලා පුරුදු මුහුණු ටිකක්. ඔවුන් ඔවුන්ගේ සංචාරය භුක්ති විඳිමින්. මේ අය ඇත්තටම ඇවිල්ලා තියෙන්නෙ ක්රිකට් ගහන්න නෙවෙයි. මේ වීඩියෝව ගත්තේ ඉරිදා රාත්රී 11.28ට. මේ ක්රීඩකයන් තමන්ගේ ක්රීඩාවට සාධාරණයක් නොකරන නමුත් ඔවුන් ඔවුන්ගේ රාත්රිය භුක්ති විඳිමින්…” කියලා ඔහු සිය ෆේස්බුක් ගිණුමේ ඉංග්රීසි බසින් සටහනක් තියලා මේ වීඩියෝව සහ පින්තූර එක් කරලා තිබුණා. ඔහු කියලා තිබුණ “එංගලන්තයෙ ඉන්න ශ්රී ලාංකිකයො බොහෝ දෙනෙක් ඊළඟ තරගය නරඹන්නට එන්න සූදානමින්….” කියලා. ඒගොල්ලො එහෙම මැච් එක බලන්න සූදානමින් ඉන්න අතරෙ මේ කට්ටිය තමන්ගෙ ලෝකෙ විනෝද වෙනවා. මතක තියාගන්න, මේ ක්රීඩකයො මෙහෙම ක්රීඩාංගණයෙදි අසමත් වෙන්න හේතු වෙන්නේ මේ නොමනා හැසිරීමමයි කියලා හිතන්න පුළුවන්.
කොහොම නමුත් මේ ශ්රී ලාංකික තරුණයා එංගලන්තයේදී කරපු මේ වැඩේ සම්බන්ධයෙන් විදෙස්ගත ශ්රී ලාංකිකයො දහස් ගණනක් ස්තුති කරලා තිබුණා. ඇත්තටම වෙලා තියෙන්නේ ඔහු මේ වීදියක් දිගේ තමන්ගෙ වාහනය පදවාගෙන යනකොට ඩර්හම්වලදී මේ ක්රීඩකයො තුන්දෙනාව දැකපු එක. ඔහු ඔවුන්ව රූගත කරන්නෙ මේ වගේ විශාල දෙයක් වෙයි කියලා නෙවෙයි. සාමාන්යයෙන් ක්රිකට් උණ තියෙන කෙනෙක්ට ජාතික කණ්ඩායමේ ක්රීඩකයන්ව දකින්න ලැබීම විශේෂ දෙයක්. ඒ නිසයි ඔහුට මේක විශේෂ වෙන්නෙ. ඒත් අවාසනාවකට මේ වීඩියෝව එළියට ආවට පස්සෙයි මේ ක්රීඩකයො කරපු වරදෙ විශාලත්වය පැහැදිලි වෙන්නේ.
කොහොම හරි මේ ශ්රී ලාංකිකයට ස්තුති කරපු තැන්වල සිංහල, දෙමළ, ඉංග්රීසි භාෂා තුනේම කමෙන්ට්ස් තිබුණා. ඉතාම සුළු පිරිසක් ඇරුණම බොහෝ දෙනෙක් ස්තුති කරලා තිබුණා.
ජීවන පහන් තිළිණ
