මෙරට සියලු ආරක්ෂක අංශ ඒකාබද්ධව 2009 වසරේදී එල්.ටී.ටී.ඊ. සංවිධානය යුදමය වශයෙන් පරාජය කිරීමෙන් අනතුරුව නැවත වතාවක් සියලු ආරක්ෂක අංශ ඒකාබද්ධව සිදුකෙරෙන ඉතිහාසයේ දැවැන්තම යුද්ධය ආරම්භ කිරීමට මේ වනවිට ආණ්ඩුව තීරණය කොට ඇත.Sri Lanka Latest News
ඒ අනුව සියලු ආරක්ෂක අංශ ඒකාබද්ධව රට ඇතුළේ මහා ව්යසනයක්ව පවතින මත්කුඩු ජාවාරම සම්පූර්ණයෙන් අතුගා දැමීමේ මෙහෙයුම ලබන නොවැම්බර් මාසයේදී ආරම්භ කිරීමට මේ වනවිට තීන්දු වී තිබේ.
ඒ සඳහා ත්රිවිධ හමුදාව, පොලිසිය, ඔත්තු සේවා ඇතුළු සියලු අංශ ඒකාබද්ධව දැවැන්ත මෙහෙයුමක් ආරම්භ කිරීමට ආණ්ඩුව මේ වනවිට සියලු සැලසුම් සකස් කොට ඇත.
ඒ අනුව පළමු වතාවට නාවික හමුදාව සහ ගුවන් හමුදාව යොදවා මුහුදු මගින් ලංකාව තුළට මත්ද්රව්ය ඇතුළු වීම සම්පූර්ණයෙන් නැවැත්වීමට යෝජනා වී තිබේ.
ආරංචි මාර්ග සඳහන් කරන ආකාරයට දැනට සති කිහිපයක් තිස්සේ සිදුකරන ලද දීර්ඝ සාකච්ඡාවකින් අනතුරුව මෙම දැවැන්ත සැලසුම සකස් කොට ඇති බවක් වාර්තා වේ.
එම සැලැස්මට සන්නද්ධ හමුදාවන්හි සේනාධිනායක, ජනාධිපති අනුර කුමාර දිසානායක මහතාගේ අනුමැතිය හිමිවීමෙන් පසු ලබන 30 වැනිදායින් පසු එය ක්රියාත්මක කිරීමට යෝජනා වී ඇති බව පැවසේ.
මීට අමතරව රට ඇතුළේ සිදුකෙරෙන මත්කුඩු ජාවාරම වැළැක්වීම සඳහා යුද හමුදාව ගම් මට්ටමින් ස්ථානගත කිරීමටත්, දිනපතාම පාහේ වැටලීම් සිදුකිරීමටත් තීන්දු වී ඇති බව දැනගන්නට තිබේ.
එමෙන්ම මෙම මෙහෙයුම සාර්ථක කරගැනීම සඳහා සියලු ඔත්තු සේවාවන් සක්රීයව තැබීමටත් මත්කුඩු විකුණන පුද්ගලයන් සහ මත්ද්රව්ය පාවිච්චි කරන පුද්ගලයන් සම්බන්ධයෙන් තොරතුරු එක්රැස් කිරීමටත් තීරණය වී ඇති බවද දැනගන්නට ඇත.
ඒ අනුව, මෙම දැවැන්ත මෙහෙයුම රට ඇතුළේ මත්ද්රව්ය ජාවාරම අවසන් වනතුරුම නොනවත්වා ක්රියාත්මක කිරීමටද තීන්දු වී ඇති බව වාර්තා වේ.
එමෙන්ම මෙම මෙහෙයුම දකුණට පමණක් සීමා නොවී උතුරු නැගෙනහිර පළාත්වලද දියත් කිරීමට සියලු සැලසුම් සකස් කොට ඇති බවද දැනගන්නට ඇත.
ඔත්තු ගන්න වෙනම ඒකකයක් ලෑස්තියි!
මත්කුඩු ජාවාරම සම්පූර්ණයෙන්ම තුරන් කිරීම සඳහා සියලු ආරක්ෂක අංශ ඒකාබද්ධව සිදුකරන මෙහෙයුමේදී ගම් මට්ටමෙන් සිදුකෙරෙන මත්කුඩු ජාවාරමට අදාළ තොරතුරු එක්රැස් කිරීම සඳහා වෙනම ඒකකයක් නිර්මාණය කිරීමට තීරණය කර ඇති බව වාර්තා වේ.
සියලු ආරක්ෂක අංශ නියෝජනය කරමින් බුද්ධි නිලධාරීන් මෙම ඒකකයට එක් කිරීමටද තීරණය වී ඇති බව පැවැසේ.
මේ වනවිට රට ඇතුළේ මතුව ඇති මතයක් වී ඇත්තේ මත්ද්රව්ය ජාවාරම්කරුවන් සම්බන්ධයෙන් පොලිසියට ලබාදෙන තොරතුරු පොලිසිය ඇතුළෙන්ම යළිත් මත්ද්රව්ය ජාවාරම්කරුවන්ට ලැබෙන බවකි.
එම තත්ත්වය වළක්වාලීම සඳහා මේ ආකාරයට වෙනම බුද්ධි ඒකකයක් නිර්මාණය වීමට හේතු වී තිබේ.
ඒ අනුව රට වටෙන්ම ලැබෙන බුද්ධි තොරතුරු මෙම ඒකකයට යොමුකොට ඒවා විශ්ලේෂණය කිරීමෙන් අනතුරුව මත්කුඩු ජාවාරම තුරන් කිරීම සඳහා කටයුතු කරන පාර්ශ්වයන් වෙත ඒවා යොමුකිරීම එහි කාර්යභාරය වී ඇති බවක් දැනගන්නට ඇත.
හැම ගමකම ප්රජා කමිටු!
ගම් මට්ටමෙන් මත්ද්රව්ය ජාවාරම තුරන් කිරීමේ මෙහෙයුමට ජනතාවගේ සහාය ලබාගැනීම සඳහා සෑම ගමකම ප්රජා කමිටුවක් නිර්මාණය කිරීමට යෝජනා වී තිබේ.
ඒ අනුව මෙම ප්රජා කමිටුවට සියලු පක්ෂ නියෝජනය කරමින් සාමාජිකයන් ඇතුළත් කිරීමට යෝජනා වී ඇත.
මෙහිදී ගම් මට්ටමෙන් මත්ද්රව්ය ජාවාරම්කරුවන් සහ මත්ද්රව්ය භාවිත කරන්නන් සම්බන්ධයෙන් ඇති තොරතුරු මෙම ප්රජා කමිටුව හරහා ප්රධාන මෙහෙයුමට වාර්තා කිරීම එහි කාර්යභාරය වී ඇති බවක් දැනගන්නට ඇත.
