දකුණේ නම ගිය අපරාධකරුවෙක් ලෙස කුප්රකට වූ වම්බොට්ටාගේ හොඳම ගෝලයෙක් වන්නේ ආමි සුරංගය. ඔහු ඌවේ රජකළ පාතාල අපරාධකරුවෙකි. වම්බොට්ටා සටන් කළේ සූරියවැව භීෂණයක් වපුරමින් අහිංසක ජීවත හැට හැත්තෑවක් බිලිගත් රත්නවීර සහෝදරයන්ට එරෙහිවය. රත්නවීර සහෝදර පුරුකේ වැඩකරුවා වූ සුනිල් රත්නවීරව බන්ධනාගාර බස් රථයකට පහරදී පැහැරගෙන ගොස් සූරියවැව නගර මධ්යයේ වෙඩි තබා සිරුර දමා යාමෙන් පසු වම්බොට්ටා නිහඬ විය. එතැන් සිට ඔහුගේ නමින් කප්පම් ගත්තේත්, අපරාධවල නිරතවූයේත් ආමි සුරංගය. ව්යාපාරිකයන් පැහැරගෙන ගොස් වදදෙමින් ඔහු ලක්ෂ විසි පහේ කප්පම් පවා ගත්තේය. වම්බොට්ටාගේ නම එම අපරාධවලට සම්බන්ධ බව එකල පොලීසිය කියන විට සැබෑ අපරාධකරුවන් අල්ලා ගස් බැඳ පොලීසියට භාරදුන්නේ වම්බොට්ටාය. මේ නිසාම වම්බොට්ටා සහ ආමි සුරංග අතර ඇතිවන්නේ ගැටුමකි. එම ගැටුමෙන් ජය ගන්නේ ආමි සුරංගය. කොස්ගම පුවක්පිටියේදී වම්බොට්ටා ගමන් කරමින් සිටි වෑන් රථයක් හඹාගොස් වෙඩි තබා ඔහුව ඝාතනය කරමිනි.
එදා එම ඝාතනය සම්බන්ධයෙන් පරීක්ෂණ පවත්වන ලද්දේ අපරාධ පරීක්ෂණ දෙපාර්තමේන්තුවේ සමූහ මංකොල්ලකෑම් විමර්ශන ඒකකය විසිනි. එහි ස්ථානාධිපතිවරයා ලෙස සේවයේ නිරත වූයේ ප්රධාන පොලිස් පරීක්ෂක ලසන්ත රත්නායකය. ස්විට්ස්ර්ලන්තයට මේ වන විට පළාගොස් සිටින ආන්දෝලනාත්මක චරිතයක් වන පොලිස් පරීක්ෂක නිශාන්ත ද සිල්වාද ඒ කණ්ඩායම නියෝජනය කළේය. හේමකුමාර නැමැති කොස්තාපල්වරයෙක්ද මේ කණ්ඩායමේ රැඳී සිටියේය. මේ කණ්ඩායමේ විමර්ශන නිලධාරියා වූයේ පොලිස් අධිකාරීවරයෙක් වූ සේනක කුමාරසිංහය. මෙම කණ්ඩායම දීර්ඝ විමර්ශනයකින් අනතුරුව වම්බොට්ටාගේ ඝාතනයට සම්බන්ධ හමුදාවේ සාමාජිකයින් පිරිසක් අත්අඩංගුවට ගන්නේ වෙඩි තැබීමට යොදාගත් ගිනි අවිද සමගිනි. එම විමර්ශනයේ දිගුවක් ලෙස මෙම කණ්ඩායම සීසර් කපිල නැමැති දකුණේ නම ගිය තවත් අපරාධකරුවෙකුගේ අභිරහස් ඝාතනයක්ද අනාවරණය කර ගත්තේය. සීසර් කපිල නැමැත්තාද වම්බොට්ටාගේ කණ්ඩායමේ සිටියෙකි. ඔහුව මරාළලදමා තිබියදී සොයා ගන්නේ ඇඹිලිපිටිය පැත්තේ කෙසෙල් වගා බිමකිනි. ඒ පිටුපසද සිටියේ ආමි සුරංගය.
එතැන් සිට මේ පොලිස් කණ්ඩායම ආමි සුරංග පසුපස පැන්නුවේය. ආමි සුරංගව කොටුකර ගන්නට හැකියාව ලැබෙන්නේ 2006 වසරේදීය. ඒ සෙවනගල පිහිටි ඔහුගේ බිරියගේ නිවසේදීය. ඒ වන විට නිවසේ නිදාසිටි ඔහුව අල්ලාගන්නා අපරාධ පරීක්ෂණ දෙපාර්තමේන්තුවේ පොලිස් කණ්ඩායම ඔහුව ආයුධ පෙන්වන්නට නිවස පිටුපස ඇති කෙසෙල් කොරටුව වෙත රැගෙන ගියේය. බෝම්බයක් ගසා පළා යන්නට සූදානම් වන විට වෙඩි තැබුවේ යැයි කියා එම ඝාතනය සාධාරණ කරන්නට පොලීසිය පියවර ගත්තේය. එහෙත් එය එසේ නොවන බවත් සිය බෑණැව පොලීසිය රැගෙන ගොස් වෙඩි තබා ඝාතනය කළ බවත් ඇසින් දුටු සාක්ෂිකරුවෙක් මතුවිය. ඔහු ආමි සුරංගගේ මාමාය. එම සාක්ෂිය පදනම් කරගෙන 2019 වසරේදී නීතිපති දෙපාර්තමේන්තුව විසින් අපරාධ පරීක්ෂණ දෙපාර්තමේන්තුවේ අධ්යක්ෂවරයාට දැනුම් දෙන්නේ නිශාන්ත සිල්වා ඇතුළු එම නිලධාරින් කණ්ඩායම අත්අඩංගුවට ගෙන ඇඹිලිපිටිය අධිකරණයට ඉදිරිපත්කරන ලෙසය. ඒ වන විට නිශාන්තද සිල්වා සිටියේ පැවැති ආණ්ඩුවේ ආශිර්වාදය ඇති බලවතෙක් ලෙසිනි. මහින්ද රාජපක්ෂ ආණ්ඩුවට එරෙහි විමර්ශන ගණනාවකට නායකත්වය දුන්නේ ඔහුය. ඒ නිසාම ඔහුට එරෙහිව නීතිපති ලබාදුන් උපදෙස ක්රියාත්මක වූයේ නැත.
නීතිපති දෙපාර්තමේන්තුව අවස්ථා ගණනාවකදීම ඔහු ඇතුළු පිරිස අත්අඩංගුවට ගන්නා ලෙස දැනුම් දුන්නත් ඔහුගේ ආරක්ෂාවට පළිහක් වූයේ එවකට අපරාධ පරීක්ෂණ දෙපාර්තමේන්තුවේ අධ්යක්ෂවරයා වූ ජ්යෙෂ්ඨ පොලිස් අධිකාරී ශානි අබේසේකරය. නීතිපති දෙපාර්තමේන්තුව සමග ඔහු නිශාන්ත සිල්වා වෙනුවෙන් සටන් කරන්නට වූයේ ආමි සුරංගගේ ඝාතනය පුද්ගලික ආරක්ෂාව සදහා ගත් පියවරක් ලෙසිනි. කෙසේ වෙතත් සියල්ල කණපිට පෙරලෙන්නේ ආණ්ඩු වෙනසත් සමගිනි. නිශාන්ත සිල්වා රට පනින්නේද මෙම සිදුවීමෙන් තමන්ට ගැලවිල්ලක් නොමැති බව දැන සිටි නිසා වන්නට පුළුවනි. කෙසේ වෙතත් නැවතත් නීතිපති දෙපාර්තමේන්තුව අපරාධ පරීක්ෂණ දෙපාර්තමේන්තු අධ්යක්ෂකවරයාට නිශාන්ත සිල්වා ගැන මතකයට නගන්නේ ඉකුත් සතියේදීය. එහෙත් දැන් නිශාන්ත සිල්වා රටේත් නැත. ඔහු සිටින්නේ ස්විට්සර්ලන්තයේ දේශපාලන රැකවරණය ලබමිනි. ඔහු සමග චෝදනා ලැබ සිටින සෙසු නිලධාරීන් දෙදෙනාට එරෙහිව නීතිය අද හෙට ක්රියාත්මක වනු ඇත. නිශාන්ත සිල්වාට එරෙහිව ජාත්යන්තර පොලීසිය මගින් රතු වරෙන්තුවක් ගැනීමේ සැලසුමක්ද මේ වන විට ක්රියාත්මකය. ඊට අවශ්ය අධිකරණමය කටයුත්ත වැඩි කලක් නොයා සිදුවනු ඇත.
රුවන් වෙඩිවර්ධන
