මැතිවරණ රාජකාරි සඳහා පැමිණෙන ඇතැම් රජයේ නිලධාරීන් ග්රාම නිලධාරීන්ගෙන් කටගැස්ම ඇතුළු සප්පායම් ලබාදෙන ලෙස බලකිරීම් සිදුකිරීම නිසා ඔවුන්ට ඒ සඳහා අතිරේක වියදම් දැරීමට සිදුවන බව ග්රාම නිලධාරීන්ගේ වෘත්තීය සමිති රජයේ වගකිව යුතු අංශ වෙත පැමිණිලි කොට තිබේ. (Sri Lanka Latest News)
ඒ පිළිබඳ මැතිවරණ කොමිසමද දැනුවත් කිරීමට කටයුතු යොදා ඇති බවද ‘මව්රට’ට වාර්තා වේ.
ඒ සම්බන්ධයෙන් පසුගිය බදාදා දහවල් එක්තරා විද්යුත් මාධ්ය ප්රවෘත්ති විකාශයකින්ද හෙළිවිය.
එවැනි අන්දමේ ඉල්ලීම් ඉල්ලා බලකරන නිලධාරීන්ට ඒවා ඉටු නොකළහොත් මැතිවරණ රාජකාරි අවස්ථාවලදී විවිධ හිරිහැරවලට භාජනය වන බවද ඇතැම් ග්රාම නිලධාරීන් තම වෘත්තීය සමිතිවලට දැනුම් දී ඇති බව සඳහන්ය.
පසුගිය ජනාධිපතිවරණ රාජකාරි සඳහා පැමිණි ඇතැම් රජයේ නිලධාරීන්ද එවැනි ඉල්ලීම් සිදුකර ඇති බවයි සඳහන් වන්නේ.
මේ සම්බන්ධයෙන් මැතිවරණ කොමිසමේ සභාපති ආර්.එම්.ඒ.එල්. රත්නායක මහතාගෙන් විමසූ විට ඔහු සඳහන් කළේ ඒ පිළිබඳ තමන් කඩිනමින් සොයාබලන බවයි.
මෙවර මහ මැතිවරණ රාජකාරි සඳහා පැමිණෙන කිසියම් රජයේ නිලධාරීන්ගෙන් ග්රාම නිලධාරීන්ට එවැනි බලපෑමක් සිදුවුවහොත් අදාළ ඡන්ද මධ්යස්ථානයද නම්කර මැතිවරණ කොමිසමට පැමිණිලි කරන ලෙසද ඔහු ඉල්ලීමක් කොට ඇත.
ඊට අදාළ රජයේ නිලධාරීන්ට විරුද්ධව ක්රියාමාර්ග ගන්නා බවද ඔහු පැවැසීය.
ප්රේමලාල් විජේරත්න
