බ්රහස්පති ග්රහයා 2019 නොවැම්බර් මස 05 වැනි කුජ දිනට එළිවන පාන්දර 05.25ට තම ස්වක්ෂේත්ර රාශියක් වන ධනු රාශියට පැමිණීමට නියමිතය. ගුරු ග්රහයා 2020 නොවැම්බර් 20 දක්වා ධනු රාශිය හරහා ගමන් ගනී. 2019 නොවැම්බර් 16 වැනි දින පැවැත්වීමට නියමිත ජනපතිවරණයට ඉදිරිපත් වන ගෝඨාභය රාජපක්ෂ මැතිතුමාගේත්, සජිත් ප්රේමදාස මැතිතුමාගේත් ජන්ම කේන්දර සටහන්වලට අනුව මෙම ගුරු මාරුව ඔවුන්ගේ මැතිවරණ ජයග්රහණයට කෙසේ බලපාන්නේ දැයි සොයා බලමු.
1949 ජුනි 19 වැනි ඉරිදා උපත ලැබූ ගෝඨාභය රාජපක්ෂ මැතිතුමාගේ ජන්ම පත්රයේ ගුරු ග්රහයා මකර රාශිය තුළ වක්රව, අංශක 07 කලා 01කින් පිහිටා ඇත. ගුරු මකර රාශියේදී නීච වන අතර, වක්රව යන ග්රහයා නීච වූ විට උච්ච බලය ලබා දෙන බවට ජ්යොතිෂ සිද්ධාන්තයක් පවතී. ඒ අනුව ගෝඨාභය මැතිතුමාගේ ගුරු ධනුට උච්ච බලයම ගෙන දීමට සමත් වෙයි. නොවැම්බර් 05 වැනි දින ගුරු පැමිණෙන්නේ ඔහුගේ වෘශ්චික ලග්න හිමි ජන්ම පත්රයේ ධනස්ථානය වන 2 වැන්නටය.
ග්රහයන්ගේ ගෝචර ඵල සිද්ධාන්ත සලකා බැලීමේදී ගුරු දෙවැන්නේ ගමන් කරන කාලය තුළදී කේන්දර හිමියාට තමන්ගේ ඥානය වැඩිවී, ගරු නම්බු, නිලතල ලැබී සතුරන් පරාජය කරමින් සමාජයේ ඉහළින්ම වැජඹීමට අවස්ථාව සැලසෙන බව සඳහන් වෙයි.
1967 ජනවාරි 12 වැනි බ්රහස්පතින්දා උපත ලැබූ සජිත් ප්රේමදාස මැතිතුමාගේ ජන්ම පත්රයේ ගුරු ග්රහයා වක්රව අංශක 07 කලා 09කින් පිහිටා ඇත. ගුරු කටක රාශියේදී උච්ච වන අතර, උච්ච ග්රහයා වක්ර වූ විට නීච බලය ලබා දෙන බවට ජ්යොතිෂ සිද්ධාන්තයක් පවතී. ඒ අනුව සජිත් මැතිතුමාගේ කේන්දරයේ ගුරු ග්රහයා ඔහුට ලබා දෙන්නේ නීච බලයකි. නොවැම්බර් 05 වැනි දින ගුරු පැමිණෙන්නේ ඔහුගේ මිථුන ලග්න ජන්ම පත්රයේ කේන්ද්රස්ථානයක් වන 7 වැන්නටය. ග්රහයන්ගේ ගෝචර ඵල සිද්ධාන්ත සලකා බැලීමේදී ගුරු 7 වැන්නේ ගමන් කිරීමෙන් කේන්දර හිමියාට සාමාන්ය දියුණුවක්ද, අලුත් දේ ඉගෙනීමට අවස්ථාවද, දේශපාලන කටයුතුවල දියුණුවක්ද සැලසෙන බව සඳහන් වෙයි.
මේ අනුව 2019 නොවැම්බර් 05 වැනි දිනට එළිවන පාන්දර 05.25ට ගුරු ග්රහයා ධනු රාශි ගතවීමේ වැඩි වාසිය අත්වන්නේ ගෝඨාභය රාජපක්ෂ මැතිතුමාටය.
ප්රවීණ ජ්යොතිෂවේදී අගලවත්තේ චන්දන වීරක්කොඩි
ග්රහ මඬුල්ලේ ප්රතාපවත්ම ග්රහ තාරකාව ලෙස හඳුන්වන බ්රහස්පති හෙවත් ගුරු ග්රහයා 2019.11.05 අලුයම 05.25ට වෘශ්චික රාශියෙන් මිදී තමන්ගේම සුපුරුදු නිවෙසට සම්ප්රාප්ත වෙයි. සාමාන්යයෙන් ගුරු ග්රහයා රාශියක් තුළ ගමන් කරන්නේ අවුරුද්දක කාලයක් පමණි. ග්රහයාගේ වක්රවීම මත මෙම කාලය වෙනස් වන අවස්ථාද පවතී. මීට ඉහතදී ගුරු ධනු රාශිගත වූයේ 2007 වර්ෂයේ නොවැම්බර් 22 වැනිදායි. ලබන නොවැම්බර් 05 වැනිදා ධනු රාශියට පිවිසෙන ගුරු 2020 මාර්තු 30 වැනිදා මකර රාශියට පිවිස නීච තත්ත්වයට පත්වෙයි. නැවැතත් ගුරු වක්රව 2020 ජුනි 30 වැනිදා ධනු රාශියට ගමන් කරයි. 2020 නොවැම්බර් 21 වැනකල්ම ගුරු තමන්ගේ ස්වක්ෂේත්රව රාශිය තුළ තම බලය විදහා දක්වයි.
මෙවර ජනාධිපතිවරණයට ඉදිරිපත් වන ප්රධාන අපේක්ෂකයන් දෙදෙනා වන සජිත් ප්රේමදාස මහතාටත් ගෝඨාභය රාජපක්ෂ මහතාටත් මෙම ගුරු මාරුව කවර ආකාරයකට බලපාවිද යන වග දැනගැනීම ඉතාම වැදගත් කාරණයකි. ලබන නොවැම්බර් 16 වැනිදා පැවැත්වෙන ජනාධිපති සටනට සැබවින්ම ගුරු මාරුව ඉතාමත් තීරණාත්මක සාධකයක් වනු ඇත.
ගෝඨාභය රාජපක්ෂ මහතාගේ ලග්නය වෘශ්චික බැවින් ගුරු ග්රහයා දෙවැන්නට හා විද්යාකාරක 5 වැන්නට හිමිකම් කියයි. එතුමාගේ දෙවැන්නා වන ධනස්ථානයට ගුරු පැමිණෙයි. දෙවැන්න ගුරුට ගෝචරව නරක නැත. ධන කාරක ගුරු ධනස්ථානය තුළ ගෝචර වීම ප්රබල ධන යෝගයකි. නමුත් උපතේදී එතුමන්ගේ ජන්ම පත්රය තුළ ගුරු 3 වැන්නේ මකර රාශිය තුළ නීචව පිහිටා ඇත. උපතේදී ගුරු නීච වූ අයට ගුරුගේ ගෝචරය සුබව පිහිටීම ප්රතිඵල ගෙනදෙන්නේ නැත.
නමුත් ග්රහයකු නීච වූ පමණින්ම නීච යැයි කිව නොහැකිය. නීච වන ග්රහයා නීචභංගවන ක්රම ගණනාවක් ජ්යොතිෂය තුළ පිහිටීම එයට හේතුවකි. ගෝඨාභය මහතාගේ උපතේදී ගුරු නීච වුවත් වක්රම ගමන් කරන නිසා නීච භංගවී ඇත. එම නිසා එතුමන්ටද මෙම ගුරු මාරුව නරක වන්නේ නැත.
සජිත් මහතාගේ ගුරු 7 වැන්නේ හා 10 වැන්න අධිපතියා වෙයි. උපතේදී ගුරු උච්චබල සහිතව 2 වැන්න තුළ පිහිටා ඇත. ගුරු උච්ච වූ විට ජයසිඳු යෝගය උදාකරයි. එතුමන්ට ගුරු උපතේදී උච්චව පිහිටි නිසා ප්රබල රාජයෝග උදාකර ඇත. ගුරු ගෝචර වන්නේ 7 වැන්නටයි. ගුරු බලවත්ව කේන්දර ගතවූ විට ගුරු හංස රාජයෝගය උදාකරයි. තනතුරු ලැබීමට, තත්ත්වය උසස් වීමට ජනතා ප්රසාදය ලැබීමට ගුරු මාරුව එතුමන්ට හේතු වන බව කිව හැකිය. මෙම දෙදෙනාගේ වර්තමාන ග්රහචාරයත් උපන් ග්රහචාරයත් අනුව එළඹෙන ජනාධිපතිවරණයට ගුරු මාරුවේ වැඩි වාසිය අත්වන්නේ සජිත් ප්රේමදාස මහතාට බව ප්රකාශ කළ හැකිය.
ප්රවීණ ජ්යොතිෂවේදී සරත්චන්ද්ර බෝතලාගේ
