ශ්රී ලංකා පොලීසියේ වාර්ෂිකව දස දහස් ගණන් නිලධාරීන්ට ස්ථාන මාරුවීම් ලැබුණත් එම ස්ථාන මාරුවීම්වලට එරෙහිව ජනතාව පෙළ ගැසෙන්නේ අතලොස්සක් නිලධාරීන් පමණි. සහකාර පොලිස් අධිකාරී එරික් පෙරේරා ඒ අතලොස්සක් අතර සිටියෙකි. දංකොටුව සහ වෙන්නප්පුව පොලිස් බලප්රදේශ දෙක භාරව කටයුතු කළ එරික් පෙරේරා තමන් එහි සේවය කළ කාලය තුළ පිරිසදු කළේ අපරාධකරුවන්ටත් නීති විරෝධි ජාවාරම්කරුවන්ටත් හිස ඔසවන්නට ඉඩක් නොතබමිනි. ඊට ඔහුට ශක්තියක් වූයේ ඔහු යටතේ ක්රියාත්මක වූ නිලධාරීන් පස් දෙනෙකුගෙන් සමන්විත විශේෂ පොලිස් කණ්ඩායමකි. එරික්ගේ මාරුවත් සමග එම නිලධාරීන් පස් දෙනාත් සීසීකට මාරුකර යැවෙන්නේ නැවතත් ඔවුන්ට එකට එකතුව වැඩක් කරන්නට ඉඩක් නොතබමිනි.
දේශපාලනඥයෙකුගේ ලියුමකින් එරික්ව දංකොටුවෙන් සහ වෙන්නප්පුවෙන් පන්නා දැමීමෙන් පසු පොලීසිය භාර ඇමතිවරයා පවසන්නේ එරික්ට එරෙහිව චෝදනා ඇති බැවින් ඒ සම්බන්ධයෙන් විමර්ශනයක් සිදුකරන බවත්, එතෙක් එම ස්ථාන මාරුව ලබාදුන් බවත්ය. එරික් සම්බන්ධයෙන් ඇති එකම චෝදනාව වන්නේ ඔහු දේශපාලන ගැත්තෙක් නොවී පොලීසියේ රාජකාරිය නීතියට අනුව අකුරට ක්රියාත්මක කිරීමය. ඔහු දේශපාලනඥයන්ගේ අණට කීකරුවෙමින් දංකොටුවේත් වෙන්නප්පුවේත් කසිප්පු ජාවාරම්කරුවන්ට නිදහසේ එම ඡාවාරම කරගෙන යන්නට ඉඩ දුන්නේ නම් අදටත් ඔහු සිටින්නේ එහිමය.
එරික්ගේ ස්ථාන මාරුවීමෙන් පසු ඒ හිඩැසට පත්කළ නිලධාරියා ගැන පොලීසිය භාර ඇමතිවරයා ඉන්නේ මහත් ආඩම්බරයෙනි. ඇමතිවරයා පවසන්නේ එරික්ට වඩා හොඳින් ඔහු රාජකාරියේ නිරතව සිටින බවය.
එරික් ඔහුගේ පොලිස් සේවා කාලය තුළ පගාව ගත් බවක් හෝ දූෂණයට අත වැනූ බවක් ඇසෙන්නට නැත. දංකොටුව සහ වෙන්නප්පුවේ සහකාර පොලිස් අධිකාරී පොලිස් අධිකාරීවරයා ලෙස ඔහු වැඩ භාරගැනීමෙන් පසු පොලීසි දෙකේ ස්ථානාධිපතිවරු, රථවාහන අංශයේ ස්ථානාධිපතිවරු සහ දූෂණ මර්දන අංශයේ ස්ථානාධිපතිවරු කැඳවා තුන්වේලටම තමාට කන්න බොන්න දෙන්නැයි කීවේ නැත. එරික් ගැන දේශපාලනඥයන්ට ආඩම්බරයක් නැත්තේ ඒ නිසා විය හැකිය.
දංකොටුවේත් වෙන්නප්පුවේත් හොර අරක්කු ජාවාරම සහ නීතිවිරෝධී ක්රියා එරික් පෙරේරා පාලනය කළේ ඔහු යටතේ ක්රියාත්මක වූ නිලධාරීන් පස්දෙනාගේ විශේෂ කණ්ඩායම විසිනි. එරික්ගේ නික්ම යාමත් සමග දේශපාලන ආශිර්වාදයෙන් දංකොටුවේත්, වෙන්නප්පුවේත් ජාවාරම්කරුවන් කසිප්පු පෙරන්නට ගත්තේ ප්රසිද්ධියේය. ගෝඩා රා බවට පත්කරමින් මෙරට ප්රධාන පෙළේ ස්කාගාර වෙත අලෙවි කරන්නටද ගත්තේය. වසා දමා තිබුණු ගණිකා නිවාස සහ සම්බහන ආයතන නැවත විවෘත වන්නට ගත්තේය. ඊට එරෙහිව වෙන්නප්පුවේත්, දංකොටුවේත් පූජකවරු පෙරටුකරගත් ජනතාව මහ මගට බසින්නට සූදානම්වන විට පොලිස් බලධාරීන්ට සිදුවන්නේ කොළඹින් විශේෂ කණ්ඩායම් යවා මෙහෙයුම් කරන්නටය. ඒ අනුව පොලිස්පති යටතේ ක්රියාත්මක වලානේ පිහිටි මධ්යම දූෂණ මර්දන ප්රහාරක බළකායේ නිලධාරීන් 50ක කණ්ඩායමක් සතියක් තිස්සේම රැඳී සිටින්නේ වෙන්නප්පුවේ සහ දංකොටුවේය. ඊට අමතරව හලාවත කොට්ඨාසය භාර පොලිස් අධිකාරීවරයා යටතේද නිලධාරීන් 72 ක් යොදා ඇත්තේ හය දෙනා බැගින් වූ කණ්ඩායම් 12 ක් ලෙසිනි. එම කණ්ඩායම් 12 ද මේ වන විට දංකොටුවේත් වෙන්නප්පුවේත් කසිප්පු ජාවාරම්කරුවන් සොයමින් මෙහෙයුම්වල නිරතවන්නේ එදා නිලධාරීන් 05 දෙනාගෙන් එරික් කළ කටයුත්තමය.
රුවන් වෙඩිවර්ධන
