ගෝඨාභය රාජපක්ෂ මහතා ජනාධිපති ධුරයට පත්වී දැන් මාස 2ක් ගෙවිලා ඉවරයි. මේ මාස දෙකට ආණ්ඩුව ජනප්රිය තලයේ තීන්දු, තීරණ රැසක් මෙන්ම ජනතාවට සහන සලසන තීන්දු, තීරණ රැසක් ගත් බවත් පෙනෙන්නට තිබුණා. හැබැයි ඒ ගෙවුණු මාස දෙක තුළ රටේ ජනතාවට විවිධ ප්රශ්නවලට මුහුණ දෙන්න සිද්ධ නොවුණාම නෙවෙයි. සමහර ප්රශ්න ඉතා බරපතළ ඒවා වුණත් විපක්ෂය ඒවා ගැන යම් හඬක් නඟන බවක් අපට දැකගන්න ලැබුණා. ඒ මාස දෙකේ සති ගණනක්ම ගෙවිලා ගියේ මේ ප්රශ්නවලට පිළිතුරු හොයනවට වඩා වෙන වෙන මාතෘකාවලින්. පළමු සති දෙක තුන ‘ස්විස්’ සිද්ධිය නිසා මාධ්ය සියල්ලම උදේ, දවල්, රෑ කතා කළේ මේ ගානියා බැරිස්ටර් ෆ්රැන්සිස් ගැන. ඒක ඉවර වෙද්දීම ආවේ චම්පික රණවක අත්අඩංගුවට ගැනීමේ සිද්ධිය. ඒකත් සතියක් ඇදිලා ගියා. ඊළඟට රාජිත සේනාරත්නගේ සිද්ධිය. ඒකත් සති 2ක් තිස්සේ ජනමාධ්ය ඇදගෙන ගියා. දැන් අලුත්ම කතාව තමයි රන්ජන්ගේ හඬපට. දැන් මාධ්ය උදේ, දවල්, රෑ බලන්නෙ නැතිව රන්ජන්ගෙ හඬපට පට්ටගහන්න අරන් තියෙන නිසා ජනතාවගේ සැබෑ ප්රශ්න ගැන ඒ හැටි අවධානයක් තියෙන බවක් පේන්න නැහැ. ප්රධාන විපක්ෂය වෙච්ච එක්සත් ජාතික පක්ෂයත් මේ දවස්වල නායකත්ව ප්රශ්නයක පැටලිලා ජනතා ප්රශ්න වෙනුවට පුටු ප්රශ්න ගැන තමයි කතා කරන්නේ. එහෙම තියෙද්දී ජනතා විමුක්ති පෙරමුණේ බිමල් රත්නායක පසුගිය සතියේ ප්රවෘත්ති සාකච්ඡාවක් කැඳවලා රටේ ජනතාවගේ සැබෑ ප්රශ්න කිහිපයක් ගැන ආණ්ඩුවේ අවධානය යොමු කළා. මාධ්යයත් මේ දවස්වල මල්වෙඩි සන්දර්ශන පෙන්නන නිසා බිමල්ගේ මේ ජනතා ප්රශ්න ගැන කතා කරපු මාධ්ය සාකච්ඡාවට එතරම් අවධානයක් දුන්නේ නැහැ. ඒ නිසා අප මෙවර ‘මව්රට’ පත්තරෙන් බිමල් ඒ කතා කළ ජනතා ප්රශ්න කෙටියෙන් වාර්තා කරන්න කටයුතු කළා. ඒ විතරක් නෙවෙයි ආණ්ඩුවේ මාධ්ය ප්රකාශකවරයා වෙච්ච අමාත්ය රමේෂ් පතිරණ මහතාගෙන් ඊට උත්තර ලබාගන්නත් අපි කටයුතු කළා. මේ පළවන්නේ ඒ ප්රශ්නයි, උත්තරයි.
ආණ්ඩුව පත්වෙලා දැන් මාස 2ක් වෙනවා. රාජ්ය ආයතන 238කට සභාපතිවරු දාලා නැහැ. සමහර ඒවාට දේශපාලන හිතවතුන්, ඥාතීන්, පත් කළා කියලා චෝදනා. ඒ විද්වත් කමිටුවකින් ඒ පත්කිරීම් කරනවා කිව්වා. නමුත් දූෂණ, චෝදනා තියෙන අයත් මේ සභාපතිකම්වලට පත්කරලා තියෙනවා.
රජයේ ආයතනවලට සභාපතිවරුන් පත්කිරීමේදී සුළු සුළු ප්රමාදයන් ඇති වුණත් දැන් ඒවා සියල්ල යථා තත්ත්වයට පත්වෙලා. ජනතා විමුක්ති පෙරමුණේ අයට ඕනෑම දෙයක් කියන්න පුළුවන්. නමුත් මේව විධිමත්ව කරන නිසා ටිකක් බලාගෙන ඉන්න ඕනෑ.’ එහෙම දූෂණ චෝදනා තියෙන අය පත්කර ඇති ව හෙළිවුණොත් ඒ අය පසුව ඉවත් කරන්න හැකියාව තියෙනවා. අපේ රජයේ අදාළ තනතුරුවලට පුද්ගලයන් පත්කරන්නේ හොඳට සොයා බළලයි.
මහකන්නයේ දැන් පොහොර හිගයක් ඇවිත්. නොමිලේ පොහොර දෙනවා කිව්වට දැන් ගොවීන්ට පොහොර ගන්න පගාව දෙන්නත් වෙලා.
පසුගිය දිනවල පොහොර හිඟයක් තිබුණා. ඒකට හේතු වුණේ පසුගිය රජය කාලේ පොහොර සඳහා රුපියල් බිලියන හයක ණයක් ගෙවන්න තිබුණා. දැන් ඒ මුදලින් බිලියන තුනක් ගෙවලයි තියෙන්නෙ. ඉදිරි මාස කිහිපය තුළ පොහොර හිඟය නැති වෙනවා. පගාව දීල පොහොර ගන්න අවශ්ය වෙන්නෙ නැහැ.
ජනතා ප්රශ්න කතා කරන පාර්ලිමේන්තු දින ගණන සීමා කරන්න උත්සාහ ගන්නවා. ජනාධිපතිවරයාගේ ප්රතිපත්ති ප්රකාශය විවාදයට දුන්නේ වරු දෙකයි. ජනමාධ්ය උපයෝගී කරගෙන රටේ ප්රශ්න හංගන්න හදනවා?
පාර්ලිමේන්තු දින ගණන සීමා කිරීමට උත්සාහ ගැනීමක් තියෙන බව කියන එක මම ප්රතික්ෂේප කරනවා. අද තොරතුරු දැනගැනීමේ පනතට අනුව ඕනෑම අයකුට තොරතුරු දැනගන්න පුළුවන්. ඒවා වසන් කරන්න බැහැ. ඒ නිදහස ඕනෑම මාධ්යයකට තියෙන වරප්රසාදයක්.
බැඳුම්කර වාර්තාවේ වෝහාරික විගණනය රටට ඉදිරිපත් නොකරන්නේ පරණ හොරු අහුවෙයි කියන බයටයි?
ඔය අහල තියෙන ප්රශ්නයට උත්තරය පසුගිය අඟහරුවාදා පාර්ලිමේන්තුවේදී හෙළිදරව්වක් සිදුවුණා. ඔබත් සමහරවිට විiුත් මාධ්යවලින් දකින්නට ඇති. දැනටමත් කතානායකවරයා තීන්දු කරලා තියෙනවා. වෝහාරික විගණන වාර්තාව පාර්ලිමේන්තුවට ඉදිරිපත් කරන්න. බැඳුම්කරේට සම්බන්ධ හොරු ඉන්නේ එජාපය පැත්තේ කියලා සභානායකතුමා කිව්වා.
වතු කම්කරු වැටුප දහස කිරීම ඡන්ද ගුණ්ඩුවක්. ජනාධිපති නියෝගයෙන් මෙය කළ නොහැකියි. දැනටම වතු සමාගම් මෙය ප්රතික්ෂේප කර තිබෙනවා?
වතු කම්කරුවන්ගේ වැටුප රුපියල් දහස කිරීමේ ප්රශ්නය ගැන රජය අදාළ වතු සමාගම් සමඟ සාකච්ඡා කරගෙන යනවා. ඒ ප්රශ්නය අද හෙටම විසඳුමකට එන්න හැකිවේවි.
ප්රේමලාල් විජේරත්න
