නෙවිල් ප්රනාන්දු රෝහල රජයට පවරාගැනීම පිළිබඳ කෙරෙන විමර්ශනයක් සඳහා සෞඛ්ය, පෝෂණ හා දේශීය වෛද්ය අමාත්ය දොස්තර රාජිත සේනාරත්න මහතා පසුගිය 24 වැනිදා ජනාධිපති පරීක්ෂණ කොමිෂන් සභාව ඉදිරියේ පෙනී සිටින ලදී. එහිදී අමාත්යවරයා සඳහන් කළේ නෙවිල් ප්රනාන්දු ශික්ෂණ රෝහල කොළඹ නැඟෙනහිර ශික්ෂණ රෝහල නමින් රජයට පවරා ගැනීම සඳහා 2019 අගෝස්තු 13 වැනිදා කැබිනට් පත්රිකාවක් කැබිනට් මණ්ඩලය වෙත ඉදිරිපත් කළ බවයි.
ඒ සඳහා කැබිනට් මණ්ඩලයේ අනුමැතියද හිමිවූ බවයි. මේ පිළිබඳ සැලකිල්ල යොමුකළ කොමිෂන් සභාව කැබිනට් ලේකම්වරයාට නියෝග කළේ අදාළ කැබිනට් පත්රිකාව ජනාධිපති පරීක්ෂණ කොමිෂන් සභාව වෙත ඉදිරිපත් කරන ලෙසයි. ඊට පසු දින (25දා) කැබිනට් ලේකම්වරයා නියෝජනය කරමින් කැබිනට් කාර්යාලයේ ජ්යෙෂ්ඨ සහකාර ලේකම් ජූඞ් නිලුක්ෂාන් මහතා කොමිෂන් සභාවට අදාළ අනුමත කරන ලද කැබිනට් පත්රිකාව ඉදිරිපත් කරනු ලැබීය.
කොමිසමේ සභාපති, හිටපු ශ්රේෂ්ඨාධිකරණ විනිසුරු උපාලි අබේරත්න මහතා ප්රමුඛ සාමාජික මණ්ඩලය සඳහන් කළේ රෝගීන් වෙනුවෙන් අමාත්ය දොස්තර රාජිත සේනාරත්න මහතාගේ අරමුණ ඉතා ප්රශස්ත හා ප්රශංසනීය බවයි. කොමිසමේ සභාපතිවරයා සඳහන් කළේ තමාද නෙවිල් ප්රනාන්දු රෝහලෙන් සේවා ලබාගෙන ඇති බවත්, එය ඉතා හොඳ රෝහලක් බවයි. අවශ්ය වන්නේ රෝහල ක්රමවත් ආකාරයෙන් රජයට පවරාගැනීම බවයි. අදාළ පවරාගැනීම් පටිපාටියට නාගරික සංවර්ධන අධිකාරිය සමඟ එක්ව කටයුතු කළ හැකි බවයි.
2017 වසරේදී නාගරික සංවර්ධන අධිකාරිය මගින් ලිපියක් යොමුකරමින් කියා තිබුණේ කැබිනට් පත්රිකාවක් මඟින් අදාළ පවරාගැනීම සිදුකිරීමට හැකියාව ඇති බවයි. ඒ, එවකට සිටි සෞඛ්ය අමාත්යාංශ ලේකම්වරයා වෙතයි. නමුත් පසුගිය වසර 4ක කාලය තුළ සෞඛ්ය අමාත්යාංශය තුළ අමාත්යාංශ ලේකම්වරු 5 දෙනකු කටයුතු කිරීමද ගැටලුසහගත තත්ත්වයකි. කෙසේ වෙතත් 2017 වසරේ අගෝස්තු මස සිට 2019 වසරේ අගෝස්තු මස දක්වා වසර 2ක කාලය තුළ නෙවිල් ප්රනාන්දු රෝහලෙන් නිදහස් සෞඛ්ය සේවාව යටතේ නොමිලේ ප්රතිකාර ලබාගත් රෝගීන් සංඛ්යාව 4,95,000කි. ඒ අතර බාහිර රෝගී අංශයෙන් රෝගීන් 173,185ක්, ප්රාථමික ප්රතිකාර ඒකකයෙන් රෝගීන් 31,888ක්, නේවාසික රෝගීන් 34,352ක් සහ පෞද්ගලික වෛද්ය හමු 86,010ක් ඇතුළු නොමිලේ ප්රතිකාර සේවා ලබාගත් තවත් බොහෝ පිරිසක් වේ.
අදාළ කාලය තුළ රජය මඟින් කිසිදු අමතර වියදමක් දරා නොමැති අතර සියලු වියදම් ප්රතිකාර සේවා පවත්වාගෙන යෑම සඳහා පමණක් සිදුකර ඇත. සෞඛ්ය අමාත්යාංශයේ ප්රධාන මූල්ය නිලධාරිතුමන් සහ අධ්යක්ෂ ජනරාල් (මුදල්) විසින් ජනාධිපති පරීක්ෂණ කොමිෂන් සභාව වෙත ලිඛිතව වාර්තා කර ඇත්තේ වෛද්ය නෙවිල් ප්රනාන්දු මහතා වෙත හෝ ඔහුගේ ණය පියවීමක් හෝ පවරාගැනීම සඳහා කිසිදු ගෙවීමක් සිදුකර නොමැති බවයි.
