ලෝකයේ කලින් කලට සිටි විවිධ අනාවැකිකරුවන් විසින් ලෝකයේ සිදුවන්නට තිබෙන විවිධ විනාශයන් ගැන අපූරු අනාවැකි කියා ඇත. වසර දහස් ගණනකට පෙර සිටි ‘නොස්ට්රාඩොමාස්’ වැනි අනාවැකිකරුවන් සහ ‘බාබා වන්ගා’ වැනි අනාවැකිකාරියන්ද මේ අතර ලොව ප්රකටය. මැතිවරණයක් කිට්ටු වන විටම ශ්රී ලංකාවේද සිටින විවිධ සාස්තර සහ කේන්දරකාරයෝ විවිධ අනාවැකි කියති. ගාල්ල පැත්තේ සිටින එක්තරා ප්රකට කේන්දරකාරයකු එකල සිටි ජනාධිපති මහින්ද රාජපක්ෂ මහතාට අනාවැකි කියා ඔහු ගෙදරම යැව්වේය. එදා ‘මහින්ද මහත්තයා’ දිනනවා යැයි මේ බේගල් කේන්දරකාරයා කියූ අනාවැකිය ‘පට්ට කෙබරයක්ම’ විය. මහින්ද රාජපක්ෂ මහතාට මොහු තරම් විශ්වාසදායක කේන්දරකාරයකුද නොවීය.
කෙසේ හෝ අද ඔබට කියන්නට යන්නේ මෙලෙස බේගල් ඇද බාන ග්රහ සාත්තරකාරයන්ගේ කතාවක් නොවේ. මේ අපූරු අනාවැකිකරුවා ග්රහ සාත්තර ඉගෙනගත් මිනිසකු නොව, පෑන් තුඩ අතට ගෙන පොත් ලියන නවකතාකාරයෙකි. මේ නවකතාකාරයා ඉන්නේ ඇමෙරිකාවේය. ඔහු මෙයට දශක 4කට (වසර 40ක්) පෙර ලියා තැබූ නවකතාවක් අද ප්රබල සාක්ෂි දරන සත්යයක් බවට පත්වී ඇත. එදා ඔහු මෙම කතාන්දරය තම පෑන් තුඩින් ලියා ඇත්තේ, වසර 40කට පසුව ලොව සිදුවන මහා විනාශයක අනාවැකියක් ලියන්නාක් මෙන්ය. මෙය සැබෑ ලෙසම අදහාගැනීමට පවා අපහසු කතාන්දරයකි. එහෙත් එය අද සත්යයේ දොරකඩටම පැමිණි වගතුගකි.
අද මේ වන විට ලොව මිනිස් ජීවිත දහස් ගණනින් බිලිගෙන සහ බිලිගනිමින් තිබෙන අතිශය භයානක කොරෝනා වෛරසයේ සත්ය කතාන්දරය මෙම නවකතාකරුවා විසින් මෙයට වසර 40කට පෙර ලියා තැබුවේ අතිශය විස්මිත අයුරිනි. ඇමෙරිකාවේ සිටින ප්රකට සහ සම්මානනීය නවකතාකරුවකු වන ඩීන් කූන්ට්ස් Dean Countz විසින් 1981 වසරේදී ලියන ලද ‘ද අයිස් ඔෆ් ඩාර්ක්නස්’ (The eyes of darkness) හෙවත් ‘අන්ධකාරයේ දෙනෙත්’ නමැති නවකතාවට පාදකවී ඇත්තේ, ලොව මහත් විනාශයක් කරා ගෙනයනු ලබන රහස්, අත්භූත වෛරසයකින් සිදුවන මනුෂ්ය විනාශයක් ගැනය. එනම් දැනට ලොව පුරා මහත් විනාශයක් සිදුකරනු ලබන ‘කොවිඞ්-19’ (Covid-19) නමැති වෛරස් වසංගතයේ කතාවම මෙම නවකතාවට පාදකවී ඇත.
‘It was around then that a Chinese scientist named Li Chen defected to the United States carrying a diskette record of China’s most important and dangerous new biological weapon in a decare. They call the stuff ‘WUHAN-400’ because it was developed at the RDNS labs outside of the city od Wuhan. It was the four – hundrath viable strain of man-made microorganisms.’ පිටු 315කින් සමන්විත ‘Teh eyes of darkness’ (අන්ධකාරයේ දෙනෙත්) නමැති ග්රන්ථයේ එසේ එක් තැනක ඉංග්රීසි බසින් සඳහන් වන්නේ පුදුමාකාර වගතුගකි. එහි සිංහල අරුත මෙසේ ගෙනහැර දැක්විය හැකිය.
‘එම කාලයේදී තමයි ලී චෙන් නමැති චීන ජාතික විද්යාඥයකු පරිගණකමය ‘ඩිස්කට්’ වාර්තාවක් රැගෙන චීනයේ සිට ඇමෙරිකාවට එන්නේ. මේක තමයි පසුගිය දශක ගණනාවකදීම නිපදවනු අත්යාවශ්යම සහ භයානකම ජීව විද්යාත්මක අවිය, මේක හදලා තියෙන්නේ චීනයේ. මේකට නම තියලා තියෙන්නේ ‘වූහාන්-400’ කියලයි. ඒකට හේතු චීනයේ වූහාන් නගරයෙන් ඔබ්බෙහි ඇති විශාලතම ජීව විද්යා පර්යේෂණාගාරයේ තමයි මේක හැදුවේ. මිනිසා විසින් නිර්මාණය කරන ලද ක්ෂුද්ර ජීවීන් යොදාගෙන හැදූ මේ ජීව විද්යාත්මක අවිය හරිම ප්රබල එකක්. එහි 400 ගුණයකින් යුත් ජීවමය බලයක් තිබෙනවා.’
ලෝකයේ සිටින මිලියන ගණනාවක විවිධ නවකතාකාරයෝ, මිලියන ගණනාවක අනේක විදියේ නවකතා ලියා ඇත. එහෙත් ඒ මහා පොත් කන්දරාව අතරින් අද මෙම නිර්මාණය අපගේ දෙනෙත් නළලෙහි සිටුවා ඇත.
අද මුළු ලොවම මහත් භීතියෙන් හා ශෝකයෙන් මුසපත් කරවන ‘කොරෝනා වෛරස්’ වසංගතයේ කතාව මෙසේ ඒ ආකාරයෙන්ම වසර 40කට පෙර ලියා තැබීම අතිශය පුදුමාකාරය. අද ලෝකයේ තිබෙන අන්ධකාරයේ මහා නගරය වන චීනයේ ‘වූහාන්’ නුවර ආශ්රිත කරගෙන මෙම වෛරස් වසංගතය බිහිවන අයුරු ඩීන් කූන්ට්ස් ලේඛකයා ලියා තබා ඇත.
‘WUHAN-400 is a perfect weapon, It afflicts only human beings, No other living creature can carry it.’
‘වූහාන්-400 සත්ය ලෙසම නියම ආයුධයක්, එයින් හානි කරන්නේ මිනිසාට පමණයි. වෙනත් කිසිම ජීවී සත්වයකුට එය බලපාන්නේ නැහැ.’
මෙම අපූරු ග්රන්ථයේ ඇති ඉහත වැකියද අද සැබෑ ලෙසම මිහිමත සිදුව ඇති විනාශය කියාපායි. එනම් මෙම වෛරසය ප්රබල ජීව විද්යාත්මක අවියක් ලෙසින් පෙන්වා දෙයි. මෙයට මාස 2කට පෙර මෙම කොරෝනා වසංගතය ඇරැඹි විටදී ඉහත පොතේ සඳහන් ආකාරයෙන්ම වූහාන් නගරයේ පිහිටි විද්යාත්මක පර්යේෂණාගාරයක් ගැන බොහෝ කතා අසන්නට ලැබිණි. එනම් එහි ප්රබල ජීව විද්යාත්මක අවියක් සෑදීමට ගත් උත්සාහයේදී මෙම කොරෝනා වෛරසය ලොවට මුදා හැරුණු බැව්ය. ‘අන්ධකාරයේ දෙනෙත්’ නමැති නව කතාවට ප්රධාන ලෙස පාදක වන්නේ, එක්තරා මවක් තමන්ගේ ආදරණීය පුත්රයා හදිසියේම මියගිය පසු එයින් ඇයට ඇති වන ශෝකයත් සහ දැඩි කම්පනයත්ය. එම හැඟීම් දරා ගනිමින්ම ඇයගේ පුත්රයාගේ මරණය සිදුවූයේ කෙසේ දැයි ඇය සොයන්නට වෙහෙසෙන්නේ, එම මරණයට හේතුවක් වෛiවරුන් විසින් ප්රකාශ නොකරන හෙයිනි. ඇය මේ ගැන තවත් කණ්ඩායම්වල සහාය ඇතිව බොහෝ ගවේශණශීලීව සොයන්නට උත්සාහ දරන්නීය. අවසානයේදී මෙම වූහාන් වෛරසයේ වගතුග සොයාගන්නට ඇය සමත් වෙයි.
ප්රථමයෙන් එක් රටක් සහ ඉන් පසු ලොව වටා ඇති රටවල් රාශියක් මෙම භයානක වෛරසය නිසා විනාශයට පත්වන හැටි ‘ද අයිස් ඔෆ් ඩාර්ක්නස්’ ග්රන්ථයෙන් පෙන්වා දෙයි. අද වර්තමානයේද මෙම තත්ත්වය ඒ ආකාරයෙන්ම සිදුවන අයුරු දක්නට හැකිය. එනම් දැන් චීනයට අමතරව ලොව රටවල් 60කට මෙම කොවිඞ්-19 වෛරසය ව්යාප්තවී ඇත. චීනයේ පමණක් මරණ 3,000 ඉක්මවා ඇත. එහෙත් එය සැබෑ ගණන් හිලව්වක් නොව, චීන රජය සැබෑ මරණ ප්රමාණය වසන් කරන බැව්ද කරුණු ප්රකාශ වී ඇත. කෙසේ හෝ දැනට මාස දෙකක් ඉක්මවා ඇතත් මෙම භයානක වෛරසය මැඬලීමට හැකිවී නොමැත. මේ ආකාරයට අද ලොව බිලිගෙන ඇති භයානක, කුරිරු වෛරසයේ කතාන්දරය වසර 40කට පෙරදී නවකතාවකින් අනාවැකි පැවසීම කෙතරම් ආශ්චර්ය ජනකද? මෙම නව කතාව රචනා කළ නවකතාකරු වන ඩීන් කූන්ට්ස්ගෙන් මේ පිළිබඳව මාධ්යකරුවන් විමසා ඇත. එවිට ඔහු පවා මෙම වගතුග ගැන නිරුත්තරවී ඇත. ඔහු පවසා ඇත්තේ මෙය තමන් විසින් කල්පිතව සිතූ ප්රබන්ධ කතාවක් පමණක් බැව්ය. කතාවට අදාළව යම් සිදුවීම් කිහිපයක පමණක් කරුණු තමා සොයාගෙන තිබූ බවත්, එහෙත් ඉන් පසුව එය ප්රබන්ධයක් ලෙස නිර්මාණය කළ බවත් ඔහු කියා තිබේ.
ඩීන් කූන්ට්ස් ලේඛකයා මේ වන විට නවකතා සහ කෙටිකතා 115ක් පමණ ලියා ඇති අතර, ඔහු ප්රකට චිත්රපට තිරනාටක රචකයකුද වෙයි. ලොව වටා ඔහුගේ නවකතා පිටපත් මිලියන 450ක් අලෙවි වී ඇත.
ප්රියන්ත හෙට්ටිගේ