කොප් ලොක්කා මෝඩි!

“හායි මෝදි, භාරත් කා ගෙහ්නා” යනුවෙන් ගායනා කරමින් ස්කොට්ලන්තයේ, ග්ලාස්ගෝව් නගරයේ “ග්ලාස්ගෝව්” හෝටලයේ පැවැති “දේශගුණික විපර්යාසය පිටුදැකීමේ එක්සත් ජාතීන්ගේ සමුළුවට” (කොප් 26) ගිය අවස්ථවේ රැස්ව සිටි පිරිස ඔල්වරසන් හඬින් භාරත අගමැතිවරයා උණුසුම් ලෙස පිළිගනු ලැබුවේ ඒ අන්දමිනි.

පසුගිය ඔක්තෝබර 31 වැනිදා ආරම්භවී නොවැම්බර් 14 වැනිදා අවසන්වූ සමුළුවට රාජ්‍ය නායකයන් දෙසීයක් දෙනා සහභාගිවී සිටියහ.

පරිසරවේදීන්ගේ මතයට අනුව “කොප් 26” සමුළුව වනාහි ගෝලීය උෂ්ණත්වයෙන් ලෝකය බේරාගැනීමට ඇති එකම අවස්ථාවය. සමුළුව “ලෝක නායකයන්ගේ සමුළුව” ලෙසින්ද හැඳින්වේ.

ප්‍රංශයේ ප්‍රධානත්වයෙන් පරිසර සමුළුවක් 2015 දී පැරිසියේ පැවැත්වූ අවස්ථාවේ එවකට ඇමෙරිකා ජනාධිපති වූ බැරැක් ඔබාමාද, භාරත අගමැති නරේන්ද්‍ර මෝදිද ඊට සහභාගි වූහ. ලොව බලවත් රටවල සියලු නායකයෝද එම සමුළුවට සහභාගි වූහ.

ගෝලීය උෂ්ණත්වය අවම මට්ටමින් පවත්වාගෙන යාම සඳහා උෂ්ණත්වය සෙල්සියස් අංශක එකයි දශම පහකට අඩු මට්ටමෙන් පවත්වා ගෙන යායුතු බව එහිදී තීරණය විය.
නරේන්ද්‍ර මෝදි කොප් 26 සමුළුවට වෙන් කළ කාලය දින දෙකකි.

ඊට පෙර අගමැතිවරයා රෝමයේ ජී-2 සමුළුවටද සහභාගිවී තිබේ. එහි පළමු සැසිය විවෘත කර ඇත්තේද අගමැති මෝදිය.

එහිදී හෙතෙම ඇමෙරිකානු ජනාධිපති ජෝ බයිඩන්, ප්‍රංශ ජනාධිපති ඉමෑනුවෙල් මැක්රොන්, බි්‍රතාන්‍ය අගමැති බෝරිස් ජොන්සන්, කැනඩා අගමැති ටෲඩියෝ සහ ඉන්දුනීසියානු ජනාධිපති ජෝකෝ විඩෝ ඩෝ යන රාජ්‍ය නායකයන්ද ලෝක සෞඛ්‍ය සංවිධානයේ අධ්‍යක්‍ෂ ජනරාල් ටෙඩ්රෝස් ඇඩ්හැනම්, එක්සත් ජාතීන්ගේ මහ ලේකම් ඇන්ටෝනියෝ ගුට්ටේ‍රස් සහ ජර්මන් චාන්සලර් ඇන්ජෙලා මාර්කල් යන රාජ්‍ය තාන්ත්‍රිකයින්ද මුණගැසුණේය.

ජී-20, එම සමුළුව ඉතාම ප්‍රතිඵලදායක එකක් බව ඒ පිළිබඳ අදහස් දක්වමින් මෝදි කීවේය.

“කොවිඩ් වසංගතය පිටුදැකීම,සෞඛ්‍ය යටිතල පහසුකම් මෙන්ම ආර්ථික සහයෝගිතා ප්‍රවර්ධනය යන කරුණු පිළිබඳ එහිදී දීර්ඝ ලෙස සාකච්ඡා කළා” යැයි ඒ පිළිබඳ අදහස් දක්වමින් මෝදි පැවැසුවේය.

එම සංචාරයේදී අගමැති මෝදි ප්‍රැන්සිස් පෝප්තුමා බැහැදැක එතුමාට ඉටිපන්දම් දල්වන රිදී රඳවනයක්, භාරතය පරිසරය ආරක්‍ෂා කිරීමට ක්‍රියාත්මක කරන ක්‍රමවේද පිළිබඳ ලියැවුණු ග්‍රන්ථයක්ද පිරිනැමුවේය.

පෝප්තුමා සමග අගමැතිවරයා ගතකළ පැයක පමණ කාලය අවසානයේදී පෝප්තුමාට ඉන්දියාවට පැමිණෙන ලෙසටදද ආරාධනා කෙළේය.

චන්ද්‍රසේන මාරසිංහ